Föstudagur 12.10.2018 - 12:42 - Rita ummæli

Femínismi eyðir tjáningarfrelsinu

Doktor í lögfræði sér ekkert athugavert við að lektor sé rekinn fyrirvaralaust úr starfi fyrir að tala niður til kvenna á lokaðri fésbókarsíðu. Konur eiga ekki að þurfa að sitja í tíma eða taka próf hjá slíkum mönnum. Stundum held ég að því lengur sem menn eru í námi því meira eru þeir úti á þekju. Annar sérfræðingur að sunnan, vinkona mín, Helga Vala Helgadóttir, er sama sinnis.

Með sömu rökum getum við karlarnir ekki setið í tíma í kynjafræðum sem ganga beinlínis út á að við höfum alla tíð kúgað konur, andlega og líkamlega og gerum enn. Við sjálfstæðismenn eigum ekki að þurfa að vera í tíma hjá Stefáni Ólafssyni og kommarnir ekki hjá Hannesi Hólmsteini. Held að það sé rétt að reka þá báða strax og jafnvel velflesta kennara í félagsvísindadeild.

Þessi blessaði femínismi er ekki bara að eyða allri kímnigáfu þjóðarinnar heldur einnig tjáningarfrelsinu. Í hinni pólitísku rétthugsun virkar tjáningar-og skoðanafrelsi bara í eina átt. Ég mun kannski leggja til við endurskoðun stjórnarskrárinnar að tjáningarfrelsisákvæðið verði aflagt og Rannsóknarstofnun í kynjafræðum verði falið að úrskurða hvað megi segja og ákveði refsingar brjóti menn af sér.

Flokkar: Blogg

Fimmtudagur 13.9.2018 - 10:07 - Rita ummæli

Blóðnasir úr leiðindum

Hugsa að það hefði verið heldur skárra að sitja í gæsluvarðhaldi í einangrun en að afplána ræður stjórnarandstæðinga í þinginu í gærkvöldi um stefnuræðu forsætisráðherra. Efast um að nokkur hafi skilið ræður Píratanna, ekki einu sinni þau sjálf. Ræðumenn Samfylkingarinnar slógu eigið Íslandsmet í lýðskrumi, tvískinnungi og útúrsnúningi. Eins mikið og mér finnst vænt um Flokk fólksins hefði verið gaman að heyra eitthvað nýtt þar. En auðvitað er góð vísa aldrei of oft kveðin.

Þeir sem hyggjast hlusta á ræðurnar á netinu ættu að hafa þurrku við hendina. Þekkt er að menn geti fengið blóðnasir úr leiðindum.

Flokkar: Blogg

Miðvikudagur 25.7.2018 - 16:06 - Rita ummæli

Gáfaða fólkið

Til er talsvert af gáfuðu fólki. Góðmennskan einkennir það í ræðu og riti og það er til í hvað sem er í þeim efnum á kostnað annarra. Það er mjög alþjóðasinnað enda öll þjóðhyggja merki um heimsku. Þess vegna voru það bara ómenntaður skríll og heilabiluð gamalmenni sem kusu með Brexit. Alþjóðahyggjan er slík að þeir sem ekki vildu að skattgreiðendur borguðu skuldir einkaaðila við útlendinga í hruninu voru illa innrættir og siðlausir. Gott ef það flokkast ekki sem útlendingahatur.

Þeir sem eru annarrar skoðunar eru ekki bara fávitar heldur að auki öfgafullir. Þess vegna skiptir tjáningarfrelsi þess sjálfs miklu máli en hefta þarf frelsi annarra. Það sem einkennir gáfað fólk er að það hefur meiri tilfinningu fyrir réttlæti og sanngirni en aðrir. Þess vegna hefur það kannski þessa ríku þörf fyrir að stjórna og leiðbeina öðrum í hvívetna

Gáfaða fólkið er misgáfað. Þeir allra gáfuðustu eru gjarnan rithöfundar eða álitsgjafar nema hvorttveggja sé og flestir fæddir kringum 1960. Svo hefur Háskóli Íslands tekið að sér að fóstra nokkra sérstaklega gáfaða menn. En einhverra hluta vegna hefur gáfaða fólkið iðulega rangt fyrir sér þegar rýnt er í söguna. Kannski er að ekki eins gáfað og við höldum.

