Þriðja ástæðan til þess að uppræta feminisma er sú að feminismi breiðir út hálfsannleika, ýkjur og lygar. Ef ýkjur og rangfærslur eru taldar þjóna málstaðnum þá er það bara talin fín aðferð.

Nýjasta dæmið sem ég hef séð um einmitt þessa tækni er þessi færsla. Tökum sem dæmi ástæðu nr. 6. Hér er fullyrt að 97% nauðgara þurfi aldrei að eyða dagsstund í fangelsi. Þessi tala er algerlega úr lausu lofti gripin enda útilokað að meta það hversu margir þeirra sem ásakaðir eru um nauðgun eru sekir. Það sem við vitum um stöðu þessara mála á Íslandi er hinsvegar þetta:

Með því að smella á myndirnar er hægt að komast inn á gagnatorg Capacent og skoða þetta betur, t.d. hlutfall niðurfellinga og hvernig gröfin fyrir greinar 194-198 líta út.

Eins og sjá má eru sakfellingar miklu fleiri en sýknudómar. Mörgum málum er vísað frá vegna þess að ekki tekst að færa sönnur á þau. Er það kannski þessvegna sem sumir telja að við þörfnumst feminisma? Til þess að mönnum verði refsað án sannana?  Og þetta er ekkert einstakt dæmi. Þeir sem vilja kynna sér þetta nánar geta t.d. skoðað þennan pistil og þennan, og þennan.   Látið mig endilega vita ef þið viljið skoða fleiri gamla pistla, ég á helvítis helling af þeim enda af nógu að taka þegar lygar feminista eru annars vegar.

Stuttar færslur um 33 ástæður til að uppræta femnisma verða birtir jafnt og þétt í sumar. Þessir eru þegar komnir í loftið:

33 ástæður til að uppræta feminisma
1. Við þurfum ekki feminisma til að tryggja jafnrétti
2. Grundvöllur feminismans er lygi
3. Feminismi notar lygar í áróðursskyni
4. Feminisminn lítur á karlmenn sem illmenni
5. Feminisminn lítur á konur sem fórnarlömb
6.  Feminismi firrir konur ábyrgð
7.  Feminisminn er í stöðugri mótsögn við sjálfan sig
8. Feminismi skaðar konur í kynlífsiðnaði
9.  Feministar takmarka sjálfsákvörðunarrétt kvenna
10.  Feminisk áhrif veikja réttaröryggi sakborninga
11. Feministar nota háskóla til að breiða út gervivísindi
12. Feminismi er ríkisstyrkt valdanet
13.  Feministar vilja fá að stunda trúboð í skólum
14.  Feminismi leggur kynhlutverk að jöfnu við kvennakúgun
15. Feminismi er kvennamenningu fjandsamlegur
16. Feminismi er nýhreintrúarstefna
17. Feministar vilja ákveða normin í kynferðismálum
18. Feminismi er að festa sig í sessi sem kennivald
19. Feminismi vinnur gegn kvenréttindum
20. Feminismi er dólgapólitík
21. Feminismi er hugsjónastríð
22. Feministar sinna þjónustu sem ætti að vera í höndum fagfólks
23. Feminismi er fasísk hugmyndafræði
24. Feministar hafa ranghugmyndir um norm samfélagsins
25. Feminismi einkennist af pólitískum rétttrúnaði
26. Feministar rangtúlka listaverk í áróðursskyni
27. Feministar eru með klám á heilanum
28. Feministar vilja ráða því hvað skuli teljast valdeflandi
29. Feministar ýkja tölur um kynbundinn launamun
30 Feministar styðja kynbundna mismunun
31 Feminismi vinnur gegn lýðheilsumarkmiðum
32 Feminismi nærir sorpblaðamennsku
33 Feministar hafa eyðilagt hugtakið feminismi

Önnur ástæða til að uppræta feminisma er sú að feminismi er hugmyndafræði sem grundvallast beinlínis á lygi. Lyginni um feðraveldið. Og nei, feministar taka ekki bara svona til orða, þeir boða í alvöru þá ranghugmynd að lítill munur sé á aðstæðum kvenna í forhertustu harðstjórnarríkjum og á Íslandi.

Til eru samfélög þar sem alvöru feðraveldi ríkir enn í dag. Þar sem konur hafa engan lagalegan rétt til barna sinna, þar sem framburður konu fyrir rétti gildir aðeins til hálfs á við framburð karls. Þar sem kynfæri stúlkubarna eru skorin af þeim með skítugu glerbroti og þær gefnar í hjónabönd áður en þær ná kynþroska. Þar sem konur eru dæmdar í fangelsi fyrir skírlífisbrot, hýddar, grýttar eða jafnvel drepnar af sinni eigin fjölskyldu án afskipta stjórnvalda. Þar sem nauðganafórnarlömb eru grýtt til bana.

Hvergi í hinum vestræna heimi er kynjamismunun lögleg. Hvergi í veröldinni er staða kvenna eins góð og á Íslandi. Þegar vestrænum samfélögum er líkt við feðraveldi er það ósköp einfaldlega lygi.

Ég er ekki að segja að enginn sannleikur finnist í málflutningi feminista en það eru líka sannleikskorn bæði í Kóraninum og Mein Kampf. Við getum vel notað þann sannleika til góðs þótt við höfnum hugmyndakerfi sem byggir á einhverju rugli.

