Í gærdag boðaði formaður Samfylkingarinnar, Árni Páll Árnason, til blaðamannafundar í skyndi kl. 15:00 og fylltust allir fréttamiðlar af þessu efni rétt fyrir hádegi. Fólk beið spennt enda blaðamannafundir ekki boðaðir nema eitthvað merkilegt sé á ferðinni.

Ólafur Ragnar Grímsson forseti Íslands boðaði til blaðamannafundar eftir að Panamaskjölin voru birt og allt stefndi í að ríkisstjórn Sigmundar Davíðs viki fyrir annarri ágætri stjórn Framsóknarflokksins og Sjálfstæðisflokksins.

Tilefni til að stíga til hliðar

Undanfarið hefur fólki verið tíðrætt um að einstaklingar eigi að hætta að vinna snemma þrátt fyrir góða heilsu, mikla reynslu og dugnað í embætti. Margir vinstri menn eru í framvarðarsveit þeirra sem helst vilja að eldri borgarar (sbr. tjáningu á samfélagsmiðlum og á RÚV) með reynslu hætti að vinna sem fyrst og eigi að ,,yfirgefa sviðið“, eins ,,smekklega“ eins og sumir orða það. Þetta eru einstaklingar sem m.a. kenna sig við Samfylkinguna og önnur vinstri öfl á Íslandi. Það er miður og sorglegt í raun.

Þegar forseti Íslands, Ólafur Ragnar Grímsson, tilkynnti nýlega um framboð sitt til embættis forseta Íslands ætlaði allt um koll að keyra. Það gerðist stuttu eftir að Árni Páll Árnason hafði hrósað forseta Íslands fyrir að hafna því að veita Sigmundi Davíð þingrofsheimild þrátt fyrir mikil mótmæli á Austurvelli þar sem mótmælendur vildu að kosið yrði strax.

Ánægja með forseta Íslands og Árni nær árangri

Nú er svo komið að flestir eru afar ánægðir með að forseti Íslands sitji áfram í embætti. Það virðist vera raunin skv. skoðannakönnunum og þykir frábær niðurstaða. Það er því hið besta mál þó svo ekki sé nema væri fyrir þær sakir að ekki þyrfti að færa einhvern annan t.d. af listamannalaunum yfir í forsetaembættið og borga svo báðum af fjármunum skattgreiðenda til að segja okkur hvað klár við erum Íslendingar.

Forseti Íslands, með ákvörðun sinni, er að spara fyrir okkur skattgreiðendur með ákvörðun sinni. Þetta frábæra útspil Ólafs Ragnars Grímssonar bætist við önnur góð verk sem hann hefur unnið að í embætti og sigra sem hann hefur svo vissulega unnið fyrir land og þjóð.

Nú er svo komið að fylgi Samfylkingarinnar er komið niður í 9% skv. skoðanakönnunum. Sökum þess árangurs boðaði Árni Páll til blaðamannafundar og tilkynnti að hann ætlaði að bjóða sig aftur fram til forystu í Samfylkingunni. Aðrir í framboði eru þau Oddný G. Harðardóttir, Magnús Orri Schram, Helgi Hjörvar og Guðmundur Ari Sigurjónsson.

Fylgi Árna Páls Árnasonar

Eins ágætur og Árni er virðist hann sjá sig áfram í þessu krefjandi embætti og sérstaklega eftir að gjaldkerinn sagði af sér vegna Panama skjalanna. Samhliða eru gerðar skoðanakannanir og flutti Eyjan frétt (apríl 2016) af einni þeirra sem mældi fylgi frambjóðenda til formanns Samfylkingarinnar. Þar segir m.a:

Oddný mælist með 32,4 prósenta fylgi en Helgi Hjörvar kemur næstur með 29,9 prósenta fylgi. Athygli vekur að Árni Páll Árnason, formaður Samfylkingarinnar, mælist með 20 prósenta fylgi. Þar á eftir koma Magnús Orri Schram (12,3%) og Guðmundur Ari Sigurjónsson (5,5%), bæjarfulltrúi Samfylkingarinnar á Seltjarnarnesi.

Tilefni Árna til að halda blaðamannafund í gær virtist ærið og líklega fyrir þær sakir að hann hefur ekki aðeins náð fylgi Samfylkingarinnar niður í 9% heldur hefur hann náði eigin fylgi neðar, nú innan Samfylkingarinnar úr 50,009% skv. síðasta kjöri til formanns í um 20% eins og að framan greinir.

Birtust fréttir af þessu víða í gær og sjá má að blaðamannafundurinn hefur skilað sér en spurningin er sú hvort að hann skili sér í lægra fylgi bæði Samfylkingarinnar og svo Árna Páls innan eigin vébanda.

Lífslíkur

Í vefriti Lífeyrissjóðs Verzlunarmanna frá því í nóvember árið 2011 birtist frétt sem rakin er til Hagstofu Hollands og varðaði lífslíkur fólk í því ágæta landi, landi sem hefði átt umtalsverðar kröfur á skattgreiðendur hefði forseti Íslands ekki gripið inní. Um þessar mundir stýrir Ólafía B. Rafnsdóttir, formaður VR, þeim félagssamtökum sem standa að baki þessum lífeyrissjóð. Áður var hún helsti ráðgjafi Árna Páls og kosningastjóri. Nú er öldin önnur.

Þó svo að fjölmargir aðstandendur Samfylkingarinnar og aðrir vinstri menn hafa rætt um hve aldraður forseti vor er orðinn og að hann ætti að hætta sökum þess virðast aðrir liggja nærri lokaaldri í embætti en menn hugðu. Undir lok síðasta árs birti Völva DV spá sína og sagði hún að Árni Páll myndi ekki ,,lifa“ árið 2016 af í embætti formanns Samfylkingarinnar.

Í vefritinu Kjarninn, sem nýlega varð fyrir hnjaski vegna Panama skjalanna svokölluðu, var fjallað um lífslíkur og birtist efnið í ritinu í júní 2015 og þar vitnað í gögn frá Hagstofu Íslands. Þar kom fram að lífslíkur á Íslandi séu með þeim bestu í Evrópu og ungbarnadauði sá minnsti í álfunni. Þar kom einnig fram að íslenskir karlmenn geta nú náð um 80,6 ára aldri á Íslandi og íslenskar konur 82,7 ára aldri að meðaltali. Hér skal áréttað að sumir geta orðið mun eldri enda um meðalaldur að ræða. Þetta er mikið fagnaðarefni fyrir þá sem styðja sitjandi forseta áfram í embætti.

Kjarninn hefur hingað til fjallað um hve mikilvægt það er að skipta um stjórn í landinu þrátt fyrir þann árangur sem núverandi stjórnarflokkar hafa náð fyrir land og þjóð síðustu áratugi. Einnig hefur verið róið undir því að forseti Íslands sé óhæfur í embætti sökum aldurs. Hann er talinn jafnvel vanhæfur þrátt fyrir að hann hafi beitt sér gegn því að síðasta vinstri stjórn Íslands kæmi ógnarháum skuldum að ósekju yfir á herðar Íslendinga.

Niðurlag

Þegar litið er yfir framangreint liggur fyrir að ef eitthvað vit er í Samfylkingarfólki um land allt og eðalkrötum ættu þeir að kjósa kornunga konu í embætti formanns Samfylkingarinnar en ekki karlmann. Kona með reynslu gæti komið til greina þó hún sé eldri en Árni enda benda allar spár til þess að Árni verði ekki eldri í embætti. Vísað er til þess að þó svo að Samfylkingin lifi ekki af má ætla að kven-for-maður nái háum aldri og lifi talsvert lengur en karlmaður. Vilji Samfylkingarmenn ná fylginu neðar má hugsa sér að kjósa einhvern annan.

Varðandi lífslíkur og hæfni forseta Íslands sem og annarra karlmanna á Íslandi getur Ólafur Ragnar a.m.k. náð allt að 80,6 ára aldri. Hann er fæddur árið 1943, er 73 ára í dag og yrði því aðeins 77 ára að loknu næsta kjörtímabili. Hér er aðeins um að ræða meðalaldur og hugsanlegt er að hann gæti tekið annað kjörtímabil þar á eftir enda hefur meðalaldurinn hækkað umtalsvert á þessari öld. Varðandi árangur hans í embætti er það allt augljóst og einfalt. Hann hefur staðið sig frábærlega og er hokin reynslu.

Þar sem Árni Páll er stöðugt að lækka fylgi Samfylkingarinnar og að kvenréttindi séu þar í hávegum höfð, sbr. þegar Jóhanna Sigurðardóttir fór á skjön við jafnréttislög, má ætla að tilefni hafi verið fyrir því að halda blaðamannafund í gærdag og bjóða sig fram til áframhaldandi setu. Hann er jú víst 9 árum yngri en Oddný sem nýtur mesta fylgis til formannsembættisins.

Efnið var því afar brýnt.

Góða helgi.

Að undanförnu hefur kastljósinu verið beint að skjölum frá Panama og nú sagt að þau séu hugsanlega aðeins toppurinn á ísjakanum. RÚV hefur lagt upp með að aftökur innan vébanda hins opinbera í nýlega stofnuðu opinberu hlutafélagi muni halda áfram á næstu dögum og vikum enda um 11 milljón skjala ólesin og um 600 Íslendingar á aftökulistanum. Þar verða að öllum líkindum teknir af lífi bæði sekir og saklausir, skotið út í loftið og síðan spurt eftir á hvort þetta hafi bara ekki verið í lagi.

Múgæsingin virðist ekki hafa náð hæstu hæðum en Veðurstofa Íslands spáir því að lægðin muni stefna inn á landið í október næstkomandi, þ.e. rétt fyrir kosningar. Hugsanlegt er að það muni gæta einhverra eldinga rétt fyrir forsetakosningarnar og rétt að koma fyrir eldingavara að hætti Benjamín Franklíns eins af lykilmönnum að stofnun eins frjálsasta ríkis heims, Bandaríkjanna. Benjamín var einnig mikill mannvinur og á árum sínum sem sendiherra Bandaríkjanna í París dró hann upp fyrstu hugleiðingar á sögulegum tíma varðandi mannréttindarmál. Hann barðist einnig fyrir kvenréttindum sem eru vissulega ein grunnstoð mannréttinda.

Mannréttindi og múgæsing

Nú virðist sem almenn mannréttindi eigi undir högg að sækja á Íslandi. Við þekkjum flest vel skipan stjórnsýslunnar og stjórnkerfisins en sumir virðast vera að ræða um þetta fjálglega og telja jafnvel að menn hafi brotið lög, orðið uppvísir að stuldi og talsverðum skepnuskap á undanförnum árum. Múgæsing hefur þekkst lengi og við þekkjum slíkt frá fyrri tíð. Slíkt hefur yfirleitt orðið til þess að valda miklu tjóni þar sem fólk hefur sumt hvert tekið lögin í sínar eigin hendur og látið verða að því að fara sjálft að lögum og reglum, jafnvel siðareglum.