Flokkar: Blogg

Þriðjudagur 24.7.2018 - 10:48 - Rita ummæli

Fasisminn er rétttrúnaðurinn holdi klæddur

Svo lengi sem elstu menn muna hafa vinstri menn gjarnan kallað pólitíska andstæðinga sína fasista og rasista, jafnvel þótt frægastir í þeim hópi væru grjótharðir sósíalistar. Fasismi er stjórnlyndisstefna þar sem réttur einstaklingsins er lítill sem enginn gagnvart stjórnvöldum. Fasisminn er rétttrúnaðurinn holdi klæddur. Hann er því miklu tengdari marxismanum, sem sósíalistar horfa til, en hægri stefnu, hvað þá öfgahægristefnu.

Mjög athyglisvert að fylgjast með uppákomum og umræðunni í kjölfar heimsóknar forseta danska þingsins, Piu Kjærsgaard. Margir vinstri menn, einkum þeir barnalegustu, útmáluðu Piu sem útlendingahatara og andlit fasismans í evrópu en vissu samt ekkert hver hún var. Það kann að vera að margir vinstri menn telji rétt að ríki eigi að vera opin gestum og gangandi með litlum eða engum takmörkunum. Margir í Danmörku og víðar telja ekki hjá því komist að herða innflytjendalöggjöfina eftir lausatök síðustu áratugina. Sú afstaða hefur ekkert með hatur á útlendingum að gera. Ekkert í stefnu danska þjóðarflokksins eða málflutningi Piu bendir til slíks haturs. Danski þjóðarflokkurinn er dæmigerður félagshyggjuflokkur sem setur velferðarmál í forgang, einkum málefni aldraðra og öryrkja.

Svo er auðvitað til fólk sem hatar þá sem eru ósammála þeim. Vill helst að skoðanir þeirra verði gerðar refsiverðar og reka þá úr vinnu og helst úr samfélaginu. Það hljómar soldið fasískt.

Flokkar: Blogg

Fimmtudagur 24.5.2018 - 12:59 - Rita ummæli

Orðlaus

Gamall félagi minn, sem hefur verið meira til vinstri í tilverunni, lagði leið á lykkju sína til að segja mér að hann ætlaði að kjósa einhvern af meirihlutaflokkunum í Reykjavík. En erum við ekki sammála um að mælikvarði á góða stjórn í sveitarfélagi er hvað við fáum mikla og góða þjónustu fyrir peninginn, spurði ég.

Hann hélt það nú.

Af hverju er grunnþjónusta lakari í Reykjavík en nágrannasveitarfélögunum, umhirða og þrif í lamasessi nema rétt fyrir kosningar, skuldsetning borgarinnar á hvern íbúa meiri, lítið framboð á lóðum sem leiðir til hækkandi íbúðaverðs, komumst ekki milli hverfa með góðu móti og allt gerist það á sama tíma og gjöldin á borgarbúa er hærra en annars staðar?

Ekki stóð á svari hjá félaganum. Jú, það er ríksstjórnunum frá 2013 að kenna.

Ég átti auðvitað ekkert svar við þessu.

Flokkar: Blogg

Mánudagur 14.5.2018 - 10:59 - Rita ummæli

Hvar værum við stödd ef við hefðum ekki Semu Erlu?

Skrapp í stutta ferð til Skotlands um helgina með gömlum félögum. Margir af þeim eru miklir heimsborgarar og taldir með gáfuðustu mönnum landsins. Samt skildu þeir ekkert í því af hverju ekki var í boði nautakjöt á indverska veitingastaðnum í Carnoustie.

Skrítið að koma heim í faðm froðufellandi andfasistana yfir sigri ungrar gyðingastúlku frá Ísrael í júróvisjón sönglagakeppninni. Hvar værum við stödd ef við hefðum ekki Semu Erlu og aðra vinstri menn til að leiðbeina okkur í baráttunni gegn fasisma og rasisma? Hver yrði refsingin í fasista- og rasistalausu samfélagi Semu Erlu fyrir að panta nautakjöt á indverskum veitingastað? Geta menn borið fyrir sig fávisku eða gleymsku eða jafnvel að hafa ekki verið allsgáðir. Hlýtur að vera því íslensku andfasistarnir eru svo umburðarlyndir og lausir við ofstæki.

