Ég á til að ganga út frá því að góð þjónusta sé sjálfsögð. Og finnst þá mjög gremjulegt ef hún stendur ekki undir væntingum. En stundum fær maður líka betri þjónustu en maður reiknaði með.

Ég bjóst ekki sérstaklega við því að fá framúrskarandi þjónustu hjá Fríhöfninni í Leifsstöð. Við keyptum þar vörur á leið til Skotlands um síðustu mánaðamót en skildum þær eftir á afgreiðsluborðinu.  Þegar ég áttaði mig á því hafði ég samband við Fríhöfnina í mjög veikri von um að afgreiðslumaðurinn hefði tekið þær frá og geymt þær.  Mér varð að ósk minni og vörurnar voru endurgreiddar um leið og ég var búin að senda mynd af kvittun og kortanótu.

Þakka hér með afgreiðslumanninum sem tók vörurnar frá og konunni sem ég talaði við fyrir sérstök liðlegheit.

Jón Baldvin Hannibalsson segist hafa fengið þá skýringu á afturköllun boðs um að halda gestafyrirlestra við HÍ að svokallaðir „kynjafræðingar“ hafi mótmælt ráðningu hans skriflega. Ég bað forseta félagsvísindasviðs um afrit af þessu mótmælabréfi en fékk það svar að hann vissi ekki til þess að slíkt plagg væri til.

Nú er ljóst að einhver lýgur. Lugu samstarfsmenn JBH upp þessu mótmælabréfi og ef svo er, hversvegna voru þeir að því? Lýgur Jón Baldvin þegar hann segist hafa fengið þessar skýringar? Eða lýgur Daði Már Kristófersson, forseti félagsvísindasviðs, að mér þegar hann neitar því að þetta bréf sé til?

Annars er púkinn á mínum fjósbita í ágætu skapi þessa stundina. Ef það er satt sem Jón Baldvin segir, þá hafa samstarfsmenn hans afsakað sig með því að þeir hafi ekkert ætlað að reka hann en hún Þorgerður hafi orðið brjáluð og þeir orðið hræddir við hana og ekki þorað annað en  að hlýða. Einhverntíma hefði það nú ekki þótt karlmannlegt að skýla sér á bak við ótta sinn við reiði kvenna. Það er út af fyrir sig ágætt að þessir þvælukjóar viðurkenni fyrir JBH að þeir hafi orðið hræddir. En það er kannski einum of niðurlægjandi að viðurkenna það opinberlega?

Eða er JBH að ljúga? Ef svo er þá hlýtur það að vera satt sem Daði Már segir hér, að hann og aðrir sem bera ábyrgð á þessari ákvörðun hafi tekið tillit til sjónarmiða sem koma fram í bréfi Hildar Lilliendahl og Helgu Þóreyjar Jónsdóttur. Þeir hafa þá ekki beygt sig fyrir hinum akademíska armi tiltekins pólitísks þrýsithóps, heldur bara konum úti í bæ.

Kannski finnst Daða Má skömminni virðulegra að vera hræddur við almenningsálitið en að hanga í pilsfaldi falsvisindakvenna? Við Daði erum þá að minnsta kosti sammála um það.

Fegurðardrottning segist vera feministi. Einhverntíma sagðist Magga pjattrófa líka vera feministi. Ég hef lesið viðtöl við kynlífsþjóna sem segjast vera feministar. Þessar konur telja sig hafa sama rétt og karlar, vilja standa körlum jafnfætis og telja sig standa körlum jafnfætis, ekki þrátt fyrir lífsstíl sinn heldur vegna hans. Ef feministar hefðu ekki stolið hugtakinu gæti ég kallað mig feminista á sömu forsendum.

