Jóhannes Björn
Margir muna eftir bókinni Falið vald eftir Jóhannes Björn sem gefin var út í kringum 1980 og hafði mikil áhrif á pólitíska meðvitund ja… líklega heillar kynslóðar. Ég átti hana og fannst þetta stórmerkileg lesning en er búin að glata bókinni og þarf að ná mér í nýtt eintak. Bókin var endurútgefin í fyrravor og fæst í bókabúðum. Jóhannes Björn hefur haldið úti vefsíðunni vald.org alllengi og verið viðmælandi Egils í Silfrinu, Hjara veraldar og eflaust víðar – nú síðast í heimildamyndinni Maybe I should have. Í myndinni segir Jóhannes Björn m.a. um ástandið á Íslandi: „Ja, ástandið er hræðilegt og það hefur hreinlega ekkert verið gert af viti, það er svo einfalt. Strax í byrjun lögðust þau niður og dóu, gerðu ekki neitt. Þessir ráðamenn voru hræddir við eitthvað – ég veit ekki alveg hvað þeir voru svona hræddir við – en þeir hreinlega gáfust upp.“
Hann segir einnig: „Stjórnmálamennirnir runnu saman við spillinguna, þeir runnu saman við útrásarvíkingana og þeir eru meðsekir. Þeir eru hreinlega hræddir við hvað kemur upp á yfirborðið. Ég sé enga aðra skýringu.“ Og Jóhannes Björn heldur áfram: „Pólitíska kerfið á Íslandi er ekki lýðræðiskerfi. Það byggist á því að pólitíkusar tala við fólk 15 mínútum fyrir kosningar og síðan skella þeir í lás. Þannig að þeir þurfa aldrei að svara fyrir neitt. Á hinum Norðurlöndunum verða menn að segja af sér af minnstu orsökum en á Íslandi segir enginn af sér. Á Íslandi tekur enginn ábyrgð á neinu.“
Og enn segir Jóhannes Björn í heimildamyndinni Maybe I should have: „Það er náttúrulega víða spilling, en ef við lítum til hinna Norðurlandanna þá sérðu ekki nærri, nærri svona mikið vegna þess að siðgæðisvitund þar er á miklu hærra plani. Fólkið sjálft lætur ekki vaða svona ofan í sig eins og er gert á Íslandi. Stjórnmálamennirnir vita það og taka tillit til þess.“ Við vitum mætavel að þetta er allt satt og rétt sem hann segir. Viljum við breyta siðferðinu eða hjakka í sama spillingarfarinu?
Jóhannes Björn verður gestur Egils í Silfrinu í dag. Ef fólk vill kynna sér málflutning hans birti ég hér þrjú myndbönd úr Silfrinu með viðtölum við hann. Það fyrsta og elsta er frá 5. desember 2004 og þar fjallar Jóhannes Björn m.a. um heimskapítalismann, vinnumarkaðinn í Bandaríkjunum og hvernig hinn svokallaði „sveigjanleiki“ á vinnumarkaði virkar og stórfyrirtækin græða meira á kostnað hins vinnandi manns. Þetta er enginn nýr sannleikur og á við hér á landi sem víðar, en það er gott að láta minna sig á hlutina öðru hvoru.
Silfur Egils 5. desember 2004
Silfur Egils 26. október 2008
Silfur Egils 17. maí 2009
Jóhannes Björn var ræðumaður á útifundinum á Austurvelli í gær, 23. janúar, og ég leyfði mér að taka ræðuna af síðunni hans og birta hér. Hún er ekkert minna en stórkostlega góð.
****************************************************
Jóhannes Björn – ræða á útifundi á Austurvelli 23. janúar 2010 í boði Hjara veraldar
Góðir fundargestir,
Það er deginum ljósara að pólitíska yfirstéttin og peningaelítan sem stýrir fjórflokknum tóku snemma hruns þá ákvörðun að fórna skuldsettum heimilum landsins. Þetta var gert á meðan skjaldborg var slegin um fjármagnseigendur og glæpaliðið sem setti landið á hausinn.
Flest bendir til þess að ráðamenn hafi ákveðið að draga almenning á asnaeyrunum með því að þæfa málið sem lengst – gefa út yfirlýsingar sem veittu fólki tímabundna von, en reyndust við nánari athugun ekkert annað en lengri hengingaról.