Stuttar færslur um 33 ástæður til að uppræta femnisma verða birtir jafnt og þétt í sumar. Þessir eru þegar komnir í loftið:

33 ástæður til að uppræta feminisma
1. Við þurfum ekki feminisma til að tryggja jafnrétti
2. Grundvöllur feminismans er lygi
3. Feminismi notar lygar í áróðursskyni
4. Feminisminn lítur á karlmenn sem illmenni
5. Feminisminn lítur á konur sem fórnarlömb
6.  Feminismi firrir konur ábyrgð
7.  Feminisminn er í stöðugri mótsögn við sjálfan sig
8. Feminismi skaðar konur í kynlífsiðnaði
9.  Feministar takmarka sjálfsákvörðunarrétt kvenna
10.  Feminisk áhrif veikja réttaröryggi sakborninga
11. Feministar nota háskóla til að breiða út gervivísindi
12. Feminismi er ríkisstyrkt valdanet
13.  Feministar vilja fá að stunda trúboð í skólum
14.  Feminismi leggur kynhlutverk að jöfnu við kvennakúgun
15. Feminismi er kvennamenningu fjandsamlegur
16. Feminismi er nýhreintrúarstefna
17. Feministar vilja ákveða normin í kynferðismálum
18. Feminismi er að festa sig í sessi sem kennivald
19. Feminismi vinnur gegn kvenréttindum
20. Feminismi er dólgapólitík
21. Feminismi er hugsjónastríð
22. Feministar sinna þjónustu sem ætti að vera í höndum fagfólks
23. Feminismi er fasísk hugmyndafræði
24. Feministar hafa ranghugmyndir um norm samfélagsins
25. Feminismi einkennist af pólitískum rétttrúnaði
26. Feministar rangtúlka listaverk í áróðursskyni
27. Feministar eru með klám á heilanum
28. Feministar vilja ráða því hvað skuli teljast valdeflandi
29. Feministar ýkja tölur um kynbundinn launamun
30 Feministar styðja kynbundna mismunun
31 Feminismi vinnur gegn lýðheilsumarkmiðum
32 Feminismi nærir sorpblaðamennsku
33 Feministar hafa eyðilagt hugtakið feminismi

Og nú er ég búin að lesa fullt af fréttum sem skipta máli og get haldið áfram þar sem frá var horfið.

Fyrsta og augljósasta ástæðan fyrir því að við ættum að uppræta feminisma er sú að við höfum ekkert með hann að gera. Ekki frekar en við höfum neitt með það að gera að hafa þrjá reykskynjara í eldhúsinu. Við erum með ágætt brunavarnakerfi sem kallast mannréttindastefna. Ofhlæði af lélegum, ofnæmum reykskynjurum sem vara við eldsvoða í hvert sinn sem einhver ristar brauð, hjálpar ekki til og getur valdið skaða. Og það er eins með feminismann.

Það er engin þörf fyrir feminisma í okkar heimshluta. Við þurfum jafnréttisstefnu að sjálfsögðu en ekki feminisma. Í  þriðja heiminum er þörf fyrir kvenfrelsisstefnu en ekki hina vestrænu klámfóbíuhreyfingu.

Og plís hlífið mér við kosningaréttarrökunum því ofnæmisviðbrögð mín gagnvart þeim eru orðin svo sterk að ég bara æli. Þótt íslenskar konur hafi ekki fengið kosningarétt fyrr en heilum 5 árum síðar en meirihluti íslenskra karla  (og reyndar fengu fátækir karlar ekki kosningarétt fyrr en konur fengu hann, fram til 1915 voru það ekki „karlar“ sem höfðu kosningarétt heldur fjárhagslega sjálfstæðir karlar) þá þýðir það ekki að við þurfum að sitja undir endalausu bulli um að íslenskar konur búi við feðraveldi. Auk þess var barátta kvenna fyrir kosningarétti fyrst og fremst hagsmunabarátta efri stéttanna. Suffragetturnar voru engir sósíalistar, þær voru flestar hægri sinnaðar menntakonur úr efri millistétt.

Við þurfum ekki feminisma til að tryggja jafnrétti.

———–
Stuttar færslur um 33 ástæður til að uppræta femnisma verða birtir jafnt og þétt í sumar. Þessir eru þegar komnir í loftið:

33 ástæður til að uppræta feminisma
1. Við þurfum ekki feminisma til að tryggja jafnrétti
2. Grundvöllur feminismans er lygi
3. Feminismi notar lygar í áróðursskyni
4. Feminisminn lítur á karlmenn sem illmenni
5. Feminisminn lítur á konur sem fórnarlömb
6.  Feminismi firrir konur ábyrgð
7.  Feminisminn er í stöðugri mótsögn við sjálfan sig
8. Feminismi skaðar konur í kynlífsiðnaði
9.  Feministar takmarka sjálfsákvörðunarrétt kvenna
10.  Feminisk áhrif veikja réttaröryggi sakborninga
11. Feministar nota háskóla til að breiða út gervivísindi
12. Feminismi er ríkisstyrkt valdanet
13.  Feministar vilja fá að stunda trúboð í skólum
14.  Feminismi leggur kynhlutverk að jöfnu við kvennakúgun
15. Feminismi er kvennamenningu fjandsamlegur
16. Feminismi er nýhreintrúarstefna
17. Feministar vilja ákveða normin í kynferðismálum
18. Feminismi er að festa sig í sessi sem kennivald
19. Feminismi vinnur gegn kvenréttindum
20. Feminismi er dólgapólitík
21. Feminismi er hugsjónastríð
22. Feministar sinna þjónustu sem ætti að vera í höndum fagfólks
23. Feminismi er fasísk hugmyndafræði
24. Feministar hafa ranghugmyndir um norm samfélagsins
25. Feminismi einkennist af pólitískum rétttrúnaði
26. Feministar rangtúlka listaverk í áróðursskyni
27. Feministar eru með klám á heilanum
28. Feministar vilja ráða því hvað skuli teljast valdeflandi
29. Feministar ýkja tölur um kynbundinn launamun
30 Feministar styðja kynbundna mismunun
31 Feminismi vinnur gegn lýðheilsumarkmiðum
32 Feminismi nærir sorpblaðamennsku
33 Feministar hafa eyðilagt hugtakið feminismi

Ég er með ofnæmi fyrir tvennu, feminisma og tóbaksreyk.

Ég fékk skyndilegt ofnæmi fyrir reyk á aldamótaballinu á Egilsstöðum, lenti í andnauð og varð beinlínis hrædd. Í dag er ég svo viðkvæm fyrir reyk að ég finn tóbakslykt úr mikilli fjarlægð. Stundum finn ég reykjarlykt þótt enginn sé að reykja, sérstaklega ef ég er stressuð og stödd í litlu rými, t.d. strætó eða lyftu.