Valdefling er orð sem feministum er hugleikið. Hugmyndin er sú að konur hafi þörf fyrir sjálfsstyrkingu vegna kynferðis síns. Ég held að það eigi við um margt fólk af báðum kynjum að þurfa á valdeflingu að halda og krossa fingur fyrir hvern þann einstakling sem með heiðarlegum aðferðum bætir sjálfsmynd sína og skapar sér aðstæður til þess að njóta góðs af styrkleikum sínum. Mér þykja fegurðarsamkeppnir „hálfglataðar“ en ef þær eru valdeflandi fyrir einhverja aðra þá er það bara hið besta mál, það er enginn sem neyðir mig til að horfa á þær.

Feministar vilja hinsvegar fá að gefa út einhverskonar fyrirmæli um það hvað skuli teljast valdeflandi. Það skal teljast valdeflandi að brjótast til frama í stjórnmálum eða innan stórfyrirtækis. Það skal hinsvegar ekki teljast valdeflandi fyrir konu að vera á framfæri maka síns við að gera það sem henni bara sýnist. Það á að vera valdeflandi að gefa skít í hugmyndir samfélagsins um að offita sé óæskileg. Það má aftur á móti ekki teljast valdeflandi að vekja aðdáun fyrir það útlit sem tískubransinn gerir út á. Það á að vera valdeflandi að skilgreina það sem nauðgun ef kona vaknar í vitlausu rúmi eftir hrottalegt fyllerí. Það má hinsvegar ekki teljast valdeflandi að fara heim með tuttuguþúsundkall í vasanum og gleyma gaurnum.

Þetta er ein af ástæðunum fyrir því að við ættum að hafna feminisma. Hann er ekkert annað en eitt kennivaldið enn.

33 ástæður til að uppræta feminisma
1. Við þurfum ekki feminisma til að tryggja jafnrétti
2. Grundvöllur feminismans er lygi
3. Feminismi notar lygar í áróðursskyni
4. Feminisminn lítur á karlmenn sem illmenni
5. Feminisminn lítur á konur sem fórnarlömb
6.  Feminismi firrir konur ábyrgð
7.  Feminisminn er í stöðugri mótsögn við sjálfan sig
8. Feminismi skaðar konur í kynlífsiðnaði
9.  Feministar takmarka sjálfsákvörðunarrétt kvenna
10.  Feminisk áhrif veikja réttaröryggi sakborninga
11. Feministar nota háskóla til að breiða út gervivísindi
12. Feminismi er ríkisstyrkt valdanet
13.  Feministar vilja fá að stunda trúboð í skólum
14.  Feminismi leggur kynhlutverk að jöfnu við kvennakúgun
15. Feminismi er kvennamenningu fjandsamlegur
16. Feminismi er nýhreintrúarstefna
17. Feministar vilja ákveða normin í kynferðismálum
18. Feminismi er að festa sig í sessi sem kennivald
19. Feminismi vinnur gegn kvenréttindum
20. Feminismi er dólgapólitík
21. Feminismi er hugsjónastríð
22. Feministar sinna þjónustu sem ætti að vera í höndum fagfólks
23. Feminismi er fasísk hugmyndafræði
24. Feministar hafa ranghugmyndir um norm samfélagsins
25. Feminismi einkennist af pólitískum rétttrúnaði
26. Feministar rangtúlka listaverk í áróðursskyni
27. Feministar eru með klám á heilanum
28. Feministar vilja ráða því hvað skuli teljast valdeflandi
29. Feministar ýkja tölur um kynbundinn launamun
30 Feministar styðja kynbundna mismunun
31 Feminismi vinnur gegn lýðheilsumarkmiðum
32 Feminismi nærir sorpblaðamennsku
33 Feministar hafa eyðilagt hugtakið feminismi

Í íslensku eru til nokkur orð þar sem fólki sem sýnir neikvæða hegðun er líkt við einhverskonar poka eða ílát.

Væluskjóða, grenjuskjóða, klöguskjóða,
fýlupoki,
frekjudós, frekjudolla, frekjutuðra,
sorabelgur (einnig nautnabelgur en það er nú kannski ekki beinlínis neikvætt)

Kannski er tengt þessu orðatiltækið að fá á baukinn? Baukur er þá kjaftur og hugmyndin líklega sú að hann sé fullur af óæskilegum orðum.