Við skulum hafa eitt grundvallaratriði á hreinu: Myntkörfulán, borguð út í íslenskum krónum, eru algjörlega ólögleg og verðtryggð lán eru bæði siðlaus og standast heldur ekki lög um eðlilega viðskiptahætti. Einstaklingar sem hafa verið flæktir í þetta skuldanet og óska nú leiðréttingar eru því ekki að biðja um ölmusu eða sérstaka fyrirgreiðslu – þeir eru einfaldlega að krefjast þess að lögum landsins sé framfylgt. Spurningin snýst raunverulega um hvort við búum í réttarríki eða bananalýðveldi.
Lög nr. 38 frá 2001 eru skýr. Gjaldeyristryggð lán eru ólögleg. En jafnvel þótt þessi lög væru ekki fyrir hendi þá gerði gjaldeyrisbrask bankanna 2008 verðtryggðu lánin marklaus. Í stuttu máli þá tóku bankarnir stöðu á móti viðskiptavinum sínum þegar þeir snarfelldu gengi íslensku krónunnar. Þeir græddu því bæði á fallandi gengi og hækkun allra gengistryggðra og verðtryggðra lána. Þetta voru ekki eðlileg bankaviðskipti heldur glæpastarfsemi og margur hefur verið settur í járn fyrir minna.
Úr Grágás
Í 36. grein laga nr. 7 frá 1936 segir orðrétt: „Samningi má víkja til hliðar í heild eða að hluta, eða breyta, ef það yrði talið ósanngjarnt eða andstætt góðri viðskiptavenju að bera hann fyrir sig…“
Síðan segir í þessum sömu lögum: „Samningur telst ósanngjarn stríði hann gegn góðum viðskiptaháttum og raski til muna jafnvægi milli réttinda og skyldna samningsaðila, neytanda í óhag.“
Lögin eru skýr og nýlegur dómur sem féll lánafyrirtæki í vil í Héraðsdómi Reykjavíkur sýnir okkur aðeins að samtrygging valdsins hefur náð óþolandi stigi og réttarfar á Íslandi á enga samleið með kerfi landa sem við viljum bera okkur saman við. Orðið „bananalýðveldi“ kemur aftur upp í hugann… en við hverju er að búast í landi þar sem þjónar dómsvaldsins eru án undantekninga valdir samkvæmt pólitískri forskrift?
Verðtrygging lána er eitthvert mesta glapræði seinni tíma. Á áratugunum fyrir 1980 ríkti algjör óstjórn á íslenskum fjármálamarkaði. Verðbólgan æddi áfram og ráðamenn annað hvort skildu ekki hvað var að gerast eða vildu ekki skilja það. Í staðinn fyrir að beita raunhæfum lausnum, t.d. draga úr útlánum bankanna með hærri bindiskyldu, þá var kerfið sett á sjálfstýringu með verðtryggingunni. Þetta var taktísk viðurkenning valdamanna á þeirri staðreynd að þeir kunnu ekki að stjórna hagkerfinu.
Verðtryggingin er ólögleg að því leyti að hún er ekki í anda eðlilegra viðskiptahátta. Hvernig getur það staðist að aðeins annar aðilinn taki alla áhættu af öllu sem kann að fara úrskeiðis í framtíðinni? Þegar bankakerfið bauð fólki verðtryggð lán á árunum fyrir 2008 lögðu „sérfræðingar“ bankanna fram greiðsluáætlanir sem hljóðuðu upp á 3-5% verðbólgu næstu árin. Þetta ógildir skilmála verðtryggðra lána vegna þess að lög um trúnað og tillitskyldu við samningagerð segja að það sé óheimilt að bera fyrir samning vegna atvika sem voru til staðar og ekki eiga lengur við.
Sú staðreynd að bankakerfið sjálft rústaði landinu og keyrði gengið niður úr öllu valdi með viðeigandi verðbólguskoti tekur af allan vafa um lögmæti verðtryggðra samninga.
Jóhannes Björn
Í stuttu máli: Bankakerfið eyðilagði hagkerfið og ber fulla ábyrgð á því að verðtryggð lán hafa stórhækkað og gjaldeyristryggð lán jafnvel tvöfaldast. Og nú sparkar kerfið í liggjandi mann og heimtar að fólk ekki aðeins borgi okrið, heldur haldi áfram að borga af lánum af húsnæði og bílum sem það er búið að missa. Þetta er einhver hroðalegasta ósvífni allra tíma. Það er algjör lágmarkskrafa að fólk sem gengur frá ofurskuldsettum eignum sé þar með laust allra mála. Þingmenn sem standa í vegi fyrir þessari breytingu eru með frosin hjörtu og ekki mannlegar verur í þeim skilningi er við leggjum í það hugtak.