Það vill svo til að nornaveiðar hafa verið stundaðar svo lengi sem menn muna og þekkja margir Íslendingar til Spánverjavígana á Vestfjörðum þar sem fjöldi baskneskra hvalveiðimanna voru teknir af lífi án dóms og laga snemma á 17. öld. Nú er þetta framið á Íslandi í gegnum fjölmiðla og eru undir bæði háir og lágir. Þar sem forseti Íslands er ættaður af Vestfjörðum má vænta þess að fjölmiðlar eða verktakar þeirra fari í að rekja uppruna hans og kanna hvort hann hafi átt e.k. aðild að þessu athæfi, þ.e. óbeint. Við verðum að hafa einhverjar fréttir sem selja !

Kastljós skýtur geislum og Spegillinn spyr

Obi-Wan Kenobi

Nýlega varð gjaldkeri Samfylkingarinnar fyrir geislum sólarinnar „Kastljós“ á RÚV. Þar sem hann spilar ekki leikinn EVE Online og er frekar fjárfestir en leikmaður gat hann ekki varist þessum geimgeislum sólarinnar og féll. Eftir að skotið reið af tók Spegillinn á RÚV að spyrja rétt eins og í ævintýrunum en þar reyndar spurði prinsessan spegilinn sem svaraði. Því er jafnvel ævintrýrum barnanna snúið á haus hjá RÚV í þessum atgangi. Við þekkjum slíkt úr Stundinni okkar, ekki satt?

Til svara, þ.e. fyrir framan Spegilinn, var Dr. Stefán Már Stefánsson lagaprófessor. Eftir að hafa þurft að klofa yfir brakið á átaksvæðinu var hann í raun og sann spurður um það hvort það sem Kastljós var að gera fæli í sér sannleiksgildi um sekt þeirra sem urðu fyrir geimskotunum af þessari plánetu sem RÚV er nú orðin.

Svarið var á þessa leið:

Aðalatriðið í þessu máli er það að það hefur alltaf verið heimilt, allavegana síðustu 20 ár, að taka fé sem menn eiga og hafa þá greitt skatta og skyldur af og færa það til útlanda og þess vegna í aflandsfélög.

En þar sem kapteinninn Arnar Páll inni í Speglinum var ekki alveg á því að hafa fengið nægjanlega krassandi svar leitaði hann að glæp eins og hverjum sönnum RÚV fréttamanni sæmir um borð í kostnaðarsömu geimskipi á öldum ljósvakans. Hann vildi fá úr því skorið hvort tilgangur þeirra sem eiga peninga og hafa mátt fara með þá til útlanda væri að fela þá fyrir sér og öllum um borð í skipinu frá plánetunni RÚV. Prófessorinn sagði sem satt er að það er ávallt hægt að fela peninga og borga lægri skatta sem og brjóta lög. Þar höfðu fulltrúar RÚV rætt við Obi-Wan Kenobi íslenskra lagabálka varðandi hlutafélög og réttindi borgaranna. En skildu geimverurnar þetta?

Svarthöfðinn Darth Vader

Svarthöfði Samfylkingarinnar og VG

Það sem RÚV virðist nú helst vera að fela er hinn raunverulegi Darth Vader. Þeir hugsanlega bara vita ekki hvar hann er og telja sig hafa fundið hann á Tortóla eða í Panama, bláfátæku smáríki sem er að reyna að búa til tekjulind og skattstofna fyrir sig með því að bjóða lægri skatta rétt eins og Ísland gerir til að styðja við kvikmyndaiðnaðinn. Darth Vader fílar það í botn að kíkja hér við á Íslandi og leita leiða við að fá bæði VG og Samfylkinguna til að framselja Ísland til plánetunar RÚV sem svo getur framselt það allt til miðstjórnarríkjasambanda hvers konar.

Nú hvað gerðist árið 2013? Í pistli greinarhöfundar um lagabreytingu rétt fyrir kosningar 2013, þ.e. í tíð síðustu vinstri stjórnarinnar á Íslandi, var fjallað um að þingmenn bæði VG og Samfylkingarinnar samþykktu gagnrýnislaust ákvæði þess efnis að lágskattasvæði yrðu áfram lögmæt á Íslandi og Íslendingar gætu flutt þangað fé óhindrað. Það var því ekki bannað að fara með veskið sitt til Tortóla með peninga sem maður fékk eftir að hafa borgað á Íslandi himinháa skatta. Geimverurnar voru því frjálsari en menn hugðu.

Hvað með umsagnir sem bárust nefndinni í apríl 2013 – Efnahags- og viðskiptanefnd Alþingis?

Í okkar lýðræðislega kerfi gætir Alþingi að því að aðilar utan þings, þeir sem gangast undir nafninu ,,hagsmunaðilar“, fái frumvörp til skoðunar og umsagnar. Geta þessir aðilar komið fram með athugasemdir og ábendingar um það sem betur má fara. Þarna að baki standa aðildarfélög hvers konar, stofnanir og stéttarfélög svo eitthvað sé nefnt. Með þessu er verið að tryggja einmitt að lýðræðið virki og allir geti komið sínum athugasemdum að. Þetta er vel þekkt og mjög svo virkt. En hvað gerðist þegar frumvarp á skjali nr. 629 á 141. löggjafaþingi var sent út til umsagnar?

Frumvarpið fjallaði um lágskattasvæði eins og áður hefur verið komið að. Það fjallaði um heimildir móðurfélaga til að nýta skattalegt tap þess og hagnað dótturfélags á lágskattasvæði til að netta út á móti skatti á Íslandi. Umsagnarbeiðnir voru sendar til 31 aðila. Það barst aðeins 1 umsögn !

Þeir sem ekki svöruðu og gerðu því engar athugsemdir við frumvarpið:

1. Alþýðusamband Íslands með um 105 þúsund félagsmenn og 50 aðildarfélög
2. Bandalag háskólamanna með um 11 þúsund félagsmenn og 28 aðildarfélög
3. Bandalag starfsmanna ríkis og bæja með um 21 þúsund félagsmenn og 26 aðildarfélög
4. Bankasýsla ríksins
5. Deloitte hf
6. Félag atvinnurekenda
7. Félag löggiltra endurskoðenda
8. Fjármálaeftirlitið
9. Hagsmunasamtök heimilanna
10. Kauphöll Íslands
11. KPMG hf
12. Landsamtök lífeyrissjóða
13. Lögmannafélag Íslands
14. Neytendasamtökin
15. Neytendastofa
16. Ríkisendurskoðun
17. Ríkissaksóknari
18. Samband íslenskra sveitarfélaga
19. Samkeppniseftirlitið
20. Samtök atvinnulífsins
21. Samtök fjárfesta
22. Samtök fjármálafyrirtækja
23. Samtök iðnaðarins
24. Samtök starfsmanna fjármálafyrirtækja
25. Seðlabanki Íslands
26. Skattrannsóknarstjóri ríkisins
27. Tollstjórinn í Reykjavík
28. Umboðsmaður skuldara
29. Verðbréfaskráning Íslands hf
30. Viðskiptaráð Íslands

Sá aðili sem svaraði og gerði athugasemdir við frumvarpið:

1. Ríkisskattstjóri

Það barst því aðeins ein umsögn!

Hver var athugasemdin?

Umsögn ríkisskattstjóra frá árinu 2013 – Eina svarið sem barst !

Ríkisskattstjóri gerir athugasemd (hér má finna pdf skjalið) við að lagt sé til þess í 1. gr. frumvarpsins að gerð verði breyting á 57. gr. (a) laga nr. 90/2003, um tekjuskatt. Í þessu frumvarpi var eftirfrandi lagt til:

…sérstaklega verði kveðið á um það í 5. mgr. ákveðisins að tap sé eingöngu hægt að færa á móti hagnaði lögaðila á lágskattasvæði (CFC-félaga) sem eru í eigu íslenskra félaga eða einstaklinga.

Á þetta benti pistlahöfundur sértaklega í pistli sínum nýlega varðandi þessa tilhögun síðustu vinstri stjórnarinnar á Íslandi rétt fyrir kosningarnar 2013. Þarna voru vinstri menn í raun og sann að heimila það sem þeir í dag eru að mótmæla og kalla að sé skelfilegt lögbrot. Pistlahöfundur benti á aðra leið sem væri betur fallið vinstri mönnum en þeir fóru hana ekki þó svo að ríkisskattstjóri hafi bent á sambærilega leið til að forðast fullnýtingu lágskattasvæða ef svo má að orði komast. Því lagði ríkisskattstjóri til með umsögn sinni eftirfarandi:

Að mati ríkisskattstjóra er það orðalag sem lagt er til í a-lið 1. gr. frumvarpsins ekki nógu skýrt að þessu leyti.

Hér á ríkisskattstjóri við að hann hafi frá lögfestingu 57. gr. a í tekjuskattslögunum túlkað ákvæðið þannig að tap sem myndast í rekstri CFC-félags megi eingöngu færa á móti hagnaði sem myndast síðar hjá sama CFC-félagi. Hann vill því meina að tapi félag á lágskattasvæði sé þarna glufa sem getur leitt til þess að færa má tap félags á lágskattasvæði (ekki aðeins hagnað) á móti rekstri móðurfélags á Íslandi sem enn og aftur leiðir til þess að meira er úr að moða fyrir hið íslenska móðurfélag til að færa á móti sköttum á Íslandi.

Ríkisskattstjóri segir hér í raun að með þessari lagasetningu síðustu vinstri stjórnarinnar á Íslandi hafi enn og aftur verið að auka á glufur í kerfinu í stað þess að fylla í þær.

Það sem vekur undrun að eitt aðildarfélag Bandalags háskólamanna, þ.e. Félag fréttamanna, hafi ekki í gegnum sín aðildarsamtök komið þarna athugasemdum að. En þar sem að einstakir fréttamenn innan RÚV sem og verktakar þeirra eru í stjörnustríði af einhverju tagi má ætla að þeir hafi með óvinveittri yfirtöku tekið yfir Félag geislafræðinga og hafið framleiðslu á öflugri geislavopnum fyrir Kastljósið til að halda áfram gandreið sinni á öldum ljósvakans.

Lýðræðið og lögin

Við höfum leikreglur í þessu samfélagi og afar rótgróið og öruggt Alþingi. Þetta berum við að virða og einnig að virða forseta landsins og þau embætti sem við eigum til að reka okkar samfélag. Framangreind stéttarfélög, stofnanir, landsamtök og fulltrúar fyrirtækja höfðu í þessu máli allir jöfn tækifæri til að koma að athugasemdum. Ef aðeins eru teknir saman aðildarfélagar stéttarfélaganna sem að framan greinir telja þeir um 150 þúsund manns.