Og er það tilviljun að til eru þetta mörg orð sem fela í sér þá hugmynd að neikvæð hegðun sé ekki karakter heldur kannski frekar eins og manneskjan sé hýsill fyrir frekju, fýlu og grenjur? (eða bara eina grenj.)

Eru til fleiri orð af þessu tagi?

——

Uppfært:

Mér var bent á að baukurinn væri sennilega tengdur „beak“ í ensku, þ.e. fuglsgoggur.  Annar lesandi benti á að þar fyrir gæti vel verið að hugmyndin um kjaft sem ílát stæðist.

Fleiri orð af þessu tagi sem lesendur hafa bent á:

Kjaftaskur, frekjudallur,  bullustampur, drullusokkur, ólátabelgur, kjánabelgur, vindbelgur.

Í þessari viku gekk fram af mér. Tvisvar. Fyrst þegar ég sá því haldið fram, í langri umfjöllun Nýs lífs um upplifun Guðnýjar Rósar Vilhjálmsdóttur af Agli Einarssyni og Guðríði Jónsdóttur, að aðeins önnur hlið málsins (þ.e. hlið Egils) hefði komið fram. Svo gekk aftur fram af mér þegar ég sá Knúsgrein þar sem látið var að því liggja að gagnrýni á vinnubrögð Háskólans í máli Jóns Baldvins Hannibalssonar væri þáttur í þöggun um kynferðisbrot. Sannleikurinn er sá að það ríkir engin þöggun um kynferðisbrot á Íslandi í dag, þvert á móti er samfélagið með nauðganir á heilanum og fjölmiðlar bregðast svo sannarlega við. Ef engar ferskar nauðganir eru í boði þá eru bara dregin upp eldgömul mál eða fluttar fréttir af nauðgunum í fjarlægum heimshlutum sem fjölmiðlar sýna annars engan áhuga.

Þöggunartaktík feminista

Eitt af því sem gerir umræðuna um kynferðisbrot erfiða er sú strategía feminista að ásaka þá sem andmæla þeim um kvenhatur, stuðning við nauðgara og það að taka kynferðisofbeldi ekki alvarlega. Mörgum finnst mjög óþægilegt að sitja undir slíku og hætta sér því ekki í umræðuna. Í gær svaraði ég  háðspistli Knússins um meinta þöggun kynferðisofbeldis með háði og benti þar með á að þessi þöggunarkenning stenst ekki skoðun. Að sjálfsögðu var ég í kjölfarið sökuð um árásir á brotaþola kynferðisofbeldis. Þetta er auðvitað ekkert annað en þöggunartaktík, svo írónískt sem það nú er. Ég hef aldrei sagt eða gefið til kynna að ekki eigi að fjalla um kynferðisbrot. Ég hef hinsvegar bent á að þögnin um þau hefur ekki bara verið rofin heldur er samfélagið nánast heltekið af áhuga á kynferðisofbeldi og stundum virðist umfjöllunin þjóna pólitíkskum tilgangi fremur en að vera upplýsandi.  Hvaða tilgangi ætli það eigi að þjóna að halda á lofti þeirri hugmynd að mikil þöggun ríki um þennan málaflokk?

Umfjöllun um mál Egils Einarssonar hefur ekki verið einhliða

Sú hugmynd að umfjöllunin um  mál Guðnýjar Rósar Vilhjálmsdóttur gegn Agli Einarssyni og Guðríði Jónsdóttur hafi hingað til verið einhliða, þeim í hag, stenst heldur ekki skoðun. Ég reikna fastlega með því að verða ásökuð um árásir á Guðnýju Rós með því að tala um það. Bí mæ gjest, þöggunartaktík af því tagi bítur ekki á mig.