Elítan sem hefur hreiðrað um sig í skjaldborginni og sett fólkið út á gaddinn kemst upp með myrkraverk sín í skjóli leynimakks og pukurs sem lengi hefur viljað loða við íslenska stjórnsýslu. Þótt tugþúsundir Íslendinga hafi verið gerðir eignalausir þá heldur leynimakkið áfram. Hvar eru nákvæmir listar yfir alla pólitíkusa sem fengu kúlulán og aðra óeðlilega fyrirgreiðslu frá glæpagenginu sem setti landið á hausinn? Hvers vegna fær fólkið sem verður að borga fyrir glæpinn ekki nákvæmar upplýsingar um hvað bankarnir eru að afskrifa?
Íslenskir stjórnmálamenn hafa tilhneigingu til að hegða sér eins og danskir embættismenn í kringum aldamótin 1900. Sem stétt eru þeir andlýðræðislegir og hrokafullir. Þeir hika ekki við að halda mikilvægustu upplýsingum frá fólkinu. Raforkuverð til erlendra fyrirtækja – atriði sem varðar alla framtíðaruppbyggingu landsins – er t.d. leyndarmál. Gamlir samningar við Alþjóðabankann og Alþjóðagjaldeyrissjóðinn, sem mótuðu atvinnustefnuna í marga áratugi, eru líka leyndarmál. Munið að ríkisstjórnin vildi upphaflega að Alþingismenn samþykktu Icesave-samninginn án þess að lesa hann! Allt annað er í sama dúr.
Hér verður mikið að breytast ef mönnum er full alvara í þeim ásetningi að endurreisa landið. Gamla launhyggjan verður að hverfa og það verður að hrista duglega upp í embættismannakerfinu. Valið er einfalt: Annað hvort verður hér gjörbreytt kerfi þar sem nýir kústar sópa spillingunni út… eða hálfgerð skálmöld, stórskert lífskjör almennings og gífurlegur landflótti. Það er búið að ganga eins nálægt réttlætisvitund fólks og mögulegt er.
Ef stjórnvöld halda áfram á sömu braut þá blasir allt annað og verra Ísland við okkur eftir nokkur ár. Okurvextir, óraunhæfar afborganir af erlendum skuldbindingum og atvinnuleysi eiga eftir að orsaka enn frekari gjaldþrot og flóknari erfiðleika. Þetta er óþolandi vítahringur og þróun sem strax ber að stöðva. Það verður að höggva á hnútinn. Afnema verðtryggingu lána, breyta gjaldeyrislánum í íslensk á því verði sem þau voru fyrir 15 mánuðum og stórlækka stýrivexti.
Okurvextir eru böl. Á meðan flest fyrirtæki á Vesturlöndum hafa aðgang að ódýrum peningum – og ekki veitir þeim af á þessum krepputímum – þá verða helsærð fyrirtæki á Íslandi að borga yfir þriðjung veltunnar í vexti. Aðeins hagfræðingum á framfæri ríkisins dytti til hugar að verja slíka sjálfsvígsstefnu.
Jónsbók
Dæmið væri kannski skiljanlegt ef hér væri verið að reyna eitthvað hagfræðibrölt í fyrsta skipti, en margra ára og áratuga reynsla hefur sýnt okkur að vaxtaokrið virkar ekki. Okurvextir kynda undir verðbólgu í litlu hagkerfi vegna þess að innlend verðsamkeppni er allt of lítil. Okurvextir styrkja heldur ekki gjaldmiðilinn. Þeir láta umheiminn aðeins vita að hér bjátar eitthvað hræðilega mikið á.
Fimmtán mánuðum eftir að nokkrir glæpamenn – með hjálp pólitísku yfirstéttarinnar – rústuðu lífi tugþúsunda íslendinga, setti Saksóknari Ríkisins allt í gang og kærði nokkur ungmenni fyrir að ráðast inn í Alþingishúsið! Þetta er auðvitað eins og hver önnur martröð og henni fylgir ákveðin hætta. Þegar fólk þarf að berjast við vindmyllur – það glímir stöðugt við atburðarás sem gæti komið beint úr skáldsögu eftir Kafka – þá er stórhætta á að það missi móðinn. Það má aldrei gerast.