Þetta þýðir að um fulltrúar og aðildarfélög um 45% þjóðarinnar höfðu engar athugsemdir uppi varðandi málið, um 63% þeirra sem voru á kjörskrá í kosningum til Alþingis í apríl 2013 og um 78% af þeim sem greiddu atkvæði í þeim kosningum.

Hvenær má vænta þess að aðildarfélagar þessara fjölmörgu stéttarfélaga, félagar í félagi atvinnurekenda, fréttamanna og annarra samtaka muni kalla eftir svörum frá sínu fólki hvers vegna í ósköpunum þeir gerðu engar athugasemdir við efni frumvarpsins í tíð síðustu vinstri stjórnarinnar á Íslandi? Er lýðræðið ekki að virka?

Höfum það sem sannara reynist í þessum málum.

Gætum að mannréttindum, lögum og reglum.

Síðustu ár hefur mikið verið rætt um stjórnarskránna. Einhverjir hafa fjallað um ,,nýju stjórnarskránna“ sem getur ekki annað en verið núgildandi stjórnarskrá með síðari breytingum en síðast var stjórnarskrá lýðveldisins breytt með lögum nr. 91/2013.

Gildandi stjórnarskrá er ,,nýja“ stjórnarskráin

Það að halda því fram að hin ,,nýja stjórnarskrá“ sé eitthvað plagg sem fáeinir einstaklingar skrifuðu upp eftir að hafa verið skipaðir af vinstri ríkisstjórn á Alþingi í kjölfar þess að Hæstiréttur, sem er sjálfstæður í störfum sínum sbr. V. kafla stjórnarskrárinnar, sagði flesta kjörna með röngum hætti í ólögmætum og illa undirbúnum kosningum til svokallaðs Stjórnlagaþings árið 2010.

Ekki er séð að þeir sem dróu upp þetta plagg hafi séð ástæðu til þess að fara að gildandi stjórnarskrá. Má draga þá ályktun að þeir hefðu að öllum líkindum ekki heldur farið að því skjali sem þeir hafa nú dregið upp sjálfir og básúna nú að sé ,,nýja“ stjórnarskráin. Óvíst má þykja að menn gætu staðist freistinguna á að brjóta efnistök í eigin skjali væru hagsmunir þeirra í húfi sbr. brotið sem var framið opinberlega. Þetta var brot á stjórnarskrá sem þjóðþingið samþykkti lögum samkvæmt á tveimur þingum eftir kosningar þar á milli.

Stjórnarskrárbrot sem fáir hafa fjallað um

Þar sem menn sáu hve auðsótt væri, þ.e. væru menn við völd, að brjóta stjórnarskrá Íslands var gengið lengra í því efni. Í 1. mgr. 65. gr. VII. kafla stjórnarskrárinnar segir:

Allir skulu vera jafnir fyrir lögum og njóta mannréttinda án tillits til kynferðis, trúarbragða, skoðana, þjóðernisuppruna, kynþáttar, litarháttar, efnahags, ætternis og stöðu að öðru leyti.

Í 1. mgr. 72. gr. í sama kafla stjórnarskrárinnar segir:

Eignarrétturinn er friðhelgur. Engan má skylda til að láta af hendi eign sína nema almenningsþörf krefji. Þarf til þess lagafyrirmæli og komi fullt verð fyrir.

Þessar setningar getur hvert mannsbarn skilið. Skiptir litlu hvaða lagabálkar eru búnir til sem heyra undir stjórnarskránna og þessi ákvæði. Stjórnarskráin er rétthærri öðrum lögum. Öll önnur lög, sem gera það að verkum eða leitast við að þynna út framangreind ákvæði, eru til þess gerð að koma eignum eða óbeinum eignaréttindum frá einum til annars eða auka rétt ríkis og sveitarfélaga til inngripa. Það að fara á skjön við þessi ákvæði stjórnarskrárinnar er vandasamt og er einnig ákveðin ógn við réttarríkið, frelsið okkar, þjóðina og framtíð okkar allra.

Hvers vegna voru eignir teknar af fólki án laga og aðeins einstakir aðilar látnir fá sínar eignir aftur en aðrir voru ,,teknir af lífi“ á árunum 2008 til 2013?

Nýskipaður utanríkisráðherra kom fram nýlega og tjáði almenningi að efnahagslífið væri sterkt, eiginfjárstaða bankakerfisins til fyrirmyndar og framtíðin væri björt. Þetta má til sannsvegar færa. En á hvaða grunni byggist þetta? Jú, þetta byggist m.a. á eignaupptöku á framangreindu tímabili.

Hvers vegna bregst enginn við?

Í skýrslu sem pistlahöfundur vann varðandi nauðungarsölur á Íslandi var komið að umfjöllun um að 57. grein nauðungarsölulaga nr. 90/1991. Þar kom fram að þessi grein er ekki að virka sem vörn fyrir gerðarþola. Hún segir í stuttu máli að úrræði gerðarþola, þ.e. til að leita réttar síns hvort eignin hafi verið seld á markaðsverði í nauðungarsölu eða endursölu frá gerðarbeiðanda síðar, kviknar þegar gerðarþoli hefur misst eign sína og oftar en ekki aleiguna.

Í þeim tilvikum sem voru skoðuð og fjallað er um í þessari skýrslu frá því í janúar 2010 tók það um 6 ár eftir nauðungarsölu og alla leið upp í Hæstarétt til að fá úrlausn slíks máls. Í öllum tilvikum, þar sem málum var ekki beinlínis vísað frá, úrskurðaði rétturinn að ekki hefði tekist að ,,sanna“ að eign hafi verið seld undir markaðsverði af hálfu gerðarbeiðanda. Skýrslan inniheldur upplýsingar um eignir sem voru seldar nauðungarsölu talsvert fyrir hrunið og til ársins 2009.

Þetta nákvæmlega sama virðist hafa komið upp þegar fyrirtæki, eignir og húsaskjól fólks var selt ofan af því eftir hrun og í miðju hruni. Fyrirtæki voru yfirtekin í gífurlegu gengisfalli og haldið á bókum banka svo lengi þar til viðkomandi aðilar og fyrrum eigendur urðu máttvana.

Þá gátu þeir ekki lengur nýtt tengslanet, aflað sér tekna og voru þurrausnir fjármagni. Á þeim tímapunkti þótti tímabært að rétta af gengið, sæta færis og selja svo. Þótti það hið eðlilegasta mál að setja bankakerfið í þrot, hirða eignasafn út úr því sem hentaði, selja það með 100% láni en þó aðeins á brotabrot af því verði sem fjárflæðið sagði til um á þeim sama tíma. Því og þess vegna var verðmatið rangt.

Dæmi um Jón, Sigga, Helgu, Dóru og Baldur

Jón fasteignafrömuður fékk að kaupa fasteign sína aftur, sem tekin var af honum fyrir hrun vegna áhvílandi gengisláns er fór upp úr öllu valdi. Lánið var komið í 600 milljónir og leigan var 2 milljónir á mánuði. Gjaldþrota bankinn tók yfir einkahlutafélag Jóns eftir að hafa gjaldfellt lánið. Félagi Jóns, Óli, var í bankanum eftir hrun og leiðbeindi Jóni hvernig best væri að fara í þetta. Óli fór síðan úr ,,gamla“ bankanum yfir í ,,nýja“ bankann og fylgdi máli Jóns eftir.

,,Gamli“ bankinn setti ákveðin félög inn í Pegasus-eignarhaldsfélag sitt og afhenti það svo á ákveðnu verði til nýja bankans sem greiddi með skuldabréfi sem að baki stóð niðurgreidd ríkisábyrgð. Þegar hér var komið til sögu var búið að færa lánið sem Jón fékk á sínum tíma niður í 30 milljónir og eignin seld yfir í ,,nýja“ bankan á sama verði. Þar varð til ,,tjón“ fyrir kröfuhafa ,,gamla“ bankans upp á kr. 570 milljónir.

Í eldri pistli var fjallað um skattaundanskotið mikla en þá gerði þessi aðgerð það að verkum að leiðréttingin átti sér ekki stað í gamla félagi Jóns og myndaði þar ekki skattakvöð sem ríkið hefði getað sótt í fjármagn eða samið um síðar svo hafa mætti t.d. upp í áhættuna við ríkisábyrgðina af öllu hafaríinu. Það hefði verið skynsamt sé litið á málið út frá hagsmunum skattgreiðenda.

Jón stofnar nýtt fasteignafélag og kaupir nú með því eign sína aftur af bankanum á 60 milljónir og fær í meðgjöf 60 milljónir að láni, þ.e. hann kaupir eignina með 100% láni í nýstofnuðu félagi með enga rekstrarsögu. Gamla félagið er sett í þrot.

Eignin fór aldrei í útboð eða ,,opið söluferli“ þar sem hæsta verð hefði verið slegið á opnum og gegnsæjum markaði. Það var gert til að tryggja að eignin færi alls ekki á markaðsvirði þess tíma og ekki í ,,rangar“ hendur. Þegar rætt er um mikilvægi nauðungarsölu var þessa getið sérstaklega, með greinargerð sem fylgdi frumvarpi til nauðungarsölulaga á sínum tíma, að söluferlið yrði opið. Það var gert svo markaðsverð fengist þó svo að aðeins sé kröfuhafinn þinn á kauphliðinni og enginn annar. Þökk sé gildandi nauðungarsölulögum. Hefur eitthvað breyst um kraftana sem þarna búa að baki?

Jón fær því eignina aftur og heldur áfram á rukka inn þessar 2 milljónir á mánuði frá leiguliða sínum. Bíðið nú við! Er það ekki þekkt þumalputtaregla úr viðskiptum með fasteignir og félög á Íslandi að virði félags sé um 120 mánaða leiga, þ.e. leigan á mánuði margfölduð með 120 mánuðum?

Hvað gerir það? Það gerir 480 milljónir króna. Bankinn hefur því gefið Jóni dágóða summu í kaupæti með láninu. Lánið stendur aðeins í 60 milljónum. ,,Nýi“ bankinn er með frábæra eiginfjárstöðu því hann fékk lánapapprínn með eigninni á 30 milljónir sem nú stendur í 60 milljónum. Ekki að undra að eiginfjárstaða bæði Jóns og bankans sé nú til fyrirmyndar og bankinn getur haldið áfram að lána Jóni sem er með nóg veðrými á eigninni og getur framkvæmt ómælt á næstu árum. Ætli hann leiti tilboða eftir þetta í lán frá hinum bönkunum og efli þannig samkeppni um vexti og kjör á markaði?