Flokkar: Blogg

Þriðjudagur 17.4.2018 - 11:28 - Lokað fyrir ummæli

Grímulaus pólitík

Enginn skortur er á alls konar alþjóðlegum stofnunum og samtökum sem kenna sig við mannréttindi og hvers kyns góðmennsku. Dæmi um slík fyrirbæri er Evrópuráðið og nefndir þess eins og ECRI og GRECO og svo má auðvitað ekki gleyma ýmsum nefndum Sameinuðu þjóðanna. Margir halda að hér sé um að ræða einhverjar hlutlausar nefndir skipuðu fagfólki, sem geti leiðbeint okkur. Það er mikill misskilningur. Þarna er pólitíkin allsráðandi þótt hún sé sveipuð skikkju hlutleysis, fræða og vísinda.

Raunveruleikinn er sá við höfum skapað forréttindastétt á himinháum launum sem er í engum tengslum við almenning, sem þó borgar brúsann. Svo eru einnig til frjáls félagasamtök víða um heim fjármögnuð af skattfé að mestu þar sem rekin er grímulaus pólitík. Þau gera þó eitthvert gagn með ýmis konar hjálparstarfi þannig að endurgjaldið er eitthvert.

Flokkar: Blogg

Mánudagur 9.4.2018 - 09:20 - Lokað fyrir ummæli

RÚV er tímaskekkja

Í Evrópu eru menn að átta sig á hversu mikil tímaskekkja ríkisreknir ljósvaka- og netmiðlar eru. Og ekki bara timaskekkja heldur fullkomlega óeðlilegt út frá jafnræðis-og samkeppnissjónarmiðum. Eins og oft áður eru Danir fyrstir að rakna úr rotinu.

Á Íslandi eru menningar- og öryggisrökin fyrir tilvist RÚV úr sér gengin sem og rökin fyrir aðgengi allra að ljósvakamiðlum. Kannski að hollvinir RÚV reyni að beita lýðheilsusjónarmiðum eins og við hollvinir ÁTVR gerum fyrir einkasölu ríkisins á áfengi.

Eftir stendur að sumir skattgreiðendur þurfa að punga út á fimmta milljarð árlega í óþarfa. Við, sem höfum áhuga á að dreifa peningum annarra eftir eigin geðþótta, getum hugsað okkur betri nýtingu á þessu fé. Auk þess tekur ríkismiðillinn lungan af auglýsingatekjum, sem gerir frjálsa fjölmiðlun nær ómögulega. Röknum úr rotinu þótt ekki verði tekin nema lítil skref í byrjun.

Flokkar: Blogg

Fimmtudagur 5.4.2018 - 16:00 - Lokað fyrir ummæli

Dröslaði bróður mínum í kirkju

Bróðir minn, þekktur sem „okkar maður“, hefur skrifað nokkrar færslur á fésbókina um samveru okkar hér á Spáni. Frásagnir af sundafrekum og kraftgöngum hans og báglegu ástandi mínu eru með öllu ósannar. Okkar maður hefur ekki gengið lengra en til sprúttsalans úti á horni. Gangan tekur hálftíma hjá honum, sem mun vera heimsmet í hægagangi. Náði þó að drösla honum í dag í kirkju en þurfti áður að hafa talsvert fyrir því að fela á honum hornin og halann.

Flokkar: Blogg

Sunnudagur 25.3.2018 - 23:34 - Lokað fyrir ummæli

Lokað fyrir ræðuhöld

Utanríkisráðherra, Guðlaugur Þór, bauð vinum og vandamönnum til veislu í gær í tilefni af fimmtugsafmæli sínu, sem var að vísu fyrir mörgum mánuðum síðan.

Mér sýndist þar nær eingöngu mæta vandamenn. Fram komu skemmtikraftar á heimsmælikvarða og fluttar ræður þar sem reynt var eftir fremsta megni að hæla afmælisbarninu.

Þegar kom að stjórnarmönnum Fýlupúkafélagsins, sennilega hans einu vinum, að halda ræðu, var skyndilega lokað fyrir frekari ræðuhöld.

Menn hafa lagt fram vantrauststillögu á ráðherra af minna tilefni.

Flokkar: Blogg

Höfundur

Brynjar Níelsson
Hæstaréttarlögmaður. Alþingismaður Sjálfstæðisflokksins.
RSS straumur: RSS straumur

Nýlegar athugasemdir

    Flokkar