Við skulum hafa það hugfast að svo til allar framfarir sjá dagsins ljós þegar fólk vinnur bug á einhverjum erfiðleikum… og það er nánast náttúrulögmál að allt andstreymi skapar ný tækifæri. Eða eins og Shakespeare orðaði það: „Hve ljúft er að nota mótlætið sér í hag.“
Gömul kínversk saga segir frá bónda sem átti hest sem einn góðan veðurdag strauk að heiman. Þegar nágrannarnir komu til þess að votta honum samúð sína spurði bóndinn: „Hvernig vitið þið að þetta séu slæm tíðindi?“ Nágrannarnir hristu hausinn og fóru, en næsta dag kom hesturinn til baka í fylgd með villtum hesti. Nú komu nágrannarnir til þess að óska bóndanum til hamingju með nýja hestinn, en hann leit á þá með undrun og spurði: „En hvernig vitið þið að ég hafi dottið í lukkupottinn?“ Stuttu seinna var sonur bóndans að temja nýja hestinn og fótbrotnaði þegar hann kastaðist af baki. Aftur komu nágrannarnir til þess að votta samúð sína og aftur sagði bóndinn: „Hvernig vitið þið að þetta eigi eftir að koma sér illa?“ Nágrannarnir kvöddu bóndann orðlausir… en næsta dag kom stríðsherra í héraðið og smalaði saman öllum heilbrigðum ungum mönnum og sendi út á vígvöllinn.
Góðir fundargestir. Bankahrunið gefur okkur gullið tækifæri til þess að skapa hér betra samfélag. Við höfum allt of lengi búið við forhert framkvæmdavald, grútmáttlaust Alþingi og rammpólitískt dómsvald. Ef við stöndum þétt saman þá missir klíkustéttin heljartakið sem hún hefur á kerfinu og við uppskerum betra þjóðfélag… réttlátara þjóðfélag… land sem við getum öll verið stolt af.
Ég heyri þarna í bakgrunninum að það eru hvað margir samankomnir þarna… 12? 15 manns? Hvar er þjóðin? Á útsölu í Kringlunni? Að versla hjá Pig-Padres í Bónus? Of busy við að láta auðvaldið taka sig rassgatið greinilega til að nenna að mæta á baráttufundi til að sýna samstöðu og berjast gegn því svívirðilega óréttlæti sem Fjórflokkurinn treður ofan í hana. Það er ekki von að mikið breytist ef fólk nennir ekki að druslast til að berjast fyrir eigin réttindum.
Það er ekkert að krónunni ef ekki eitt er um efni fram. Það vita allir.Verðtrygging gerir það að verkum að menn eignast aldrei neitt. Eftir að þrælahald var afnumið fann fjármagnseigandinn upp skuldarann. Eins og sást í peningapartíinu síðustu ár, þar sem sendisveinar bankamanna voru eins og fljúgandi skítakamrar um allt land og mið að selja mönnum lán. Hvaðan komu svo peningarnir. Jú frá USA. Þegar Kaninn bjóst við kreppu eftir að netbólan sprakk árið 2000 hófst peningaprentun sem stendur en í fjórum verksmiðum í USA 24/7 Matadorpeningar sem var fleytt um allann heim. Hvar enduðu þeir Jú inní stóru fjárfestingabönkunum Leman og co sem hrundi. Eða var látin hryna, og svo hrundi allt með. Versta við verðtryggingu er að stjórnvöld og fjármagnseigendur geta stjórnað því hvenær ránin fara fram. Höfum hugfast það sem Roosvelt sagði “ Í stjórnmálum gerist ekkert af tilviljun það er búið að ákveða allt“
ókei, þetta vildi ég fá að vita.
Með hvaða gjaldmiðli mælirðu svo?
Nú berast af því fregnir að Evran sé hugsanlega á leið til andskotans, dollarinn sömuleiðis lítt brúklegur til lengri tíma litið….
Norska krónan?
Nú vil ég fá að vita: ef við eignumst nothæfa mynt, hverjar eru þá líkurnar á því að íslendingum takist að halda uppi sæmilegri hagstjórn?
Eða erum við ekki bara óttalegir aular?
Kæri nafni, nei það er annað í Svíþjóð, þeir eru með alvöru gjaldmiðil. Það er það sem okkur skortir. Með Íslensku krónunni er vonlaust að vera án verðtryggingar. Vilja menn loka Lífeyriussjóðum, Íbúðalánasjóði og LÍN.
Tek undir með Runa.