Ég er líka ofnæm á feminisma. Ég finn fyrir áróðrinum, þvælunni, lyginni, úr fjarlægð, rétt eins og reyknum og já það kemur fyrir að ég oftúlka meinleysisleg skilaboð. Og þessvegna skil ég hvernig feministum líður gagnvart kvennakúgun og klámi, viðbragðskerfið í þeim er ofvirkt. Feministar finna sig stöðugt knúna til að vara okkur við, og það eru góðar ástæður fyrir því að þeim líður svona þótt viðbrögðin séu úr takti við raunveruleikann.

Reykskynjarinn pípir stöðugt

Ég skil þau já.  En þetta er samt dálítið vont. Að búa í samfélagi sem er heltekið af feminisma er eins og að búa með reykingamanni sem er svo eldhræddur að hann tekur ekki annað í mál en að vera með þrjá reykskynjara í eldhúsinu. Þeir fara allir í gang í hvert sinn sem maður ristar brauð og sambýlingurinn telur að það sé sönnun þess að eldhættan sé jafnvel ennþá meiri en hann hélt. Heimilisfólkið hættir að rista brauð í von um að fá frið en það verður bara til þess að sá eldhræddi tekur upp á því að prófa reykskynjarana á klukkutíma fresti með því að reykja í eldhúsinu.

Maður þarf ekki einu sinni að vera með reykingaofnæmi til þess að finnast ástandið óbærilegt. Maður vill ekki búa við stöðugt reykskynjaragarg. Því síður þegar það er sá eldhræddi sjálfur sem setur reykskynjarann í gang og staðhæfir að þetta séu ekki fölsk reykboð þar sem tóbaksreykurinn sé alvöru reykur. Þegar sambýlingurinn kórónar svo ruglið með því að harðneita að skipta um rafhlöðu í reykskynjara sem pípir stöðugt, heldur sprettur upp og hefur æðisgengna leit að ímynduðum eldi í hvert sinn sem bilaði reykskynjarinn fer í gang, þá hlýtur maður að fá nóg.

Undanfarið hef ég hundsað feminísk reykboð. Þessa þindarlausu umfjöllun um kynbundið ofbeldi, klámvandamál og kvenhatur. Ég var orðin ennþá þreyttari á nöldrinu í sjálfri mér en pípinu frá femninskum reykskynjurum en auk þess hefur ástandið verið skárra undanfarnar vikur en það var í vetur. En nú er tóbakslykt í loftinu og reykskynjaragargið alveg að bresta á. Ég veit að markmið þeirra er ekki að gera mig brjálaða en vitið hvað, stundum líður mér svona:

Í gær fór ég að hugsa um hvort væri æskilegt taka biluðu reykskynjarana úr sambandi og nota bara þá sem eru í lagi (t.d. almenna mannréttindastefnu.) Á nokkrum mínútum fann ég 33 ástæður til að uppræta feminisma. Kannski segi ég ykkur frá þeim þegar ég er búin að lesa þessa frétt, þessa og þessa og horfa á þetta viðtal. Mig langar til þess að þið skoðið þessar fréttir líka en ég held af því að mörg ykkar nenni því ekki og verjið tímanum frekar í klámvæðinguna hjá Wow Air og aðrar feministafréttir.

———————–

Seinni færslur í þessari pistlaröð:

1. Við þurfum ekki feminisma til að tryggja jafnrétti
2. Grundvöllur feminismans er lygi
3. Feminismi notar lygar í áróðursskyni
4. Feminisminn lítur á karlmenn sem illmenni
5. Feminisminn lítur á konur sem fórnarlömb
6.  Feminismi firrir konur ábyrgð
7.  Feminisminn er í stöðugri mótsögn við sjálfan sig
8. Feminismi skaðar konur í kynlífsiðnaði
9.  Feministar takmarka sjálfsákvörðunarrétt kvenna
10.  Feminisk áhrif veikja réttaröryggi sakborninga
11. Feministar nota háskóla til að breiða út gervivísindi
12. Feminismi er ríkisstyrkt valdanet
13.  Feministar vilja fá að stunda trúboð í skólum
14.  Feminismi leggur kynhlutverk að jöfnu við kvennakúgun
15. Feminismi er kvennamenningu fjandsamlegur
16. Feminismi er nýhreintrúarstefna
17. Feministar vilja ákveða normin í kynferðismálum
18. Feminismi er að festa sig í sessi sem kennivald
19. Feminismi vinnur gegn kvenréttindum
20. Feminismi er dólgapólitík
21. Feminismi er hugsjónastríð
22. Feministar sinna þjónustu sem ætti að vera í höndum fagfólks
23. Feminismi er fasísk hugmyndafræði
24. Feministar hafa ranghugmyndir um norm samfélagsins
25. Feminismi einkennist af pólitískum rétttrúnaði
26. Feministar rangtúlka listaverk í áróðursskyni
27. Feministar eru með klám á heilanum
28. Feministar vilja ráða því hvað skuli teljast valdeflandi
29. Feministar ýkja tölur um kynbundinn launamun
30 Feministar styðja kynbundna mismunun
31 Feminismi vinnur gegn lýðheilsumarkmiðum
32 Feminismi nærir sorpblaðamennsku
33 Feministar hafa eyðilagt hugtakið feminismi

Átta milljónir kostaði að senda Króatana aftur „heim“.  Eftir nokkrar vikur fær Króatía aðild að Evrópusambandinu og þá geta þeir komið aftur ef þeim sýnist svo. Því er von að fólk spyrji hver tilgangurinn sé með því að borga undir þá flug „heim“.

Tilgangurinn er sá að senda skilaboð. Skilaboð sem í senn eru ætluð þeim sem sendir voru burt, öðrum sem vilja fara frá Króatíu og íslensku þjóðinni. Skilaboðin eru þessi:

Við viljum ekki svona rusl. Við viljum frekar borga fyrir að koma þessu liði í skilning um að við Íslendingar erum merkilegri en þau. Við viljum frekar leggja út smápening núna en hætta á að þau telji sjálfum sér trú um að á Íslandi verði litið á þau sem manneskjur.