Ég tók saman nokkra tengla á fréttir og pistlaskrif um þetta mál. Ég fann vissulega varnarræður Egils, undarlegar hugmyndir Sveins Andra um feminiskt samsæri, ósmekklega bloggfærslu Guðbergs Bergssonar og fleiri umfjallanir þar sem tekin er skýr afstaða með Agli. Tenglarnir  hér fyrir neðan vísa þó á fréttir og pistla sem fáir myndu telja Agli hagstæða og meðal þeirra lentu margir í efsta sæti yfir vinsælustu fréttirnar á netmiðlunum.

Þetta er langt frá því að vera tæmandi listi yfir umfjöllun þar sem samúðin er öll með stúlkunni en ég læt þetta nægja í bili. Hvað þarf eiginlega margar fréttir og greinar þar sem maður sem hefur verið kærður fyrir kynferðisbrot (en ekki sakfelldur) er fordæmdur, og/eða gengið út frá sekt hans, til þess að umfjöllunin teljist ekki einhliða og meiðandi fyrir kærandann?

————-

Nokkrir tenglar á fjölmiðlaumfjöllun sem seint getur talist Agli Einarssyni í hag

http://www.visir.is/par-kaert-fyrir-naudgun—segir-kaerustuna-hafa-horft-upp-a-ofbeldid/article/2011111209735
http://www.dv.is/frettir/2011/12/2/ung-kona-kaerir-par-fyrir-naudgun/
http://www.dv.is/frettir/2011/11/30/meint-naudgun-eftir-gledskap-hja-fm957/
http://www.dv.is/frettir/2011/12/2/kaerir-gillz-fyrir-naudgun-var-i-einkathjalfun-hja-honum/
http://www.dv.is/frettir/2011/12/3/vinkona-fylgdi-stulkunni-neydarmottoku-hun-var-i-algjoru-rusli-titradi-og-skalf/
http://www.dv.is/frettir/2011/12/5/vid-gretum-med-henni/
http://eyjan.pressan.is/frettir/2011/12/05/vinkonur-fylgdu-stulkunni-a-neydarmottoku-hun-sagdist-hafa-sagt-nei-thad-a-lika-ad-vera-nog/
http://blogg.smugan.is/drifa/2011/12/02/eg-heimta-opinbera-kaeru/
http://www.visir.is/drifa-snaedal–hrosar-stulkunni-sem-kaerdi-gillz-fyrir-hugrekki/article/2011111209713
http://www.dv.is/frettir/2011/12/2/varla-haegt-ad-finna-meira-valdamisraemi/
http://eldlinan.blog.is/blog/eldlinan/entry/1209724/
http://smugan.is/2011/12/eru-thetta-mannasidir-gillz/
http://www.dv.is/frettir/2011/12/4/nu-fylkja-lidi-fylgdarmenn-gillz-naudgunarbrandarakarls-lidi/
http://smugan.is/2011/12/baneitrad-ped/
http://eyjan.pressan.is/frettir/2011/12/04/feministar-saklaus-uns-sekt-er-sonnud-er-ofnotad-slagord-peningar-og-vold-karla-rada-enn-for/
http://www.dv.is/blogg/iris-erlingsdottir/2011/12/7/vond-vid-gillz/
http://www.dv.is/blogg/svarthofdi/2011/12/13/heykvislarnar-kljufa-loftid/
http://www.dv.is/frettir/2012/1/29/egill-velur-ad-leika-fornarlamb/
http://www.visir.is/borgarfulltrui-vill-ad-rikissaksoknari-gefi-ut-akaeru-i-gillz-malinu/article/2012120118950
http://www.dv.is/blogg/ding/2012/12/2/thetta-med-gillzenegger/
http://www.eyjafrettir.is/frettir/2013/07/16/vilja_ekki_gilz_a_hukkaraball/
http://www.dv.is/frettir/2013/7/15/motmaela-thvi-ad-egill-styri-hukkaraballinu/
http://www.pressan.is/Frettir/Lesafrett/thetta-er-fokking-strid—gillz-thu-verdur-drepinn—nafnlausir-rottaeklingar-senda-gillz-toninn

Í íslenskum fjölmiðlum er tilfinnanlegur skortur á nauðgunarfréttum. Að vísu fann ég nokkrar fréttir frá síðustu dögum en margar þeirra eru frekar litlar og lítið áberandi. Auk þess er ekki alveg að marka síðustu vikuna því margar af klámfréttum síðustu viku snúast eiginlega meira um dónakalla og háskóla en um glæpi dónakalla.  Frá mánaðamótum hef ég t.d. ekki rekist á nema eina opnuumfjöllun um nauðganir í DV, eina fimm síðna í Kjarnanum og  eina þrettánsíðna í Nýju lífi.