Kæri nafni, ekki eru þá verðbæturnar sérstaklega háar erlendis, sbr. eftirfarandi.
Hafði samband við vin í Svíþjóð, hann tékkaði fyrir mig á útlánsvöxtum í sínum banka, Handelsbanken, 10 ára lán: 4,75% vextir (m.v. fasta vexti).
Ég spurði hvort lántakandi í Svíþjóð mætti búast við því að einhverju yrði bætt ofan á á síðari stigum, fylgir ekki einhver böggull skammrifi? Hann sagði nei, ja, og þó, ef um væri að ræða fljótandi vexti, væru þeir eitthvað hærri.
Hvernig fara þeir að þessu, hmmmm?
Svíþjóð ætti samkvæmt fræðingunum okkar að vera sokkin í sæ fyrir löngu síðan….
Jafnframt útskýrði ég fyrir honum verðtrygginguna okkar, þetta lífsnauðsynlega lím sem heldur tilverunni saman hér hjá okkur (þetta á að vera hæðni), þennan hálfguð hagfræðinganna, og gaf honum dæmið af láninu mínu til að negla það frekar. Hann sagði einfaldlega: Sounds very twisted (þessi náungi er reyndar yfirhöfuð ekkert að missa sig í lýsingarorðunum)
Við þetta má kannski bæta að ekki er farið fram á uppgreiðslugjald hjá Handelsbanken, var reyndar afnumið hér 2008 N.B. þó bara á lánum með breytilegum vöxtum, lægri en 50 milljónum, en samt, hugsið ykkur ósvífnina í íslensku bönkunum á sínum tíma…..
Ég vil enn og aftur þakka þér frábær skrif Lára Hanna bæði fyrir ræðuna hans Jóhannesar Bjarnar og einnig Atla. Hvort tveggja frábærar ræður sem ég hefði misst af nema fyrir síðuna þína.
þeir sem mæla verðtryggingu bót, eru eingöngu að lýsa því yfir að ísland geti ekki rekið fjármálakerfi eins og það þekkist útí hinum stóra heimi.
Verðtryggingin er einvörðungu sett á til að verja fjármagnseigandanum tapi, það er enginn áhætta fyrir banka að lána út verðtryggt lán.Áhætta er ÖLL hjá lántakanum…
Bankin getur gert hvaða hundakúnstir sem er, og hann hagnast á því að verðbólgan sé hærri,vegna verðtryggingnar.
Kærar þakkir Lára Hanna, Jóhannes og allar hetjurnar sem halda áfram baráttunni!
Í Evrópu eru vextir lágir án verðtryggingar. Í raun lægri prósenta en vextir hérna sem síðan fá glæpi plúsin á sig (verðtrygginguna). Guðmundur Ól þú hlýtur að vera háttsettur embættismaður eða fjármagnseigandi. Því verðtryggingin á sér engin rök, nema fyrir þjófa eins og banka, lífeyrisjóði og ríkisvald.
Auk þess held ég að mjög lítið atvik þarf til að fólkið tryllist og bylting fari á stað, vona bara að Árni Páll opni ekki muninn á næstunni þannig að friður verði á DJÖFLAEYJUNNI.
Guðmundur Helgason: Kæri nafni, erlendis eru verðbæturnar innifaldar í vöxtunum. Þetta var svona hjá okkur fram til 1981. Þá varð að skilja að vexti og verðbætur, því tekið var upp verðbólguleiðrétt bókhald og það varð að reikna verðbólguna sérstaklega svo hægt væri að skattleggja verðbólgugróða og gefa mönnum afslátt á sköttum vegna verðbólgutaps. Ef verðtrygging væri lögð niður mindu bankarnir taka vexti sem væru = verðbólga+raunvextir+áhætta. Menn fengju miklu verri kjör en nú. Rugludallar eins og Egill Helgason heldur að bankarnir færu að gefa fé ef verðtrygging væri aflögð. Öðru nær.
Ég þakka hlutaðeigandi hlý orð í minn garð og öllum er leyfilegt að birta ræðuna í heild eða að hluta hvar sem er (Kristinn M.). Vek athygli á því að myndband af flutningnum í tveimur pörtum má einnig nálgast á http://www.hjariveraldar.is (skrunað niður að mér á stiku vinstra megin). Það var mikil stemmning á vellinum og hún kemur eðlilega betur fram á myndbandinu.