Í umræðunni um umræðuna er orðið einelti notað af óhóflegu örlæti. Borgarstjóri Reykjavíkur sagðist fyrir nokkrum vikum hafa verið lagður í einelti á borgarafundi þegar fundargestur sýndi honum ókurteisi og nú skilgreinir Ingibjörg Sólrún Gísladóttir það sem einelti þegar margir gera grín að Vigdísi Hauksdóttur og Jóni Bjarnassyni. Þessi umræða er löngu komin út í rugl. Við erum ekki að tala um varnarlaus skólabörn sem geta ekki sinnt daglegum störfum sínum vegna ofsókna og þora jafnvel ekki út úr húsi, heldur valdafólk sem hefur fulla burði til að svara fyrir sig.

Persónulegir eiginleikar dregnir inn í umræðuna

Í litlu samfélagi er við því að búast að persónulegum eiginleikum þingmanna og annars áhrifafólks sé blandað í umræðuna. Það er ómálefnalegt, hallærislegt og ógagnlegt en það er ekki alltaf neikvætt fyrir þann sem á í hlut. Fólk verður ekki bara fyrir ósanngjörnum árásum, vinir og vandamenn rísa líka upp til varnar sínu fólki. Um daginn lýsti bróðir þingmanns honum á facebook á þá leið að hann væri nánast eins og klipptur út úr heilræðavísum Hallgríms Pétursonar; lítillátur, ljúfur og kátur. Bróðurkærleikur á fullan rétt á sér þótt þessar upplýsingar komi almenningi svosem ekkert við, ekki frekar en það kæmi okkur við ef þingmaður væri manna leiðinlegastur í jólaboðum. Það er heldur ekkert annað en gott um það að segja að kona Sigmundar Davíðs Gunnlaugssonar skuli lýsa honum sem traustum og elskulegum fjölskylduföður í blaðaviðtali. Ég ætla hinsvegar rétt að vona að það sé séríslensk blaðamennska að taka þeirri heimild sem staðfestingu á hæfni hans í hlutverki forsætisráðherra:

Enginn þekkir mann betur en eiginkonan og haft er fyrir satt að það megi ráða í innræti manna af framkomu þeirra við fjölskyldu sína. Samkvæmt því þarf þjóðin ekki að kvíða forsætisráðherratíð Sigmundar Davíðs Gunnlaugssonar því eiginkona hans, Anna Sigurlaug Pálsdóttir, segir hann traust ljúfmenni sem alltaf sé til staðar ef vandamál komi upp.

Framkoma þingmanns við vini og vandamenn segir ekkert um hæfni hans til að fara með völd. Fólk í valdastöðum dæmist af verkum sínum og persónulegt líf þess kemur okkur ekki við. En Ísland er smáríki og við komumst ekki hjá því að heyra álit ástvina á valdafólki. Við komumst heldur ekki hjá því að heyra álit hinna sem finna þeim allt til foráttu. Það er ekki samfélagslegt einelti þegar huldumaður á netinu segir að Vigdís Hauksdóttir sé afturhaldspíka, ekki frekar en það er persónudýrkun fjöldans þegar fjölskylda Sigmundar Davíðs og einn blaðamaður lýsa honum sem sérstökum öðlingi.

Má þá alveg drulla yfir valdafólk?

Auðvitað eru takmörk fyrir því hverskonar framkomu er hægt að ætlast til þess að þingmenn og annað fólk í áhrifa- og valdastöðum sætti sig við. Ég hef ekki lesið allt sem skrifað hefur verið um Vigdisi Hauksdóttur og Jón Bjarnason og vel má vera að meðal þess sé rógur. En það er ekki rógur að lýsa vanþóknun sinni á vondum málflutningi og það er heldur ekki rógur að setja gagnrýni fram með háði. Fólk sem velur sér það hlutskipti að vera í sviðsljósinu, ég tala nú ekki um ef það seilist eftir völdum, getur ekki reiknað með því að gagnrýni á það sé sett fram af nærgætni og það þarf að vera nokkuð langt gengið til þess að hægt sé að flokka ummæli um valdafólk sem meiðyrði eða einelti.

Valdsmenn eiga að mínu mati eins og allir aðrir siðferðilega heimtingu á eftirfarandi:
– að ekki sé logið upp á þá
– að gagnrýni, sem ætlað er að segja eitthvað um hæfni þeirra, komi störfum þeirra og áhrifum við
– að gagnrýni sé rökstudd.

Þar með er það líka upp talið og þetta nær aðeins yfir opinbera gagnrýni sem sett er fram af alvöru og þunga og ætla má að leiði til álitshnekkis. Það er t.d. ekki hægt að banna skopteiknara að nota útlit, málfar og önnur sérkenni til þess að draga upp hlægilega mynd af stjórnmálamanni enda þótt þau sérkenni komi störfum hans ekkert við. Það er heldur ekki hægt að banna fólki láta frá sér ummæli á borð við þau að einhver sé asni eða illmenni á kommentakerfum netmiðlanna. Gagnrýni má ekki verða einkaréttur þeirra sem eru nógu mælskir til þess að klæða óvægnar skoðanir í kurteislegan búning. Það er ekki einu sinni hægt að banna fólki að benda á ættartengsl eða önnur sambönd sem geta skipt máli, þótt sé auðvitað ljótt að draga inn í umræðuna vini og vandamenn sem enga ábyrgð bera.

Nei, þau verða ekki látin í friði

Vigdís Hauksdóttir og Jón Bjarnason eru ekki fórnarlömb eineltis, að minnsta kosti ekki í þeim skilningi að hópar fólks hafi veist að þeim að ósekju. Hafi örfáir, óþekktir einstaklingar lagt þau í einelti þá er það einkamál en ekki samfélagsvandi. Fjöldi manns hefur vissulega gagnrýnt þau og gert grín að þeim en til þess hafa þau fyllilega unnið með þeirri óstjórnlegu þvælu sem þau hafa látið út úr sér á opinberum vettvangi.