En hvað með Sigga? Hann fékk félag sitt ekki til baka, hann fékk ekki að bjóða í þegar Jón fékk eign sína afhenda aftur án þess að þurfa að hafa fyrir því. Siggi er sá sem leigir af Jóni og hefði auðveldlega getað lokað þessum ,,díl“ á hærra verði.

Hvað með Helgu? Það er ung kona sem missti heimili sitt og var með tvö ung börn á framfæri. Hvað með hjónin Dóru og Baldur? Þau ráku lítið verktakafyrirtæki og öll tækin þeirra voru seld úr landi, fasteignir boðnar upp og fótunum kippt undan rekstrinum.

Eru ekki margir Íslendingar sem sjá sig einmitt þarna og í þessum hóp?

Ekki sama Jón og séra Jón

Á Íslandi virðist brotið á fólki út og suður og jafnréttisákvæði stjórnarskrárinnar varðar ekki aðeins kynbundið jafnrétti heldur að einnig það að fólk er jafnt fyrir lögum og ekki á að aðgreina fólk eftir efnahag þegar ákvarðanir hins opinbera eru teknar.

Eignir voru teknar af almenningi, venjulegu fólki og fyrirtæki hirt af vel meinandi einstaklingum sem voru að byggja upp sín fyrirtæki rétt eins og Jón. Ekki skal maður hallmæla Jóni sem er sjálfsagt að reyna að bjarga sér eins og allir hinir. Það er bara þessi aðferð sem stenst ekki skoðun.

Hvers vegna gætti fyrsta vinstri stjórnin á Íslandi ekki betur að réttlætinu? Þó svo að ráðherrar, þingmenn og menntamenn komi nú fram og segi að þetta gangi nú allt í haginn skal á það minnst hér að þær stoðir eru byggðar úr efnivið sem er rétt eins og hvert annað illa fengið fé. Hver er máttur stjórnarskrárinnar og laganna til handa fólkinu sé ákvæðum þeirra ekki beitt, ekki einu sinni af ríkjandi stjórnvöldum á hverjum tíma?

Þessu vildi pistlahöfundur getað skila til baka þó síðar verði. Það er torsótt mál en hvers vegna hefur enginn kært með vísan í framangreind ákvæði? Ætli það sé ekki vegna þess sem pistlahöfundur hefur áður bent á, þ.e. að fólk er þreytt, uppgefið og úrvinda, þurrausið fjármunum og illa statt til að takast á við baráttuna og ægivaldið?

Þetta eru fjárhagslegir flóttamenn í okkar eigin landi sem finna sér ekki lengur samastað heima hjá sér.

Getum við treyst þessum flokkum aftur fyrir næsta kjörtímabili?

Ég segi NEI !

Þeir hjá Reykjavík Media virðast hinir nýju kvótagreifar Íslands. Þeir liggja á auðlind sem flestir ef ekki allir miðlar á Íslandi sækjast eftir. Flestir vilja veiða upp upplýsingar, sinna úrvinnslu afurðanna og koma þeim á markað. En þarna er aðeins einn kvótagreifi og ein vinnsla sem rekin er af ríkinu. Hverju sætir?

Aðgang fyrir alla

Það er margítrekað búið að kalla eftir því að Panamagögnin komi hið fyrsta fyrir sjónir almennings en hið opinbera hlutafélag RÚV situr eitt að þessari auðlind þessa dagana og aðrar vinnslur fá ekki aðgang. Þetta er viðkvæm afurð og þarf að tryggja að hún skemmist ekki, það þarf að hýsa hana vel og vanda úrvinnsluna.

Svo virðist sem hún sé einnig gjöful og úr henni má fá fjölmargar tegundir af mismunandi stofnstærðum. Hvers vegna er ekki gert ráð fyrir auðlindarákvæði í hinni ,,nýju stjórnarskrá“ varðandi þetta mikla hvalrek?

Á móti kvótakerfi en með því þegar þeir eiga í hlut

Það vekur sérstaka undrun að þeir sem standa að þessari útgerð hafa oftar en ekki talað gegn kvótakerfinu ásamt því sem aðilar innan útgerðardeildar RÚV og utan eru beinlínis hatrammir andstæðingar skynsamlegrar stjórnunar á auðlindum hafsins. Nú virðast fjölmargir vinstri menn öðlast nýja sýn á kvótakerfi.

Fjölmargir virðast nú sjá mikilvægi þess að halda í auðlindina sem rak að ströndum Íslands frá Panama þó hún sé í höndum fámennrar ,,klíku“, einnar ríkisrekinnar útgerðar sem fjármagnar þetta og verktaka á hennar vegum sem gengur undir nafninu ,,Reykjavík Media“.

Það virðist eiga að vinna úr henni smátt og smátt til að hámarka afraksturinn en þar sem hún skemmist hratt virðist ekki gætt að nýtingunni með því að hleypa öðrum að með hugsanlega fullkomnari vinnslulínur en ríkisrekið RÚV. Það er eins með fréttir, afurðir og fjármagn að ef of mikið af hvoru um sig er sett á markað í einu rýrnar verðið.

Þetta er lögmál sem stennst tímans tönn.

Léleg framganga í skjóli skattaskjóla

Nú er spurning hvort þessi Panamskjöl valdi allsherjar glundroða. Útspil forseta Íslands um að sækjast eftir endurkjöri er í þá átt að skapa einhverja ró á meðal almennings.

Svo virðist sem um sé að ræða skipulagða aðför að ríkjandi stjórnvöldum og því tekur Ólafur Ragnar Grímsson þessa ákvörðun. Markmiðið er að skapa úlfúð og ófrið með framsetningu þar sem almenningi eru sýnd fyrst aðeins ókræsileg sæskrímsli þessarar auðlindar í stað þess að finna eitthvað jákvætt eins og þorsk og ýsu sem eflaust er að finna.

Tryggingafélag Landvirkjunar á Bermuda, sem þingflokksformaður Samfylkingarinnar og fyrrum ráðherra VG stofnuðu, er eitt gott dæmi um fremur nytsama tegund og meinlausa með öllu.

Eiturnöðrur

Það þekkja allir að það geta leynst eiturnöðrur í auðlindum, áhætta og ólgusjór. Líkur eru á að í Panamaskjölunum sé eitthvað slíkt. Á meðan fólki er ekki sýndur munurinn á því og afburðagóðu hráefni, sem vel má vera að sé í boði innan um hákarlana, er væntanlega markmiðið að sýna fram á aðeins viðbjóðinn, hættuna og ógn. Svo á að öllum líkindum að bera þetta allt saman við aðrar frábærar afurðir eins og þorsk, ýsu og karfa og segja; ,,…þetta er líka stórhættulegt og óætt!“

Þeir sem þekkja til líkingarsögu heimspekingsins Plató og lærisveins hans Sókretes um fólkið í hellinum skynja mjög vel leið RÚV að markmiði sínu. Það á að blekkja, skemma og taka völd með valdi, útursnúningi og væringum.

Upplýsum alla, opnum á gagnaflæðið handa Íslendingum. Lofum öðrum fjölmiðlum að vinna úr þessum gögnum og myndum heilbrigða samkeppni, ekki einokun RÚV.

Lokað fyrir auðlindina

Vandinn er sá að þegar þessir medía menn loka á gagnamagnið (c.a. 11 milljón skjöl) sitja þeir einir að efninu og dæla því inn á markaðinn eftir því sem þeim hentar. Þetta ber vott um e.k. ,,bíssnesvit“ að hætti vágesta er nýta skattaskjólin til annars en heiðarlegra viðskipta. Hér virðist um að ræða afskaplega takmarkaða samfélagslega ábyrgð gagnvart öðrum miðlum og Íslendingum öllum. Þetta er einokun.

Slík framganga hefur aldrei verið liðin í nýtingu annarra auðlinda á Íslandi sem er sameiginleg þjóðinni, þ.e. að einn aðili sitji að öllu. Á meðan nýtist auðlindin ekki öðrum sem hugsanlega gætu gert eitthvað meira úr þessu, betra, nytsamara og skapað nýliðun í stétt blaðamanna á Íslandi.

Nei, þeir ákveða að sitja einir að þessu öllu saman ásamt ríkisútgerðinni RÚV. Í sama mund og þeir gera slíkt agnúast þessir velunnarar vinstri aflanna á Íslandi út í kvótakerfið í sjávarútvegi. Siðferðið nær ekki lengra en upp að naflanum.

Eru gæðin tryggð sitji RÚV að öllum aflanum?

Ríkisforsjá í ríkisútgerð?

Einokun !

__

Frétt – Sumardaginn fyrsta 21. apríl 2016

RÚV flutti frétt á Rás 1 kl: 08:00 í morgun þess efnis að Kjarninn og Stundin hafi birt frétt í samstarfi við Reykjavík Media varðandi hýsingu á fjármunum og duldar eignir á eyjum út í heimi. Vísa þessir miðlar til þess að hugsanlega sé þar að finna fjármuni og eignir sem slitastjórn Glitnis hefur verið að leita að. Þetta kallar maður betrun og þroskamerki í fjölmiðlaheiminum þó svo að dómur verður ekki felldur um sekt eða sýknu. Ávallt væri betra að stjórnvöld tækju rannsókn að sér og niðurstaða fengist með dómum en helst samningum. Við verðum að gæta að réttarríkinu á Íslandi. Forðumst fordóma.

Með þessu virðist sem RÚV sé að huga að grasrótinni í fjölmiðlaflórunni á Íslandi en þar hefur verið valið úr hver fengi hvað frá Reykjavík Media og einnig hvenær. Svo virðist sem þessir aðilar hafi skilið sneiðina hér í pistlinum og hafa nú greinilega samþykkt frjálst framsal á kvóta eða komið undir sig leiguliðum.

Gleðilegt sumar 🙂

Það allra versta sem getur komið fyrir stjórnmálamann er þegar hann er uppvís af ósannsögli eða hræsni. Sama á við um fréttamenn og reyndar hvern sem er í raun og sann.

RÚV er nú að böglast við að klóra í bakkann eftir að hafa snúið fjölmörgum Íslendingum á haus og skapað mikla úlfúð um bæði stjórnarskrá landsins og Alþingi, stjórn landsins og svo auðvitað staðið vörð um e.k. ,,skrattaskjól“. Hefur þetta ríkisrekna opinbera hlutafélag orðið uppvíst að því að segja ósannar fréttir, vélað menn til að leggjast á höggstokk í boði verktaka sem virðast hafa lítið vit á viðfangsefni sínu rétt eins og þeir sem rífa gömul og vernduð hús í viðkvæmu umhverfi.