Nauðsynlegt er að rjúfa þessa ærandi þögn um kynferðisofbeldi. Því ættu íslenskir fjölmiðlar að setja sér það markmið að gefa aldrei út blað nema hafa minnst eina opnuumfjöllun um nauðganir og dónakalla.

Ég er komin til Glasgow eftir 9 vikna dvöl á Íslandi.  Eins og ég sagði hér trúi ég því ekki að óreyndu að verðlag á matvöru sé sérstaklega lágt á Íslandi. Ég ákvað því að gera smá könnun.

Ef verðlagskönnun ætti að vera áreiðanleg þyrftu fleiri heimili með fjölbreytilegri innkaupakörfur að taka þátt. Einnig þyrfti að skoða verðlag á báðum stöðum í einu því verð á sumum vörum getur auðvitað verið árstíðabundið.  Ég get því ekki fullyrt neitt um almennan verðmun en markmiðið er að gera mér grein fyrir því hvort er hagstæðara að reka heimili með mínu neyslumynstri á Íslandi eða í Skotlandi. Og kannski eru einhverjir í hópi lesenda sem kaupa samskonar vörur og við.

Ég geymdi alla kassastrimla í sumar og reiknaði út meðalverðið á þeim vörum sem við keyptum. Sumt keyptum við bara einu sinni eða tvisvar svo þar getur vel verið stór skekkja en aðrar vörur keyptum við daglega. Við keyptum oftast sambærilegar vörur við þær sem við kaupum hér í Skotlandi. Við erum búin að versla einu sinni síðan við komum heim og svona lítur sú innkaupakarfa út:

Það kom mér á óvart hvað sítrónur og læm eru miklu ódýrari á Íslandi en í Skotlandi. Við keyptum þessa ávexti oft í sumar og á mörgum stöðum svo það hefur ekki bara verið einstök heppni.

Vörumerkin eru ekki þau sömu en þetta eru að mestu leyti sambærilegar vörur. Við kaupum að vísu jógúrt hér en á Íslandi keyptum við abmjólk og súrmjólk. Ég sá jógúrt á 360 kr lítrann á á Íslandi en það getur vel hafa verið óvenju hátt eða lágt verð. Við keyptum nokkrar tegundir af íslenskum brauðostum í sumar og einnig cheddarost þann sama og við kaupum venjulega hér.

Gulræturnar voru á tilboði í dag.  „Venjulegt“ verð er 188 kr/kg en þær eru mjög oft á tilboði. Ég borða kynstrin öll af gulrótum og fæ þær oftast á tæpar 150 kr. Beikon keypti ég ekki á Íslandi en reiknaði verðið samkvæmt þessari síðu.

Ég veit ekki hvað egg frá stóru búunum kosta á Íslandi og játa hér með syndir mínar; þessi ódýru sem við keyptum núna eru ill verksmiðjuegg úr óhamingjusömum hænum. Pekanflétturnar voru á tilboði. Venjulega eru þær bara tvær á þessu verði en það er alltaf eitthvert bakkelsi hjá Morrisons á svipuðu verði, þ.e. þrjú stykki á bilinu 188-210 kr. Ég er ekki með verðið á pekanfléttum á Íslandi á hreinu en algengt verð á sætabrauði er 300-400 kr á stykkið eða þrefalt hærra en hér. Ég fann þetta tilboð á netinuog tel vel sloppið að borga 205 kr fyrir þrjú stykki þegar eitt stykki á Íslandi er á 200 kall. En kannski eru einhver bakarí sem bjóða betur.