Ég ætla ekkert að hætta að tala um Vigdísi sem þjóðrembu þótt hún sé áreiðanlega vænsta kona í daglegu lífi. Ég ætla heldur ekki að tala fallega um Sigmund Davíð þótt konunni hans finnist hann hlýr og elskulegur. Það kemur málinu nefnilega ekkert við. Þetta er valdafólk og þau eiga ekki heimtingu á elskulegheitum, heldur dæmast þau af verkum sínum, verkum sem hafa bein áhrif á örlög fólksins í landinu.

Ég skal klappa Sigmundi Davíð á bakið þegar hann er fallinn frá hugmyndum um að afnema sérstakt veiðigjald. Ég skal segja eitthvað sætt um Vigdísi þegar hún skammar Útlendingastofnun fyrir að misnota Dyflinnarreglugerðina. Sem stendur sé ég enga ástæðu til þess að hætta að tala um Vigdísi sem þjóðrembu og Sigmund Davíð og Bjarna Ben sem silfurskeiðadrengi. Ef ráðherrar og aðrir þingmenn vilja vinsamleg ummæli skulu þeir vinna til þeirra. Það geta þeir auðveldlega gert með því að nota völd sín til að stuðla að meira réttlæti, jöfnuði og frelsi.

Að lokum vek ég athygli á ummælum sem Hjörtur Hjartarson lét falla á facebook núna áðan:

Gagnrýni á valdhafa hefur sumstaðar verið skilgeind sem geðveiki. Mér finnst einelti vel koma til greina líka.

Nokkur dæmi um markmið nýrrar ríkisstjórnar

Ríkisstjórn Silfurskeiðabandalagsins hefur sett sér metnaðarfull markmið. Hún ætlar m.a:

…að vinna að því að Ísland verði í fararbroddi í umhverfismálum á heimsvísu og öðrum þjóðum fyrirmynd á sviði umhverfisverndar.

 Samtímis ætlar hún að auka veg landbúnaðar þrátt fyrir að ofbeit sé ein helsta orsök jarðvegseyðingar og

…stuðla að því að nýting hugsanlegra olíu- og gasauðlinda geti hafist sem fyrst, finnist þær í vinnanlegu magni.

Jafnframt ætlar hún að sjá til þess 

…að engar nýjar íþyngjandi reglur verði innleiddar fyrir atvinnulífið án þess að um leið falli brott jafnveigamiklar kvaðir.

Samkvæmt þessu mætti ekki herða kröfur um mengunarvarnir eða vinnuvernd, jafnvel þótt áður óþekktar afleiðingar kæmu í ljós, nema fyrirtækjum yrði bætt fjárhagstjónið sem slíkar aðgerðir útheimta. En það kemur svosem ekki á óvart þótt Silfurskeiðabandalagið ætli að setja hagsmuni eigenda atvinnulífsins ofar hagsmunum almennings.

Myndin er eftir Gunnar Karlsson

Auk þess að ætla sér að vera öðrum þjóðarleiðtogum fyrirmynd á sviði umhverfisverndar, samtímis því að virkja hverja einustu sprænu og hvern einasta hver sem hugsanlegt er að stórfyrirtæki geti grætt á, ætla ríkisstjórnarflokkarnir, þeir hinir sömu og bera ábyrgð á einhverju stærsta efnahagshruni mannkyssögunnar,

…að auðvelda börnum og ungmennum að fóta sig í bráð og lengd, meðal annars með því að leggja áherslu á félagsfærni, aðgerðir gegn einelti og fjármálalæsi í grunn- og framhaldsskólum.

Það er dálítið athyglisvert að Silfurskeiðabandalagið nefni félagsfærni, aðgerðir gegn einelti og „fjármálalæsi“ í sömu andrá og gaman væri að fá álit sálfræðinga á þeim sálarflækjum sem þar kunna að búa að baki. Einnig væri áhugavert að fá skýringar á því hvað felst í fjármálalæsi. Kannski hugmyndin sé sú að kenna ungviðinu að nýta sér „vafningatækni“ og skattaskjól erlendis? Í myndbandinu hér að neðan sjáum við dæmi um fjármálalæsi mannsins sem á að gegna embætti fjármálaráðherra næstu fjögur árin. Er nokkur furða þótt hann sé sármóðgaður yfir því að fréttamaður skuli voga sér að leggja fyrir hann óþægilegar spurningar?

Líklega kemur fáum á óvart að fjármálaráðherra sem tengist vafasömum fjármálagjörningum og forsætisráðherra sem hikar ekki við að gefa villandi upplýsingar um menntun sína, ætli að taka að sér

…að rækta með þjóðinni þær dyggðir sem best tryggja farsæld og jafnræði.

Hvort skortur þjóðarinnar á slíkum dyggðum er stórt vandamál er umdeilanlegt. Ég efast satt að segja minna um dyggðir þjóðarinnar en um ágæti þess að þorri almennings tileinki sér siðferði Silfurskeiðabandalagsins. Sömuleiðis efast ég um að þau kraftaverk sem þeir sætabrauðsdrengir hyggjast fremja á næsta kjörtímabili séu raunhæf og ég er ekki ein um þær efasemdir.

En eigum við ekki að gefa þeim séns?