Hugheilar kveðjur,
Atli
kannski ekki umhyggju, en leggur spilin á borðið án fyrirvara.
Jóhannes talar hreint út. Getur fólk séð muninn á pólitíkus og manni sem kann sig og sýnir raunverulega umhyggju?
Kærar þakkir. Alveg magnað eins og alltaf Lára.
Hagfræði og eðlisfræði eiga það sameiginlegt að byggjast á stærðfræði. Einnig hitamælir og póker (tölfræðin u-loose). Vaskur er einnig stærðfræðileg tala eins og vísitalan eins og allar hinar leiðinglegu tölurnar…………….
Islendingar: stöndum upp!
Hún er sterk ræða Atla Steins, hér er slóðin, tek mér það bessaleifi að setja hana hér undir.
http://www.heimilin.is/varnarthing/about/vidburdir/740-raeea-atla-steins-guemundssonar-austurvelli
Ok nafni, nú ætla ég bara að tala frá hjartanu og buddunni minni.
Mér er drullusama um öll línurit og gröf- gott fólk, hér kemur blákaldur veruleikinn, njótið endilega með mér:
Ég er m.a. með lífeyrissjóðslán (sem eiga að vera svo æðislega hagstæð) á herðunum, upp á „skitnar“ fjórar milljónir á lántökudegi. Nú, níu árum síðar, ath. ég er búinn að borga af helvítis láninu í níu ár, eru eftirstöðvar á sjöundu milljón.
Eftir að hafa borgað hátt í þrjár milljónir til baka.
Er eitthvert vit í þessu?
Er eitthvert vit í því að þurfa að greiða lán margfalt til baka?
Þegar maður útskýrir þetta kerfi fyrir vinum sínum erlendis verða þeir bara á svipinn eins og þeir trúi manni ekki, þetta er svo gjörsamlega út í hött.
Fyrirgefiði, það bara hlýtur að vera til eitthvað annað….
Áður en söngurinn hefst um ábyrgð lántakandans:
JÁ, ég vissi af verðtryggingunni þegar ég tók lánið-
JÁ, ég fékk greiðsluáætlun sem, merkilegt nokk, gerði ráð fyrir 5% verðbólgu-
JÁ, þá leit lánið asnalega út, ég er ekki að fatta þetta fyrst núna.
Þetta breytir því samt ekki að þetta kerfi er fáránlegt.
Já, og takk fyrir að kalla mig sukkara, OG fyrirgefðu botnlausa heimsku mína.
Varðandi gullfóbíuna: á þessum síðustu og verstu þykir mér hugmyndin um að fjárfesta í gulli miklu meira heillandi en að leggja inn í banka eða fjárfesta í einhverju ævintýri, þessi gerviveröld fjármálanna stendur á brauðfótum, það er maður þó búinn að læra á síðustu misserum.
Góðar stundir.
Ertu að segja að hækkun á virðisaukaskatti hafi ekki áhrif á vísitöluna ?
Finnst þér eðlilegt að áfengi og tóbak sé innifalið í útreikningi á vísitölunni ?
Guðmundur Ólafsson
Finnst þér rétt að líkja saman hagfræði og eðlisfræði ? Neitar þú því að efnahagur heimsins líkist meira pókerspili með reglum settum eftir hentugleika mannsins meðan hitt er náttúrulögmál ?
L: Er hitamælirinn orsök kuldanna í Evrópu??
Samkvæmt ummælum Guðmundar Ólafssonar þá lifum við í þrælasamfélagi þar sem ríki og bankar fjarstýra vísitölunni eftir hentugleika og ekkert við því að gera.
Guðmundur Helgason :
1. Kjör almennings eru betri með verðtryggingu (sjá: http://notendur.hi.is/lobbi/U/lan%20og%20raunvx.htm ) Óvissu eitt.
2. Almenningur fæt lán en fengju ekki, sbr. ástandið 1976-1980.
3. Afnám verðtryggingar þýðir að lífeyriþegar og innistæðueigendur borga fyrir sukkarana. Amma borgar.
4. Verst er þú líklega hvernig afnám verðtryggingar mundi leika atvinnureksturinn, þeir sem ættu peninga yrðu neyddir til að fjárfesta í hlutum sem engan arð bera, steypu eða gulli eða málverkum.
Ég bara nenni ekki að halda áfram. Að halda því fram að allt sé þetta gert fyrir fjármagnseigendur, þeir beri enga áhættu og á sama tíma segja að 20.000 heimili séu að fara á hausinn, er í besta falli mótsögn. Líklega þó botnlaus heimska.