Þarna starfa viðvaningar innan um annars margt ágætis sárasaklaust starfsfólk sem fær á sig blóðsletturnar við atganginn. Það getur orðið ansi subbulegt og sérstaklega þegar margir kóngar eru vegnir í einu. Því virðist sem sérhæfingin hafi leitt til þess að taka bara einn í einu. Maður þekkti þetta úr vinnunni í blóðinu í sláturhúsinu á Hellu í Rangarþingi hér um árið.

Óbragð í munni

Fyrrum ráðherra VG í síðustu vinstri stjórn Íslands, núverandi þingflokksformaður Samfylkingarinnar og vonbiðill til formanns þeirrar fylkingar sem og sá er nú vill kljúfa Samfylkinguna og búa til glænýja breiðfylkingu með fundum í Iðnó en er samt í framboði til formanns hafa tekið beinan þátt í að skattaskjól séu notuð af Íslendingum. Þau hafa ,,vélað“ íslensk fyrirtæki í skattaskjól sjálf og það með eins lögmætum hætti og kostur er. Varla telst það glæpur nema fyrir þær sakir að þau hafa nú verið að segja að þetta sé allt glæpur.

Í síðasta pistli mínum er fjallað um að í mars 2013 hafi Samfylkingin og VG sporðrennt frumvarpi til laga um lágskattasvæði, þ.e. það sem þau kalla mörg í dag skattaskjól. Þar var allt gert heimilt samkvæmt þeim lögum sem VG og Samfylkingin mælti fyrir, lagði fram og afgreiddi með ,,stæl“.

Úrklippa úr ársskýrslu Landsvirkjunar frá árinu 2003

Nú er svo komið að makar sumra þessara snillinga hafa afneitað sjálfum sér varðandi stofnun og umsýslu með félög í skattaskjólum og eru fulltrúar VG og Samfylkingarinnar á þingi og utan þess á útopnu að þvo hendur sínar af skattaskjólum sem nú eru sögð rót alls ills. Líklega er heppnin að einhverju hluta með þeim þar sem fjöldi vinstri manna eru nánast ef ekki algjörlega trúlausir og geta því vænst þess að lenda ekki í helvíti þökk sé þeirrar stefnu sem tekin var snemma á uppvaxtarárunum og ríghaldið er í undir öðrum merkjum.

Hins vegar fer ekki óbragðið og það mun lengi dafna eftir þann kæsta framburð sem þessir aðilar hafa haft um menn og málefni á undanförnum misserum.

Stjórn Landsvirkjunnar stofnaði félag í ,,skattaskjóli“

Eins og pistlahöfundur hefur oftar en ekki bent á er ekkert að því að fólk og félög leiti allra leiða til að fá eitthvað ódýrt en öruggt sé slíkt löglegt og tryggt. Landsvirkjun vill hagræða eins og önnur virt félög hér á landi og víða um heim án þess að fara á skjön við lög eða reglur enda starfa þar vel meinandi menn og konur. Sú skilvirkni felst meðal annars í því að stofna félag sem næst virkum tryggingamarkaði til þess að spara og hagræða, leita leiða til að skattfé fari ekki í annars of dýr tryggingafélög sem við erum öll sjálf að amast út í hér heima.

Úrklippa úr ársskýslu Landsvikjunar frá 2003 – Upplýsingar um stofnun trygginafélags á Bermuda

Bermuda varð fyrir valinu vegna þess að hagsýnir menn innan vébanda Landsvirkjunar voru að vinna heiðarlega og af kostgæfni fyrir skattgreiðendur á Íslandi. Markmiðið var að spara og gæta samt að því að skila því til skattsins sem honum bar og gott betur en það.

Hins vegar voru þarna innanbúðar í stjórn þessa annars ágæta félags aðilar sem eru landsþekktir fyrir hræsni ef ekki lygi. Hver man ekki eftir því þegar SÍA skjölin voru birt en þar var að finna skjöl og skýrslur námsmanna í hinni sósíalísku Austur Evrópu t.a.m. A-Berlín. Þar rituðu þeir niður sannleikan um eymdina en þegar þeir ávörpuðu land og þjóð hér heima lugu þeir flesta fulla. Í þessu efni má í sama mund ryfja upp Svavarssamningana varðandi ICESAVE enda hangir lygin saman á slefberunum og slúðurdrottningunum. Eftir höfðinu dansa limirnir.

Pistlahöfundur biður RÚV vinsamlegast að hætta að verja þessi ,,skrattaskjól“ þar sem skrattakollar VG og Samfylkingarinnar fela sig og kalla þá fram í sviðsljósið til að svara fyrir þetta brölt sitt. Svo virðist sem að sumir séu komnir í dágóða sláturstærð og gætu hentað vel fyrir Kastljósið.

Stöndum vörð um traustið og trú á fólkið okkar en gerum sanngjarnar kröfur. Höfnum ósannindum og sammælumst um það í hvaða flokki sem við erum.

Lifið heil.

Atburðarás síðustu daga hefur verið hröð. Fjölmargir blaðamenn hafa fjallað um málefni líðandi stundar og sumir þurft að draga blokkina úr rassvasanum án mikils undirbúnings til að hripa niður fréttir sem vart eru ritrýndar. Hið sama má segja um stjórnmálamenn.

Þeir hafa ófáir á vinstri vængnum farið upp í pontu á hinu háa Alþingi, dregið systur sínar og bræður inn á filtteppið hjá ÍNN eða í leðursófasettið hjá RÚV án þess að vinna að greiningavinnu eða n.k. bakgrunnsathugun eins og gert er áður en starfsmönnum Leifstöðvar er hleypt inn til vinnu. Það virðist ekki veita af slíkri úttekt víðar á vinnustöðum eins og hjá RÚV og á hinu háa Alþingi.

Frumvarp til laga

Umræða á Alþingi 11. mars 2013

Fyrrverandi fjármála- og efnahagsráðherra, Katrín Júlíusdóttir, mælti fyrir frumvarpi í ráðherratíð sinni í mars 2013 til laga um breytingu á lögum um tekjuskatt og lögum um staðgreiðslu opinberra gjalda (skattlagnir á lágskattasvæðum og starfsmannaleigum). Á þessum tíma, ef pistlahöfundur man rétt, var helsti ráðgjafi ríkisstjórnarinnar Indriði H. Þorláksson skattasérfræðingur með meiru. Afrakstur þessara breytinga má meðal annars finna í höfuðstöðvum íslenskrar skattheimtu, þ.e. hjá Ríkisskattstjóra.

CFC Eyðublað fyrir lágskattasvæði

Áður en þetta fór í gegnum Alþingi í tíð síðustu vinstri stjórnarinnar á Íslandi fór þetta eðli máls samkvæmt í gegnum afgreiðslu efnahags- og viðskiptanefndar Alþingis. Var formanni nefndarinnar gert að vera framsögumaður og flutti álit nefndarinnar. Þar segir m.a. í athugasemdum um frumvarpið:

Lagt er til að sérstaklega verði kveðið á um það í 5. mgr. ákvæðisins að tap sé eingöngu hægt að færa á móti hagnaði lögaðila á lágskattasvæði (CFC-félaga) sem eru í eigu íslenskra félaga eða einstaklinga. Hér er um að ræða áréttingu og ítarlegri skilgreiningu á reglu sem ákvæðið felur nú þegar í sér.

Framsögumaðurinn og formaður nefndarinnar, Helgi Hjörvar, nú þingflokksformaður Samfylkingarinnar, mælir hér með því að Íslendingar og íslenskir lögaðilar eins og fyrirtæki, opinber hlutafélög eins og Landsvirkjun og verktakafyrirtæki í múr- og timburverki á Íslandi geti stundað þessa iðju óhindrað um víða veröld. Sama má segja með blikkara, pípulagningarmeistara og aðra meistara víða um land.

Reyndar er ólíklegt, þrátt fyrir þessa löggjöf Samfylkingarinnar og VG, að sjálfstæðir smiðir og múrarar hafi tíma til að koma upp flókinni starfsemi á aflandssvæðum sér til handa. Það vill svo til að það mikið umleikis um þessar mundir hjá þessum frábæru atvinnurekendum sem og verktökum þeim tengdum. Þeir eru a.m.k. að vinna vinnuna sína.

Afgreiðsla nefndarinnar var með þeim hætti að hleypa málinu óbreyttu í gegn og við málinu tók Katrín Júlíusdóttir, núverandi þingmaður Samfylkingarinnar og baráttukona gegn ,,skattaskjólum“ eins og hún kallar þessa óáran í dag.

Aðrir sem unnu þetta innan efnahags- og viðskiptanefndar voru þau Magnús Orri Scram, núverandi formannsframbjóðandi í Samfylkingunni, Árni Þór Sigurðsson frá VG og núverandi sendiherra, Skúli Helgason núverandi borgarfulltrúi Samfylkingarinnar, Pétur H. Blöndal heitinn og Lilja Mósesdóttir. Þeir sem áttu sæti í nefndinni en voru fjárverandi afgreiðslu málsins voru þau Lilja Rafney Magnúsdóttir frá VG, sem betur hefði átt að mæta í ljósi yfirlýsingar hennar í liðinni viku, Eygló Harðardóttir og Guðlaugur Þór Þórðarsson.

Afgreiðsla málsins

Þann 11. mars 2013 mælti Katrín Júlíusdóttir fyrir þessu máli nr. 629 á 98. fundi 141. löggjafarþings Alþingis Íslendinga. Þar sagði þáverandi ráðherra m.a.:

Miðað var við að á þeim yrði tekið í þessu frumvarpi í þeim tilgangi að uppfylla skuldbindingar íslenska ríkisins samkvæmt EES-samningnum, en að mati ESA er í umræddum ákvæðum laganna gerður greinarmunur á grundvelli þjóðernis sem felur í sér mismunun sem er ekki í samræmi við grunnreglur EES-samningsins.

Hér gefur að líta að svo virðist sem fyrri löggjöf hafi farið í n.k. manngreiningarálit og ekki staðist ákvæði EES-samningsins að mati ESA. Því varð að koma fram breyting.

Svo segir ráðherran í ræðu sinni:

Lagt er til að sérstaklega verði kveðið á um að tap sé eingöngu hægt að færa á móti hagnaði lögaðila á lágskattasvæði, þ.e. CFC-félaga, sem eru í eigu íslenskra félaga eða einstaklinga. Hér er um að ræða áréttingu og ítarlegri skilgreiningu á reglu sem ákvæðið felur nú þegar í sér.

Þetta ákvæði þýðir að ef Íslendingur á í beinu eignarhaldi frá Íslandi félag á lágskattasvæði getur hann nýtt tap á rekstri á Íslandi gegn hagnaði á lágskattasvæðinu. Hér er ráðherran ekki aðeins að viðurkenna heimildir til að menn eigi félög á lágskattasvæðum heldur er ráðherran að mæla fyrir frumvarpi að lögum þar sem ákveðnu fyrirkomulagi er komið á varðandi skattinnheimtu. Með þessu fyrirkomulagi varð heimilt að færa tap í rekstri á Íslandi á móti hagnaði sem myndast hjá félagi á lágskattasvæði. Hvað þýðir þetta? Jú, þetta þýðir lækkun skatttekna fyrir ríkissjóð.