Hér hafa verið nefnd örfá dæmi um þá hroðalegu blöndu af froðu og steypu sem einkennir stefnuyfirlýsingu nýrrar ríkisstjórnar en ef ætti að gera þessum þvættingi sæmileg skil yrði það efni í heila bók. Þeir sem benda á ósamrýmanleg markmið og ótrúverðugan málflutning formanna Sjálfstæðisflokks og Framsóknar fá gjarnan tilmæli um að „gefa ríkisstjórninni séns“.  Tortryggni í garð ríkisstjórnarflokkanna er afgreidd sem neikvæðni. Þeim sem heimta svör um það hvernig ríkisstjórnin hyggist ná sínum háleitu markmiðum er sagt að vera nú ekki að nöldra áður en hún er búin að gera neitt alvarlegt af sér. Mig rekur reyndar minni til þess að sama gagnrýni frá sama fólki hafi fengið sömu einkunnir á árunum fyrir hrun. Efasemdir um ágæti þenslunnar voru sagðar svartagallsraus og nöldur. Mótmæli gegn stóriðjustefnunni voru sögð tilraun til að „koma þjóðinni aftur inn í torfkofana“ (þessa sem Íslendingar bjuggu í árið 1969) og enn flíka menn þessum kjánalega frasa.

Efnahagskerfið hrundi en forystumenn Sjálfstæðisflokks og Framsóknar sáu enga sök hjá sjálfum sér. Sjálfstæðismenn grobbuðu af styrkri efnahagsstjórn um leið og þeir greiddu veg bankaræningja og Framsókn lofaði almenningi nýrri stjórnarskrá en barðist svo af alefli gegn tillögum Stjórnlagaráðs.

Þið sem kusuð Sjálfstæðisflokk og Framsókn; að sjálfsögðu fær ríkisstjórn Silfurskeiðabandalagsins séns, þið sáuð til þess með því að kjósa þessa flokka. Ríkisstjórnin ykkar fær tækifæri til þess að eyðileggja meira af náttúru Íslands. Hún fær tækifæri til að mylja ennþá meira undir sægreifana. Hún fær tækifæri til að vinna gegn fjölmenningarstefnu og halda áfram að kúga innflytjendur og flóttamenn. En að hún fái frið fyrir gagnrýni eða tækifæri til þess að athafna sig án þess að fylgst verði gaumgæfilega með henni, það kemur ekki til greina. Til þess er nákvæmlega engin ástæða.

Því miður ríkir lítill metnaður gagnvart málfari og ritstíl á íslenskum fjölmiðlum og daglega birta íslenskir netmiðlar erlendar fréttir og greinar sem eru svo illa þýddar að maður fer hjá sér af skömm yfir því að verða vitni að öðru eins.  Hér eru nokkur nýleg dæmi.

Þó það var ekki létt, þá stoppaði Hathfield að borða kolvetni, sem breytast í glúkósa í líkamanum. Krabbamein elskar glúkósa og þarfnast hans sárlega. Ef þú hættir að gefa því glúkósa þá drepst krabbameinið. “Mér þykir það furðulegt að læknavísindin eru fyrst að fatta þetta núna” segir hann.

lkl.is

Jæja þetta er kannski ekki „alvöru“ fjölmiðill en sá næsti er gífurlega vinsæll ef marka má Blogggáttina.

Það tók ekki langan tíma fyrir Robert Pattinson að fara út á djammið og hitta stúlkur. Aðeins viku eftir að leikaraparið í stormasama sambandinu hættu saman sást hann úti á lífinu. Sást til leikarans um kl. 1 eftir miðnætti á Roosevelt hótelbarnum í L.A. drekkandi kokteila og daðra við fallega, dökkhærða stúlku þrátt fyrir að ekki hafi verið um snertingar að ræða.

bleikt.is

Bleikt er auðvitað „bara“ afþreyingarvefur svo það er kannski ekki við því að búast að þar séu gerðar kröfur um vandaðar þýðingar en jafnvel fréttamiðlar birta svotil daglega gullkorn á borð við þessi:

Bönnuð frá kennslustofu eftir að hafa reynt ítrekað við nemanda

Fyrirsögn á dv.is

Hamburg var að vinna leikinn örugglega og hegðunin óskiljanleg. Nincevic lá eftir rotaður og fossblæddi úr honum. Í fyrstu var óttast að hann væri með brotið kinnbein en svo var ekki. Hann fékk þó alvarlega heilahristing og stóran skurð á andlitið.  „Það var risastór hola á andlitinu á honum,“ sagði Igor Vori, leikmaður Hamburg, eftir leikinn en Nincevic fékk fimm sentimetra skurð í andlitið.

visir.is

„Öll okkar eru að starfa í skattakerfi sem hefur verið mjög langvarandi og var sett upp fyrir fjölda ástæðna sem ég og aðrir skiljum ekki, en svona virkar alþjóðlega skattaumhverfið,“ bætti Schmidt við.

mbl.is

Oftast eru þýðingar á vef Ríkisútvarpsins nokkuð góðar en þó eiga slysin sér stað þar líka.

Hlutabréf rétta úr kútnum í Japan

Fyrirsögn á ruv.is

Þýðingar eru vandasamt starf og það segir nokkuð um það hversu vanmetið það er að vefmiðlar sem vilja láta taka sig alvarlega skuli ekki leggja áherslu á að ráða góða þýðendur og jafnvel láta nægja að renna erlendum greinum í gegnum þýðingavél.

Þegar sjónvarpsstöð segir upp samningum við sína reyndustu þýðendur getum við reiknað með að textasetning á sjónvarpsefni verði álíka góð og þýðingar á netmiðlunum. Skjátextagerð er ekki samskonar vinna og þýðingar á auglýsingatexta, blaðagrein eða skáldsögu. Þýðandinn þarf oft að stytta textann og sum verkefni þarf auk þess að vinna hratt. Jafnvel fólk sem hefur einhverja reynslu af þýðingum þarf þessvegna þjálfun til þess að vinna góðan skjátexta.

Sjálfsagt finnst sumum sjónvarpsáhorfendum alveg nóg að merkingin komist til skila en sjónvarpsstöð sem reynir ekki að mæta kröfum þeirra sem vilja lesa vel unninn skjátexta gæti alveg eins losað sig við færa myndatökumenn og ráðið nýgræðinga í staðinn. En vonandi nýtur starf myndatökumannsins ofurlítið meiri virðingar en störf þýðandans og prófarkarlesarans. Þau störf eru greinilega ekki hátt skrifuð.