Halldór Killjan og Jónas frá Hriflu áttu það sameiginlegt með Agli Helgasyni, að botna ekkert í efnahagsmálum. Það er sorglegt því Egill er svo góður í bókmenntum.
(afsakið, innleggið mitt kl.20:12 er ætlað nafna mínum kl.19:50, og öllum álíka þenkjandi)
Og hvað er að því að vera á móti verðtryggingu, með leyfi að spyrja?
Er eitthvað að því að eiga sér þann draum að geta kannski í þessu lífi greitt upp skuldirnar sínar?
Er eitthvað að því að láta sig dreyma um tilveru án hlekkja bankans um ökklann?
Hér má heyra átakanlega harmsögu konu sem fór illa út úr kerfinu:
Hvar er þessi Jón Frímann, ég er sammála honum. Umfjöllun Jóhannesar Björns um íslensk ernahagsmál eru fullkomið rugl, eins og yfirleitt hjá Agli. Sind að Egill skuli ekkert botna í efnahagsmálum, hann leiðir bara fram menn sem eru á móti verðtryggingu vegna þess að hann er það sjálfur.
Jón Frímann… Þú kallar Jóhannes Björn samsæriskenningasmið og rugludall. Það eru stór orð.
Nú skalt þú gjöra svo vel að rökstyðja mál þitt – og það rækilega og á sannfærandi hátt.
Ella snúast orð þín upp á sjálfan þig.
Jon Friman er þetta líka þvæla ?
Þetta er staðreynd hjá mörgu fólki í drumalandinu i vestri sem dælir triljónum í banka og fjárglæfrafyrirtæki og gefur skít í almenning í landinu,
verður þetta svona á skerinu þegar flóðbylgja nauðungaruppboða skellur
á Íslenskan almenning eftir nokkra daga?
Er einhver von til þess að Hanna Lára og fleirra gott fólk komi af stað samstöðuhreyfingu á móti ríkjandi þrælavæðingu á Íslandi.
Það gerist ekkert ef allir eru að bíða eftir einhverju kraftaverki, við verðum öll að standa saman, við getum ekki beðið eftir því að aðrir geri hlutina fyrir okkur.
Ég skil ekki afhverju það er verið að dúkka uppá þennan samsæriskenningasmið og rugludall.
Vá, þetta er flott ræða. Við verðum að gera eitthvað í þessu!
Jóhannes Björn er snillingur og Vilmundur Gylfason var það líka, enn það þarf að gera e-h til að ástandið lagist, það verður að aðgreina framkvæmdarvaldið, dómsvaldið og löggjafarvaldið að fullu til að við eigum möguleika á að vera e-h annað en bananalýðveldi. ef þetta verður ekki gert fljótlega munum við lenda í sömu helmingaskiptavitleysunni og verið hefur.
Erla, það þarf ekki að fara neitt lengra til þess að þetta geti kallast fasismi, miðað við hvernig hefur verið haldið á málum gagnvart almenningi hér, býsna lengi. Þöggunin, eineltið og fantaskapurinn sem hér hefur ríkt og steypi að lokum öllu um koll. Hér vantar aðeins her og leyniþjónustu til að fasisminn sé fullkomnaður. Við erum við nánast komin á staðinn. Ég held að Íslenskt samfélag hafi á vissum tímapunkti amk. komist nær því að teljast fasistaríki en Evrópuríki. Það er alla vega hrollvekjandi að skoða margt í gerðum framkvæmdavaldsins í skjóli flokkræðis hér og bera það saman við jaðarþjóðirnar austan Evrópu. Lönd sem enda „stan“. Islandistan var ekki í hættu vegna þess að þar byggju svo mikið af múslimum, heldur vegna þess að þar bjuggu bókstafstrúaðir framsóknar – og sjálfstæðismenn og konur, ásamt öðum íslendingum sem teymast af flokksræði á asnaeyrum sínum, rúnir dómgreind.Liðið sem fylgir stjórnarflokkunum má einnig passa sig að tapa sér ekki í réttrúnaðinum, loks þegar það komst að kötlunum eftir hrunið.
Að dómsmálaráðherra hafi ekki beðið saksóknara að sitja ásér fram yfir útgáfu hrunskýrslunnar er staðfesting á því að hér hefur ekkert breyst.