Innkaupakarfan okkar var 1174 krónum ódýrari hjá Morrisons en á Íslandi í dag ef við reiknum ekki með þeim vörum sem ég hef ekki verðið á. Ég ætla ekki að draga of miklar ályktanir af þessum eina degi. Síðar munum við kaupa kjöt, mjöl, hreinlætisvörur og annað sem vantaði ekki í þetta sinn og þá ætla ég að bera verðið á þeim vörum saman líka.

Þess má geta að grænmeti er alltaf ferskt í þeim búðum sem við verslum við í Glasgow og íslenskir ostar eru töluvert lakari að gæðum en þeir bresku.

Ætli sé til ein manneskja í veröldinni sem hefur náð tvítugu án þess að þjást af völdum annarra? Ætli sé til ein manneskja í veröldinni sem hefur náð tvítugu án þess að valda öðrum þjáningum?

Jón Baldvin Hannibalsson olli stúlku þjáningum. Hann skrifaði henni dónabréf, barnungri, og eyðilagði þar með líf hennar. Áfallaþol fólks er mismunandi; sumir standa af sér styrjaldir með tilheyrandi blóðbaði, sumir missa heimili sín og fjölskyldur í náttúruhamförum, sumir ganga gegnum pólitískar ofsóknir, morðtilræði, pyntingar, hrottalegar nauðganir, krabbamein, eldsvoða… Sumir fá dónabréf. Það hljómar kannski ekki alvarlega í eyrum þess sem aldrei hefur fengið dónabréf en það er náttúrulega upplifun fórnarlambsins sem skiptir máli.

Á einhvern dularfullan hátt hefur svo dónaskapurinn í karlinum fært Hildi Lilliendahl vald til þess að stjórna því hverjir fá að halda gestafyrirlestra við Háskóla Íslands.  Rök Hildar og félaga fyrir því að JBH megi ekki kenna við háskóla eru þau að það geti valdið fórnarlömbum kynferðisofbeldis sársauka að sitja í tímum hjá honum. Með þeim rökum ætti auðvitað að reka alla háskólakennara sem og alla stúdenta sem líklegt er að einhver nemandi við skólann gæti átt erfitt með að umgangast. Í alvöru; ef þetta eru rökin, þá mætti ekki hleypa Agli Einarssyni í háskólanám. Snorri í Betel mætti ekki vinna við afgreiðslu í Þjóðarbókhlöðunni og Ólafur F. Magnússon mætti ekki vinna í Hámu.

Hlutverk háskóla er að afla þekkingar og koma henni á framfæri. Háskólar eru ekki uppeldisstofnanir. Hlutverk þeirra er ekki að vernda nemendur gegn sásaukanum af því að vera samvistum við ódáma. Mér finnst afar ótrúlegt að stefna HÍ sé sú að skapa stúdentum svo sterílt umhverfi að þeir eigi aldrei á hættu að þurfa að umgangast fólk sem vekur þeim vondar tilfinningar og því spurði ég Daða Má Kristófersson, forseta félagsvísindasviðs út í rökin fyrir því að vísa manninum frá verkefni sem þegar var ákveðið að hann tæki við. Ég fékk þau svör að ósætti um kennara gæti „skaðað hagsmuni nemenda“.  M.ö.o. það skaðar hagsmuni stúdenta við HÍ ef feministar tuða á netinu. Ég hef óskað eftir nánari skýringum.

Í alvöru talað, hverskonar eiginlega þvæla er þetta? Er dómstóll götunnar ekki bara einfær um að ofsækja dónakalla? Þarf Háskóli Íslands virkilega að beygja sig undir kennivald kvenhyggjunnar?  Finnst forsvarsmönnum HÍ virkilega við hæfi að skólinn taki þátt í því að útskúfa manni, sem er fullkomlega hæfur til að sinna kennslu á sínu sviði, vegna gamals hneykslis sem kemur faglegri hæfni hans ekkert við? Ef svo er þá er akademískt frelsi háskólafólks í stórkostlegri hættu.