Ef vinstri stjórnin hefði verið samkvæm sjálfri sér hefði hún lagt til að hagnaður dótturfyrirtækja á aflandssvæðum, og eftir atvikum lágskattasvæðum, yrði skattlögð sér og óheimilt yrði að nýta skattalegt hagræði af tapi móðurfélags á Íslandi. Svo er það skattasnillinga að ráða í hvort þetta stæðist jafnræðissjónarmið og stuðlaði að því að gera Ísland samkeppnishæft á alþjóða mörkuðum.

Hér skal áréttað að pistlahöfundur er ekki á því að farin verði þessi leið sem hér er skotið inn. Slíkt myndi ekki styrkja samkeppnishæfni Íslands.

Samfylkingin bannar svarta lista yfir lágskattasvæði

Það er vel þekkt að skattaundanskot eru tíð á eyjum fjarri Íslandi. Það er reyndar einnig vel þekkt á Íslandi og ef einhver þykist ekki kannast við slíkt er sá hinn sami að segja ósatt. Þetta veit hvert mannsbarn sem hefur sinn feril með því að selja smávarning á tombólu eins yndislegt og það nú er.

Í ræðu þáverandi ráðherra kom eftirfarandi fram:

Lögð er til sú breyting að fella brott skyldu ráðherra til að birta lista yfir þau lönd og svæði sem skattlagning samkvæmt CFC-ákvæðinu tekur til. Svokallaður svartur listi yfir lágskattaríki getur hvorki talist bindandi né tæmandi þar sem endanlegt skatthlutfall þeirra félaga, sjóða eða stofnana sem hafa þar skattalegt heimilisfesti liggur ekki fyrir nema eftir nákvæma yfirferð skattyfirvalda. OECD hefur nú hætt útgáfu skilgreinds lista yfir lágskattaríki enda hafa öll ríki sem áður voru á slíkum lista skuldbundið sig til þess að veita upplýsingar um skattamál á grundvelli samninga.

Hér mælir ráðherra Samfylkingarinnar fyrir því að svartur listi yfir lágskattasvæði verði ekki lengur birtur almenningi. Hvers vegna má það vera að ráðherra Samfylkingarinnar geri slíkt? Dæmi hver fyrir sig.

Kostulega við þetta er og kaldhæðnislegt að í stóli forseta Alþingis, þegar Katrín Júlíusdóttir flutti framangreint frumvarp um frelsi til nýtingar lágskattasvæða á Íslandi, sat núverandi forsætisráðherra, Sigurður Ingi Jóhannsson. Hér má horfa og hlýða á innlegg hennar sem ráðherra.

Einn maður tók til máls utan framsögumanna

Umræðan var fremur lítilvæg um þetta mál á þessum tíma fyrir rúmum 3 árum.

Aðeins einn maður tók til máls utan framsögumannanna þeirra Helga Hjörvars og Katrínar Júlíusdóttur frá 1. umræðu til atkvæðagreiðslu eftir 3. umræðu. Það var Pétur Blöndal heitinn. Hann sagði:

Herra forseti. Við greiðum hér atkvæði um breytingu á lögum um tekjuskatt og lögum um staðgreiðslu opinberra gjalda. Þetta frumvarp er til komið vegna athugasemda ESA, Eftirlitsstofnunar EFTA, annars vegar gagnvart fyrirtækjum sem falla undir lágskattasvæði og skattlagningu þeirra og hins vegar varðandi skyldur starfsmannaleigna, að jafngilt sé hvort það eru innlendir eða erlendir aðilar. Þetta eru atriði sem nefndin öll flytur, efnahags- og viðskiptanefnd, og ég á hlut að því og stend að þessu máli og greiði því atkvæði.

Pétur var ærlegur maður, heill og hreinskiptinn. Það þekkir hver Íslendingur. Hann samþykkti þetta frumvarp enda ekkert óeðlilegt við það né framgang þess og leiðbeiningar frá erlendum stofnunum sem Ísland er aðili að. Þetta er einnig í samræmi við alþjóðasamninga sem Ísland hefur undirgengist og ekkert óeðlilegt út frá hlið fjármála og hagstjórnar.

Nú hleypur hjörðin í eina áttina enn. Þau eru nú villuráfandi í því kuldakasti sem RÚV hefur náð að spá fyrir og skapa í senn. Veðurstofa Íslands nær ekki svo langt að geta afrekað þvílíkt og annað eins.

Á mannamáli er allt þetta framferði fulltrúa VG og Samfylkingar kallað hræsni og hræsni skal það kallað.

Atkvæðagreiðslan

Þeir sem greiddu þessu svo atkvæði má lesa úr þessum skammstöfunum sem fengnar eru að láni af vef Alþingis.

AtlG, ÁI, ÁPÁ, ÁÞS, ÁsbÓ, ÁRJ, BirgJ, BJJ, BjG, BjarnB, BVG, GuðbH, GÞÞ, GBS, HHj, IllG, JóhS, JBjarn, JRG, KJak, KaJúl, KÞJ, KLM, LMós, LGeir, MT, MÁ, OH, ÓGunn, PHB, REÁ, SII, SF, SJS, SSv, TÞH, UBK, VBj, ÖJ.

Aðrir voru ekki viðstaddir og geta því borið það fyrir sig hvort heldur sem þeir telji að það henta eða ekki.

Góða helgi !

Mestu skattsvik sögunnar áttu sér stað í tíð síðustu ríkisstjórnar vinstri manna, ríkisstjórnar Jóhönnu Sigurðardóttur. Ekki hefur RÚV séð ástæðu til að fjalla um það í Kastljósi sínu.

Þáverandi fjármálaráðherra og aðrir ráðherrar þeirrar ríkisstjórnar ásamt aðstoðarmönnum þeirra bjuggu til eigið fé í bönkum dagsins í dag með því að hirða fé af skattgreiðendum með ,,hækkun í hafi“ um allt Ísland og jafnvel á erlendri grundu. Margir drukknuðu í þessu syndaflóði vinstri aflanna í landinu en öðrum var bjargað og voru ,,þeir útvöldu“.

Sala fyrirtækja og skipulagt skattaundanskot

Þeir sem að stærsta undanskotinu stóðu seldu fyrirtæki, eftir ormahreinsun, til sömu aðila og áttu þau fyrir hrun. Félögin voru oft seld á háum verðum, utan frjáls markaðar og í stað þess að fella niður lánin sem var eðlilegasti framgangsmátinn m.v. hrun á mörkuðum. Það var ekki gert því annars hefðu fyrirtækin þurft að taka slíkar ,,tekjur“ í gegnum rekstrarreikning félaganna og greiða skatt til samneyslunnar af þessari niðurfellingu áður en leiðréttingin næði inn á efnahagsreikning þessara ,,úrvalsfyrirtækja“. Gerir almenningur sér grein fyrir þessu og hve miklir fjármunir voru þarna í húfi?

Þetta verklag var væntanlega stundað og stjórnað af fjármálaráðherra og formanni VG, núverandi þingmanni VG með stuðningi núverandi formanns VG. Þetta var unnið af núverandi formanni Samfylkingarinnar sem og þeim fyrrverandi í tíð ríkisstjórnar þess hins sama, þ.e. Jóhönnu Sigurðardóttur. Þetta er allt falið í gögnum sem hafa ekki verið birt fyrir almenningi á Íslandi.

Allt tal um afslandseyjar í dag eru hjóm eitt þegar kemur að uppgjöri á okkar eigin aflandseyju, þ.e. Íslandi.

Hverjir voru þessi Pony og Pegasus?

Pony og Pegasus voru flokkar félaga sem hirt voru frá venjulegu fólki og fjárfestum og sumir misstu allt en aðrir fengu allt og jafnvel gott betur. Margir ráðgjafar úr bönkunum, sem unnu að því að ,,aðstoða“ eigendur þessara félaga, hirtu félögin jafnvel sjálfir vitandi vel um fléttuna, aðförina og skepnuskapinn. Fjölmargir fengu skattaniðurfellingu samhliða ormahreinsun í formi n.k. skuldaþvættis á aflandseyjunni Íslandi. Allt var þetta í boði fyrstu vinstri stjórnarinnar á Íslandi. Gæfulegt?

Í Pony flokkinn féllu félög með veltu undir 1 milljarði, hin fóru í Pegasusflokkinn. Svo var valið úr hvert þessara félaga fengu að lifa af og eftir atvikum valdir eigendur sem fengu einnig að lifa af, nú eða ,,deyja“. Fjölmargir tóku jafnvel eigið líf eftir þetta í orðsins fyllstu merkingu.

Félög voru ekki seld á frjálsum markaði, sbr. Borgun á dögunum, heldur unnið með fyrrverandi eigendum til að fela skipulagða skattasniðgöngu. Bankinn skóf af skuldir og afhenti eignir og fyrirtæki sömu einstaklingum og höfðu áður vélað með sömu bankamönnum að gíra sig upp í topp fyrir hrun.

Hví var þetta ekki skattlagt? Varð hér á landi til skattaskjól fyrir útvalda í boði VG og Samfylkingarinnar? Hvers vegna má ekki gera skjöl vegna þess arna opinber?

Skilningsleysið er algjört

Verst er þegar landinn virðist ekki skilja þetta. Þá fýkur í flest skjól.

Fámennur hópur rýkur niður á Austurvöll og mótmælir þeim sem hafa staðið sig best fyrir Ísland. Vissulega á að taka slíkt alvarlega. En verðum við ekki að hafa það fyrir satt sem sannara reynist í aðförinni að almenningi í landinu? Eru vinstri menn að blekkja okkur eina ferðina enn?

Skuldaniðurfelling á verðtryggðum lánum fór í gegnum efnahagsreikning þinn í tíð ríkisstjórnar Sigmundar Davíðs. Hvers vegna fékkstu ekki vaxtabætur á sama ári þar sem tekið var tillit til leiðréttingarinnar? Var það ekki vegna þess að þú fékkst það mikið niðurfellt að það myndaði tekjur? Einhverjir þurftu jafnvel að greiða skatta af leiðréttingunni. Allt var þetta framkvæmt lögum samkvæmt. Hvers vegna átti hið sama ekki við um Pony og Pegasus, útvalin fyrirtæki, úrval manna og kvenna í okkar samfélagi í tíð fyrstu vinstri stjórnarinnar á Íslandi? Hvers vegna !?