Það hafði lítið raðast upp til betri vegar í höfði fyrrum menntamálaráðherra ÞKG þegar ég heyrði í henni á gufunni í gær. Þar var gamli hrokinn í fullu verðgildi. Hún hafði engu gleymt og lítið lært frá því síðast.
Það er hreint magnað að hlusta á fólk eins og Jóhannes Björn og synd hvað sannleikur hans um ástandið í íslenskum samtíma hreyfi lítið við fólki. Lýsing hans er þyngri en tárum taki. Ísland – er í lagi! Er í lagi Íaland? Halló! Halló! Er eitthvað að fara að gerast!
Ég ber mikla virðingu fyrir Jóhannesi og finnst orðið löngu tímabært að hlusta á manninn..
En eins og hann bendir á þá er spillingin ekki slík á norðurlöndunum (hún er reyndar mikil þar líka en auðveldari að fela hana oft vegna stærðar..) En stjórnvöld stjórna eftir því aðhaldi sem þau fá frá almenningi..
Það er aðhaldið frá almenningi sem skiptir máli..
Svo við getum rifist hér fram og til baka gott fólk eða við getum risið upp.. og það með friði. Málningaslettur og slíkt gerir aðeins eitt og það er að það skapar gróðrastíu fyrir enn frekari reiði en við þurfum ekki á meiru slíku að halda.
Aðhald er til staðar ef almenningur heldur sig upplýstum og lætur stjórnvöld vita af því með samstöðu og aðgerðum sem meiða engan.
Við verðum að fara að breyta hlutum hér á Íslandi núna.. það er í alvöru mjög mikið í húfi.
þetta er mögnuð ræða hjá honum Jóhannesi og lýsir því hvernig Elítan hefur eyðilagt Íslenska lýðræðið og breitt lýðveldinu í GLÆPAVELDI fjórflokkana. Hvar er þessi blessaða skjaldborg um heimilin sem átta að vernda fólkið, hún er bara fyrir þessa glæpamenn sem skilja eftir sig sviðna jörð.
Er þessi stjórn að bíða eftir því að það verði gerð blóðug bylting í landinu?
Skynsamlegast væri vitanlega að setja aðgerðarsinnana og stjórnleysingjana í að leysa vandann og uppræta spillinguna. Þau yrðu ekki lengi að því sem lítið er.
Frábær færsla Lára, takk fyrir.
Ræðuna þarf maður að lesa fyrir háttinn á hverju kvöldi, minnst.
Ræðurnar eru inni á meðfylgjandi slóð ,ræða Atla ekki síðri en Jóhannesar
http://raksig.blog.is/blog/raksig/#entry-1009713
I meira en 20 ár hafa óhæfir einstaklingar náð tangarhaldi á Íslandi, gegnum flokksmaskínur
hinna gráðugu, þeirra sem ganga með einbeittan brotavilja, og fyrirlíta stjórnarskrá landsins,
afþví það plagg er stöðugt fyrir þeim. Þessir óhæfu einstaklingar hafa sýnt sig vera samsorta apparöt, þeirra sem náðu tangarhaldi á þýzku þjóðinni, með sama hætti, og rústuðu þýzku þjóðinni,efnahagslega, á sama hátt og Íslensku forystusauðirnir hafa nú afrekað.
Hugmyndasmiðir þeirra Þýzku og þeirra Íslensku, höfðu ákveðinn samnefnara djúpt inní heilabúi sínu, hann er með öfugum formerkjum, og guðs orð varar við þeirri gerðinni.
„forhert framkvæmdavald, grútmáttlaust Alþingi og rammpólitískt dómsvald“
Dúndurgóð lýsing á lýðveldinu Íslandi. Framkvæmdavaldið stakk bæði löggjafar- og dómsvaldinu í vasann. Og við sitjum uppi með flokksræði. Hversu langt þarf að ganga þar til hægt er að kalla þetta fasisma?
Fullkomin ræða frá meistara Jóhannesi !!
Er nokkur séns að þú birtir ræðu Atla líka?
taka upp Ameríska kerfið… láta fólkið dæma
Kviðdómendur
„forhert framkvæmdavald, grútmáttlaust Alþingi og rammpólitískt dómsvald.“ Vandamálið í hnotskurn. Fólk er aðeins að vakna varðandi fyrstu tvö atriðin en hvað er hægt að gera við það síðasta?
‘Falið vald’ breytti minni veruleikazýn lika & Jóhannez Björn er zem betur fer enn óþreytandi við að opna augu fólkz fyrir firríngunni.