____________________________________________________________________________________

Eitt af því sem við skoðuðum í Úganda var dýflissan þar sem Idi Amin lét þá sem hann taldi til fjandmanna sinna rotna í hel í bókstaflegri merkingu.  Forsetahöllin, Mengo-höllin eins og hún er kölluð eftir hæðinni þar sem hún stendur, er frekar nútímaleg bygging. Höllin sjálf er lokuð ferðamönnum en hægt er að skoða dýflissuna sem er þar í bakgarðinum.

Idi Amin og Milton Obote

Mengo-höllin var konungshöll fram til 1966. Úganda hafði verið undir yfirráðum Breta en fékk sjálfstæði 1962 og var Mutesa II konungur kjörinn forseti. Milton Obote varð forsætisráðherra og Idi Amin var yfir hernum. Saman stóðu Amin og Obote í skipulagðri glæpastarfsemi, m.a. gull- og fílabeinssmygli og þegar þingið krafðist rannsóknar réðst herinn, undir stjórn Idi Amins, á konungshöllina og myrti hátt í þúsund saklausra borgara á Mengo. Mutesa konungur var hrakinn í útlegð og Obote afnam stöðu forseta og sölsaði undir sig öll völd með aðstoð vinar síns Idi Amin.

Þremur árum eftir valdaránið hrakti Idi Amin þennan fyrrum samherja sinn frá völdum og lofaði að koma á lýðræði. Þess í stað sæmdi hann sjálfan sig forsetatign og vegtyllum ýmsum og hófst þegar handa við að ofsækja stuðningsmenn Obotes sem og ýmsa minnihlutahópa.

Amin sat á valdastóli frá 1971-1979 og gat sér nafn sem einn grimmasti harðstjóri sögunnar. Ekki eru til áreiðanlegar heimildir um fjölda fórnarlamba hans en talið er að hann hafi látið drepa á bilinu 100.000-500.000 manns án réttarhalda. Vinsældir hans dvínuðu hratt og þrátt fyrir hernaðarlegan stuðning Gaddafis hraktist hann að lokum í útlegð og Obote komst aftur til valda. Andstæðingar Obotes ásökuðu hann um kosningasvindl og eitthvað á bilinu 100.000-500.000 til viðbótar féll í hernaðarátökum. Hvort sem Obote komst til valda með svikum eður ei, er ljóst að hann naut lítilla vinsælda. Lýðræði og mannréttindi áttu ekki upp á pallborðið hjá honum frekar en Amin og hann notaði dýflissuna í sama tilgangi og hinn illræmdi forveri hans allt þar til hann var rekinn frá völdum á nýjan leik árið 1985.

Dýflissan

Mengo-dýflissan er neðanjarðarbyrgi. Ísraelsmenn byggðu hana í þeirri trú að hún yrði notuð sem vopnabúr en Idi Amin taldi heppilegra að nota bygginguna sem fangelsi.

Pyntingar eru eina orðið sem hægt er að nota um vistina í þessum klefum. Það er kaldhæðnislegt að maður sem komst til valda m.a. vegna loforða um að leysa alla pólitíska fanga úr haldi, skuli hafa varpað fólki í dýflissu af svipuðu tagi og tíðkuðust á miðöldum, fyrir þær sakir að vera af asískum uppruna, aðhyllast trúarbrögð eða stjórnmálaskoðanir sem honum féllu ekki eða jafnvel bara fyrir að hafa háskólamenntun eða starfsreynslu úr stjórnkerfinu.

Hér sést inngangurinn að klefunum. Í aðeins 100 metra fjarlægð eru venjuleg heimili, börn og búfénaður á vappi í grasinu og ekkert sem minnir á hryllingssögu staðarins.

Þessi hani var á vappi fyrir utan heimili í nágrenni dýflissunnar

Og þessi litli drengur.

Hér er vegasjoppa, bara rétt við innganginn. Takið eftir barninu bak við runnann hægra megin. Þetta er ósköp hversdagslegt umhverfi og ef ég hefði ekki vitað hvert ferðinni var heitið hefði mér sennilega dottið í hug grænmetisgeymsla eða eitthvað slíkt.

Á dögum Idi Amin var vatni veitt eftir manngerðum skurðinum sem sést á efstu myndinni. Á þessari mynd erum við komin alveg að inngangnum og hér sjást fimm klefar á upphækkuðum palli.  Hæðin frá gólfi upp í klefana er um það bil einn metri. Vatnið rann inn í dýflissuna og fangar voru ferjaðir þangað á bátum. Enn í dag er væta á gólfinu.

Fyrir inngangnum var járngrind sem hefur verið fjarlægð. Í hana var leitt rafmagn og enn má sjá brot í veggnum þar sem rafmagnskapallinn lá (hægra megin á myndinni hér að ofan.) Járnhliðið leiddi rafmagnið í vatnið og engum tókst að flýja úr þessari prísund.

Rafmagnið var tekið af hliðinu þegar hermenn komu með fleiri fanga og eða til að fjarlægja lík. Sennilega hefur rafmagnið ekki verið á hliðinu öllum stundum þess á milli og ef til vill hefðu fleiri reynt að flýja ef fangarnir hefðu haft hugmynd um það hvar í veröldinni þeir voru niðurkomnir. Það vissu þeir ekki því áður en farið var með þá í dýflissuna var bundið fyrir augu þeirra og þeir reknir fram og til baka um hallarlóðina í marga klukkutíma svo þeir héldu að þeir hefðu ferðast langa leið og vissu ekkert hvað var hinummegin við hliðið.