Allt tal um aflandseyjar og um siðferði er hjóm eitt þegar siðapostular háskólasamfélagsins eru meðvirkir með vinstri mönnum á Íslandi. Þeir gleyma öllu framangreindu, þeir vilja sleppa að segja söguna eins og hún var og gera almenningi grein fyrir að hann bjó á aflandseyju og býr þar enn á meðan VG og Samfylkingin er ofar fjörs á línu.

Siðapostularnir hafa hingað til verið margir tilbúnir að stökkva á vinsældarvagninn og hafa álíka mikið vit á fjármálum og nef þeirra nær. Þar er einmitt þar sem siðgæði þeirra stoppar, þ.e. við nefbroddinn.

Legið vel og lengi

Það að fréttamenn og verktaktakar RÚV hafi þurft að liggja óralengi yfir þessum Panamagögnum, þ.e. í allt að 10 mánuði, vekur sérstaka undrun. Venjulega nægði nokkuð skynsömum einstaklingi að lesa þetta yfir helgi og sjá að þarna væri um að ræða nokkuð þekkt fyrirbæri og þjónusta sem var auglýst í boði hér á landi um árabil. Þetta var og er þekkt þjónusta í fjármálaheiminum og í flestum tilvikum ekkert við hana að athuga gefi menn þetta allt upp til skatts.

Eru menn að segja að menn hefðu ekki þekkt til Panama?

Sem dæmi auglýsti banki slíka þjónustu sem núverandi formaður Samfylkingarinnar sat í stjórn hjá á sínum tíma. Þá var fjör og þá var gaman en nú safna menn bara skeggi og eru úfnir. Allt er þetta gert til að líta út eins og forseti ASÍ, skapa ímynd byltingarmannsins og baráttumanns almúgans. Selur það virkilega?

Skipulögð aðför að Sigmundi Davíð

Þrátt fyrir að Sigmundur Davíð hefði betur gert gögn sín opinber vekur athygli aðförin að honum og hans persónu. Hún var vel skipulögð. Hvers vegna tók hún svo langan tíma?

Hugsanlegt var að það yrði að undirbúa þjóðina með því að tala niðrandi um forsætisráðherra um nokkurt skeið, efna til andstöðu við hann og ræta hann hressilega fyrir þetta skúbb. Allt þetta var gert til að þóknast valdhöfum vinstri aflanna í landinu. Stór hluti almennings á Íslandi er síðan þvældur fram og til baka og gerður alveg snar ruglaður.  Þá var lagt til atlögu enda lá hann vel við höggi. Það var búið að stilla honum upp eins ógeðfellt og það kann að hljóma.

Á sama tíma virðast engar kröfur hafðar uppi um birtingu gagna um skepnuskapinn og undanskotin sem áttu sér hér stað rétt eftir hrun í tíð síðustu vinstri stjórnar Íslands.

Að eiga reikninga í Lúx eða á Panama var norm – Dulda byltingin

Að eiga reikninga í Lúxemburg virðist ekkert mál. Að eiga þar félög sem fléttast inná Panamastrendur er afar þekkt fyrirbæri og hefur verið það um langa hríð. Íslendingum sem og lögaðilum ber að gefa þetta upp og má reikna með að flestir hafa gert það. Hvað er þá málið?

Sem dæmi er til eyðublað hjá RSK sem fylla má út vegna þess arna.

Hver veit nema að þeir aðilar, sem stóðu að Panamalekanum, hafi undanfarið rakað að sér fé þegar skuldabréfaálag hækkaði vegna lekans? Voru gögnin seld? Voru þessi gögn notuð til kúgunar? Var eytt út nöfnum fyrir velunnara? Vilja menn nú valda enn meiri usla til handa byltingaröflum í landinu?

Já, það eru enn til byltingaröfl, fólk sem vill beita aðra valdi til að komast til valda. Hví ekki að styðjast við stjórnarskránna eins og hún er? Hún hefur komið okkur til góða hingað til og mun koma okkur enn lengra án meiri háttar breytinga.

Kalt í stjórnarandstöðu – Hurfu skuldir Alþýðuflokks og Kvennalista?

Stjórnarandstöðunni er orðið skítkalt í stjórnarandstöðu eftir velgengni ríkisstjórnarinnar á undanförnum misserum en að undanskilinni síðustu viku. Það hlýnaði aðeins í hruninu þegar þessir núverandi stjórnarandstöðuflokkar, utan Pírata, unnu að stærsta skattaundanskoti sögunnar. Það er allt óuppgert, gögn þar óbirt, gögn sem eru í höndum okkar sjálfra hér á Íslandi. Hvers vegna ekki að birta þau og gera það löglega?

Má ætla að gamli Alþýðuflokkurinn og Kvennalistinn hafi fengið ansi mikið niðurfellt en hvernig hurfu þessar skuldir flokka sem voru með allt í ,,skrúfunni“ fyrir hrun? Svo virðist sem enginn hafi lengur áhyggjur af þessum skuldum.

Á sama tíma og á þessu stóð hækkaði allt í landinu, engin leiðrétting á verðlagi fyrr en skuldaleiðrétting ríkisstjórnar Sigmundar Davíðs kom til og almenningur látinn borga og borga í gegnum lán sín og eignir sem hirtar voru síðan af fólki og fyrirtækjum á þessum tíma. Þetta kallast að ,,blóðmjólka almenning“. Eignir voru hirtar á nauðungarsölum og menn hreinlega skildu ekki hvers vegna heimilt var að bregða fæti fyrir suma en ekki aðra.

Pistlahöfundur gekk eftir þingmönnum VG og Samfylkingarinnar, eftir að hafa ritað skýrslu um nauðungarsölur, en þeir vildu ekkert gera með ,,fullnægjandi“ lagabreytingar þegar lög um nauðungarsölu voru endurskoðuð í tíð vinstri stjórnarinnar. Frumvarp að breytingum fór í gegnum allsherjarnefnd Alþingis og inn til umræðu, þar í gegn og samþykkt sem lög frá hinu háa Alþingi án þess að taka tillit til hagsmuna fólksins í landinu, gæta að eðlilegu jafnvægi á milli gerðarbeiðenda og gerðarþola.

Skipulögð aðgerð vinstri manna á ískaldri ,,Tortólaeyju“ norður við Íshaf

Það myndast ekki þessi hagnaður í bönkum síðustu ára vegna hækkunar á seðilgjöldum til almennings. Það gerðist í með eignaupptöku og skattaundanskoti í formi þess að selja ,,kjötið“ í fyrirtækjum í ný félög og síðan afhenda þessi félög og eignir velunnurum með fléttu sem skapaði engar tekjur fyrir samneysluna.

Hvers vegna fór leiðrétting þessara lána ekki í gegnum rekstrarreikning hinna yfirteknu félaga og þar inn á efnahagsreikning þeirra? Hví var ekki hæstbjóðenda svo boðin þessi félög til kaups á markaði eftir að þau höfðu greitt sína skatta?

Ekki má svo gleyma tilrauninni til að hirða eignir af þeim sem tóku hin gengistryggðu erlendu lán. Það var reyndar gert hjá þeim sem voru vélaðir í e.k. skilmálabreytingar eftir ,,ráðgjöf“ þeirra sem og annað hvort hirtu þessar eignir sjálfir eða höfðu hag að því að véla til skilmálabreytinganna. Var það ekki glæpur út af fyrir sig sem engum hefur verið refsað fyrir? Ekki getur þetta talist til e.k. dugnaðar eða afrakstur áralangrar vinnu með ráðdeild og sparnað í huga. Þetta var eignaupptaka.

Hæstiréttur dæmdi lögum samkvæmt. Þá sluppu margir en ekki allir. Þetta var glæpur, pólitískur glæpur vinstri manna sem þeim ber að svara fyrir en hafa ekki verið látnir gera það því RÚV telur það ekki vera ,,frétt“ en í besta falli leggja þeir þar á bæ ekki skilning í svona ,,flókin“ mál.

Það er því of langsótt að sækja skattaskjólsgögn alla leið til Tortóla séu þau til hér beint fyrir framan nefið á fréttahaukum RÚV. Hvers vegna að sækja vatnið yfir lækinn?

Mestu skattsvikin áttu sér stað á aflandseyjunni Íslandi í tíð vinstri stjórnar

Það var einmitt hér á Íslandi sem mestu skattsvik Íslandssögunnar áttu sér stað. Þetta var og er mesta aðför sem farin hefur verið frá upphafi byggðar á Íslandi gegn hagsmunum almennings í landinu.

Þeir fjármunir sem þar hurfu frá einstaklingum, fyrirtækjum og skattgreiðendum voru gífurlega miklir og gögnin frá Tortóla blikna við hliðina á þessari skelfingu sem fáir virðast opna augun sín fyrir. Hvers vegna eru þessi gögn ekki gerð opinber? Er það vegna þess að það er gjörsamlega óverjanlegt hvaða pólitísku og efnahagslegu glæpaverk voru þar framin gagnvart Íslendingum?

Það er einmitt það sem vinstri stjórnin gerði sem er óverjanlegt með öllu og svik við almenning á Íslandi.

Opnið augun fyrir þessum staðreyndum kæru Íslendingar. Treystum núverandi stjórnvöldum sem hafa komið heil fram gagnvart almenningi, vilja bæta sig, eru tilbúin að fórna því sem fórna ber og koma nú á móts við fólkið í landinu með breytingu á ríkisstjórn Íslands.

Markmið vinstri manna er að láta landa sína deila en drottna sjálfir svo fela megi fortíðina, hylja slóðina.

Ég treysti núverandi ráðherrum og forystumönnum beggja flokka til að ganga í þetta verk og upplýsa þjóð sína um það sem tekið var frá henni í skjóli nætur. Samhliða því að birta gögn um Panama á að birta öll gögn varðandi uppgjör föllnu bankanna sem og önnur gögn sem máli skipta.

Fyrr er ekki von um að sárin grói hjá þessari þjóð.

Eftir að hafa ritað talsvert um leka frá Panama, mótmæli við Austurvöll, stjórnmál á Íslandi og kosningar stendur eftir eitt. Það sem stendur eitt eftir er að rita um það hvort það sé eðlilegt og forsvaranlegt að eiga og geyma fjármuni í skattaskjólum.

Frjálst flæði fjármagns og samneyslan

Það verður að gæta að því að fjármagn geti flætt á milli landa og heimsálfa. Það verður einnig að gæta að því að þeir sem stunda slíka iðju tryggi að skattar séu greiddir af fjármunum í heimalandi sínu og að gjöld séu greidd sem eiga þar að greiðast til samneyslunnar.

