Rétt eftir hrunið sagði fjármálaráðherra Grikklands að „Grikkland væri ekki Ísland“ og gaf í skyn að hlutirnir gætu aldrei orðið eins slæmir í Grikklandi og Íslandi. Í dag er Grikkland í mun verri stöðu en Ísland. Lánshæfið hjá Moody’s er löngu komið niður í ruslaflokk og vel það.
Aðalmunurinn á Grikklandi og Íslandi, er að þrátt fyrir allt, er Íslandi stjórnað á nokkuð ábyrgan hátt og innviðir þjóðfélagsins eru sterkir. Auðvita er hægt að gera miklu betur hér á landi, en allt er afstætt, og hvar sem menn standa í stjórnmálum á Íslandi þá hefur fjármálaráðherra Íslands staðið sig betur en fjármálaráðherra Grikklands. Þá koma íslenskir Alþingismenn nokkuð vel út miðað við þingmenn í Portúgal.
Okkar norrænu hefðir og aðferðir skipta máli og hafa bjargað miklu hér á síðustu 2.5 ári. Við þurfum að kynna þetta fyrir útlendingum og matsfyrirtækjum. Það var því mjög óheppilegt að Forseti Íslands skuli hafa sett Ísland við hliðina á Grikklandi þegar hann hóf sinn reiðisöng um matsfyrirtækin á Bloomberg sjónvarpsstöðinni. Þar fetaði hann í fótspor gríska fjármálaráðherrans sem rúmum mánuði á undan hellti úr skálum reiði sinnar yfir matsfyrirtækin.
Nei við höfum ekkert upp úr því að herma eftir grískum vælukjóum. Okkar fyrirmynd á að vera norræn fyrst og fremst.
Andri Geir Arinbjarnarson
Þetta er furðulegur samanburður.
Þekkir höfundur glöggt til þingmanna í Grikklandi og frammistöðu þeirra síðustu mánuðina?
Þeir eru að vísu ekki nema 300!
Hvernig er hægt að fella slíka sleggjudóma og draga upp svo einfalda mynd?
Næ þessu ekki.
Okkar fyrirmynd er að vera norræn fyrst og fremst.
Við höfum ekkert upp úr því að herma eftir grískum vælukjóum.
Kann ekki að meta svona „silly“ frasa. Minnir á forsetann. Grikkir eru í erfiðari stöðu en við. Stórt land með erfiða nágranna og mikil útgjöld fyrir varnir landsins. En frábært fólk, sem ég þekki vel og er tengdur.
Karl og Haukur. Hrunið á Grikklandi, burtséð frá yndislegu fólki, varð vegna gjörspilltra ráðamanna sem sköruðu eld að eigin köku, lugu til um fjárhag ríkisins og dældu lánum inn í hagkerfi sitt á forsendum falsaðra ríkisreikninga. Vandi annarra evruríkja er af öðrum orsökum og í meginatriðum sá sami allsstaðar, bankavandi vegna misstórrar útlánabólu, en hefur ekkert með ríkisfjármál að gera.
Stefán.
Einmitt.
Margt líkt með Grikkjum og Íslendingum, pólitísk spilling, ömurleg efanhagsstjórn og allsherjar vanhæfni.
Almenningur var meðvirkur í báðum löndum.
Suðræn samfélög hafa eitt fram yfir hin norrænu, þau eru ekki jafn drepleiðinleg.
Karl,
Ekki gleyma veðráttunni.