Hver klefi er á að giska 30-35 fermetrar og leiðsögumaðurinn segir að í hverjum þeirra hafi verið vistaðir allt að 500 manns í senn. Ég veit ekki á hvaða heimildum sú tala er  byggð en þar sem útilokað er að 500 manns hafi getað sest þarna niður er ólíklegt að svo margir hafi verið þar nema nokkrar mínútur í senn. Þarna var engin lýsing, engin loftræsing og engin hreinlætisaðstaða. Í rigningum flæddi vatn inn í klefana. Þegar þrengslin urðu óbærileg brutust út slagsmál og gömlu fólki og veikburða var kastað út í rafmagnað vatnið. Fólk svalt til bana. Saur hlóðst upp inni í klefunum og margir hreinlega köfnuðu. Sumir höfðu verið pyntaðir á hroðalegan hátt áður en þeir lentu í dýflissunni.  Dæmi voru um að fólk væri augnstungið eða stungið á hol og innyfli dregin út úr líkamanum á meðan það var enn á lífi og sagt er að margir hafi sjálfir kosið að binda endi á þjáningar sínar með því að kasta sér í rafmagnað vatnið.

Líkum var svo ýmist hent fyrir krókódílana í Viktoríuvatni eða þau skilin eftir á víðavangi.
Í klefunum er ekkert að sjá sem bendir til þess að manneskjur hafi nokkurntíma hafst þar við nema veggjakrot. Lófaför og skilaboð sem fangarnir skrifuðu á veggi dýflissunnar með sínum eigin saur og blóði. Ég mæĺi með því að þeir sem heimsækja pyntingaklefana taki með sér vasaljós. Ekki hefur verið sett lýsing í dýflissuna svo maður sér aðeins þær áletranir sem næst eru dyrunum.

Það er of dimmt í klefunum til þess að ég gæti náð myndum þar en þessi áletrun er fyrir utan á vegg milli klefanna. Líklega hefur eiginkona einhvers fanganna skrifað þetta eftir að Obote hraktist í útlegð. „I never for my husband was killed people of Obote“.  Væntanlega hefur hún ætlað að skrifa „I never forgive“ eða „I never forget“.

Nei það er harla ólíklegt að þeir Úgandar sem upplifðu valdatíð þessara óbótamanna gleymi illvirkjum þeirra. Hvort það skiptir nokkru máli er svo önnur saga. Bæði Idi Amin og Obote létust í útlegð en hvorugur þeirra þurfti nokkurntíma að svara fyrir gjörðir sínar.

____________________________________________________________________________________

Lára Hanna Einarsdóttir lýsir eftir orði yfir þá hegðun:

að segja upp verksamningi við 57 ára gamlan starfsmann eftir 25 ára starf með 20 daga fyrirvara – með einum tölvupósti.

Mér koma ýmis orð í hug en flest þeirra væri óviðeigandi að birta á opinberum vettvangi.  Ég finn ekki netföng starfsmanna á netsíðu 365 miðla en ég fann Erling Frey Guðmundsson á facebook og sendi honum eftirfarandi skilaboð:

Sæll Erling Freyr

Ég finn ekki netföng starfsmanna á vefsíðu 365 miðla og sendi þér þessvegna skilaboð hér.  Erindi mitt varðar pistil Láru Hönnu Einarsdóttur þar sem hún segir frá því hvernig staðið var að uppsögn hennar og annarra þýðenda Stöðvar 2.  Ég geri ráð fyrir að þú hafir lesið hann.

Miðla 365 setti verulega niður þegar prófarkalesurum var sagt upp og nú bítið þið hausinn af skömminni með því að reka ágæta þýðendur sem auk þess að vinna skjátexta hafa sjálfir þurft að villulesa textana sína.

Það þarf mikla þjálfun til þess að vinna góðan skjátexta.  Ef þýðendur sem hafa litla reynslu af skjátextagerð verða látnir sjá um mjög krefjandi verkefni og þurfa jafnvel að vinna þau í tímaþröng, getum við reiknað með að textun á klassískum kvikmyndum og fréttatengdu efni verði framvegis álíka vönduð og þýðingar á lífsstílssíðum netmiðlanna.  Það er mörgum áhorfendum raun að lesa vondar þýðingar en einnig ber að hafa í huga að skjátexti er stór hluti þess texta sem börn og unglingar lesa.  Vinsælir fjölmiðlar ættu því að líta á það sem siðferðilega skyldu sína að halda ambögum og innsláttarvillum í lágmarki.

Fúskið á íslenskum fjölmiðlum er löngu hætt að koma mér á óvart svo þótt mér þyki miður að fjölmiðlaveldi 365 segi upp hæfu fólki, get ég ekki sagt að ég sé beinlínis hissa á því.  Ég er hinsvegar furðu lostin yfir því að nokkrum skuli detta í hug að standa að uppsögn á þann hátt sem lýst er í fyrrnefndum pistli Láru Hönnu.  Maður sviptir fólk ekki lifibrauði sínu með tölvupósti.  Því síður fólk sem hefur þjónað fyrirtækinu af trúmennsku í áratugi og allra síst þegar það er bæði að takast á við erfiðleika og komið á aldur sem hefð er fyrir að atvinnurekendur líti á sem ókost.  Svona gerir maður ekki Erling Freyr og ég lýsi hér með andstyggð minni á þessari framkomu sem ég vona sannarlega að hafi verið vanhugsuð.

Ég á engin viðskipti við 365 miðla sjálf en ég mun hvetja áskrifendur Stöðvar 2 til að segja áskriftinni upp og auglýsendur til að sniðganga alla miðla í eigu 365, þar til Lára Hanna og aðrir þýðendur sem fengu uppsagnarbréf hafa verið beðnir afsökunar og þeim gefinn kostur á að halda áfram án þess að kjör þeirra verði skert eða verkefnum fækkað.

Með kveðju
Eva Hauksdóttir

Eins og kemur fram í bréfi mínu til Erlings Freys er ég ekki í aðstöðu til þess að segja upp viðskiptum við 365 miðla.  Ég ætla heldur ekki að nýta mér „ókeypis“ þjónustu miðla 365 framvegis.  Það eru auglýsendur sem kosta þá þjónustu og ég vil ekki gera neitt til að halda þeim í þeirri trú að það borgi sig fyrir þá að skipta við fyrirtæki sem hegðar sér á þennan hátt.  Mörg þúsund manns hafa nú dreift pistli Láru Hönnu og fréttum Eyjunnar, Moggans og DV af sögu hennar og ég vona að þeir muni allir sem einn sniðganga 365.