Umfjöllun fjölmiðla

Eftir að hafa hlýtt og horft á YouTube útgáfu ABC Australia sem og þætti um sama efni á RÚV er ljóst að valdhafar, fjármálafólk og fyrirtæki geta skapað gríðarlegt ójafnvægi bæði í fjármálum heims og gagnvart lýðræðislega kjörnum einstaklingum með athæfi sínu af þessum toga, þ.e. að fara á skjön við lög og reglur. Siðferðið spilar þarna einnig stóran þátt þar sem í grunnin verður að líta til þess að einstaklingum og fulltrúum fyrirtækja er farið að finnast þetta í stakasta lagi. Það er það ekki.

Skert samkeppnisstaða bæði fólks og fyrirtækja

Ef fólk gefur upp alla fjármuni í sínu heimalandi og tryggir að öll gögn séu uppi á borðunum varðandi þessa fjármuni er ljóst að viðkomandi er að fara að lögum. Birting slíkum gögnum getur myndað tækifæri á því að kjósendur sem og samkeppnisaðilar á markaði, þ.e. varðandi fyrirtæki, geti fengið innsýn í hvort viðkomandi sé að spila heiðarlegan bolta eða ekki.

Slík birting ætti að vera valkvæð þeim sem málið varðar en upplýsingar um að viðkomandi eigi reikning á lágskattasvæði skal vera opinbert. Sé viðkomandi stjórnmálamaður, fyrirtæki eða sjóður í viðskiptum við hið opinbera skulu gögnin vera gerð opinber og samið um slíkt. Því er samkeppnisaðstaða frambjóðenda og fyrirtækja ekki hin sama ef menn geta spilað með aðrar reglur sér að baki en mótherjinn sem enga hugmynd hefur um hvort viðkomandi sé sá sem hann segist vera. Það er ósanngjarnt með öllu en gæta ber að persónuvernd í alla staði og gæta að frelsi einstaklingsins og huga að mikilvægi frjálsra viðskipta.

Löggjöf

Það verður að setja löggjöf og/eða breyta löggjöf á Íslandi til þess að tryggja að skattayfirvöld fái aðgang að þessum skjölum varðandi Ísland. Þau hafa lögin en hafa ekki gögnin og það þarf að tryggja betur svo gögnin fáist afhent. Það þarf að meta hvort að opin rannsókn fari fram og að allir sem málið varðar verði gert að gefa upp og afhenda gögn sem máli skipta.

Sjálfstæðisflokkurinn og hlutverk hans

Sjálfstæðisflokkurinn er flokkur alla stétta og það skal hann áfram vera. Með því að ganga fremstur í flokki varðandi þessi mál stendur hann undir nafni. Það að tryggja ekki framangreint er sóun á verðmætum í þróun fyrirtækja og hæfileikum fólks sem telur sig spila heiðarlega en fær ekki framgang vegna óheiðarleika hver sem hann svo kann að vera, dulinn eða ekki. Sjálfstæðisflokkurinn á ekki og má ekki þola óheiðarleika og skiptir litlu hvort það sé í knattspyrnu, fjármálum eða stjórnmálum.

Ekki er séð að núverandi forysta flokksins hafi gert nokkuð annað en að sýna af sér heiðarleika og farið að lögum. Það þarf samt sem áður að birta öll gögn og fara yfir málin í heild sinni og tryggja gagnsæi. Það er óverjandi að nöfn forystumanna Sjálfstæðisflokksins hafi birst í þessum gögnum og með þeim hætti sem raunin varð. Þetta átti að hafa legið fyrir. Úr slíku verður að bæta til framtíðar.

Fólkið í flokknum – Trúnaður og traust

Við sem styðjum Sjálfstæðisflokkinn verðum að vera opin og vera í forsvari fyrir því að flokkurinn tryggi sig enn frekari í sessi í framvarðarsveit þeirra sem vilja treysta á lýðræðið, frelsið og stuðla að enn frekari framförum á Íslandi. Notum tækifærið og opnum flokkinn frekar, tryggjum trúnað og traust.

Fyrr náum við ekki vopnum okkar sem lýðræðislega þroskaður flokkur fyrir lýðræðislega þroskaða þjóð.

Annað er óverjanlegt.

Nú er svo komið að vantrauststillaga óhæfrar stjórnarandstöðu var felld á Alþingi rétt í þessu. Því ber að fagna en reyndar var það nú fyrirséð. Það tókst því ekki að sannfæra þingheim að fella ætti þessa ríkisstjórn sem nú hefur tekið við stjórnartaumunum. Mikið óskaplega er maður nú ánægður með þessa framvindu.

Stjórnarskráin – Stiklur

Í 45. gr. stjórnarskrárinnar segir:

Reglulegar alþingiskosningar skulu fara fram eigi síðar en við lok kjörtímabils. Upphaf og lok kjörtímabils miðast við sama vikudag í mánuði, talið frá mánaðamótum.

Í 47. gr. segir:

Sérhver nýr þingmaður skal vinna drengskaparheit að stjórnarskránni, þegar er kosning hans hefur verið tekin gild.

Í 48. gr. segir:

Alþingismenn eru eingöngu bundnir við sannfæringu sína og eigi við neinar reglur frá kjósendum sínum.

Vonlaus stjórnarandstaða

Pistlahöfundur hafði ekki tölu á hve margir stjórnarandstöðuþingmenn sögðust, í umræðum um þessa vita vonlausu tillögu, vera að ræða málin á þinginu fyrir hönd ,,þjóðarinnar“. Það er nú aldeilis.

Einhverjir þessara borubröttu þingmanna voru frá Samfylkingunni sem er með rétt rúm 7% fylgi í skoðanakönnunum. Aðrir með pilsnerfylgi eins og Björt framtíð og tæknilega fallnir af þingi skv. könnunum.

Hins vegar finnst mörgum að Helgi Hrafn Gunnarsson hafi komi heill fram og er líklega orðinn leiðtogi stjórnarandstöðunnar á Alþingi. Hann er a.m.k. málefnalegur og tekur sig ekki svo hátíðlega að segjast vera þar einn og óstuddur að tala ,,fyrir hönd þjóðarinnar“ allrar. Aðrir stjórnarandstöðuþingmenn fóru út og suður og sögðust vera að ræða við okkur hin sem talsmenn ,,þjóðarinnar“ í heild sinni, hvorki meira né minna.

Lög um Panamagögnin

Svo virðist sem þetta annars sómakærasta fólk sé orðið mjög svo meðvirkt með fjölmiðlaumfjöllun sem byggir á gögnum sem ekki liggur fyrir að hafi verið ritrýnd af skattayfirvöldum á Íslandi. Hvernig væri að setja lög þess efnis að öll þessi Panamagögn skuli liggja fyrir hjá Ríkisskattsstjóra og/eða Skattrannsóknarstjóra eigi síðar en undir lok næstu viku? Ella yrðu þeir sem hylma yfir skattsvik, með því að halda þessum gögnum leyndum, sóttir til saka eftir því hvort efni stæðu til þess og gögnin endurspegluðu svik.

Þetta þarf hugsanlega ekkert að vera. Hvers vegna? Jú, ef fólk hefur gefið þetta upp til skatts og þá með lögmætum hætti þá er ekkert brotið. Ef brot er augljóst eru ákvæði um að geta samið og/eða refsa viðkomandi lögum samkvæmt.

Eru Panamagögnin kúgunartæki?

Ef þetta er ekki gert má reikna með að menn gerðu þetta sér að féþúfu, gætu hótað mönnum sbr. þegar tvær dömur reyndu (ath. hér á Íslandi!) að kúga fé út úr fyrrverandi forsætisráðherra. Er hugsanlegt að slíkt framferði sé nú í gangi út í þjóðfélaginu?

Hvernig getur RÚV staðreynt að þessi gögn innihaldi glæp? Hvernig getur RÚV staðreynt að gögnin hafi verið fengin með lögmætum hætti?

Útkall eða kúgunarárás?

Það er búið að kalla út á Austurvöll mikinn skara af fullfrísku fólki og jafnvel gengið svo langt að siga börnum á Alþingi með fokkmerki eins og um e.k. Talibanahreyfingu sé að ræða.

Þjóðin tekur sinn tíma og fær að kjósa

Nú reynir á. Væri ekki ráð að ,,þjóðin“ fari að taka aðeins í lurginn á þessu liði í næstu kosningum? Rétt er að þjóðin bendi þingmönnum á að í gildi er stjórnarskrá og hana beri að virða eins og stjórnarandstaðan sjálf hefur lofað sbr. framangreint ákvæði stjórnarskrárinnar þess efnis og unnið ,,drengskaparheit“ að henni.

Glæpur og refsing

Hér er ekki séð að nokkur maður hafi framið glæp og enginn hefur lagt á milljarðahundruði á þjóðina með vangá. Hins vegar brutu ráðherrar síðustu ríkisstjórnar og núverandi þingmenn lög, þeir fóru á skjön við skipulagsmál, hertu á sultaról barnafjölskyldna, lögðu gengistryggð lán á herðar heimilum í landinu og vildu svo verða endurkjörin eftir það. Það gekk ekki en þá er ætlunin að ríða inn í vé Alþingis og rjúfa þar friðinn hvað sem það kostar.

Refsingin felst í útkomu kosninga.

Það stafar ógn af tilburðum stjórnarandstöðunnar. Hún er ekki trúverðug.

Þjóðin á að reka slíkt lið heim og eftir atvikum aðra sem henni mislíkar. Það kemur að skuldadögum í því efni.

Um að gera að fresta kosningum þar til kjörtímabiliðið hefur runnið sitt skeið á enda og ljúka þeim verkum sem skipta máli tefji stjórnarandstaðan framgang mála á þinginu.

Það er ekkert nýtt að sósíaldemókratar vilji hækka skatta og eyða fjármunum annara. Hins vegar hafa kommúnistar viljað helst gera byltingar til að ná þessu fram með valdi, helst ekki lögum. Almennt eiga þessir hópar það sameiginlegt að ala á öfundsýki sem er einn mesti löstur mannkyns.

Fólk á flótta

Vegna byltinga og bruðls beggja þessara fylkinga hefur fólk flúið lönd og jafnvel dáið úr vosbúð. Einnig hefur fólk flúið óstjórn annarra ríkja eins og dæmin þessa dagana sanna. Danir hafa m.a. krafist skatta af flóttafólki sem kemur inn í skattaparadísina þá arna. Þetta skattaumhverfi elska sósíaldemókratar og kommúnistar, þ.e. þeir sem enn vilja kenna sig við þá stefnu. Þetta yfirlæti og þetta framferði bætist ofan á annan rasisma sem fólk þarf að takast á við.

Ný fluga

Síðar fengu þessir aðilar glænýja flugu í höfuðið, reyndar ekki kommar innan vébanda Vinstri grænna enda eiga þeir oft erfitt með það að fá nýjar hugmyndir uppá eigin spýtur.

Þessi nýja fluga gekk út á að það væri ráð að fá sér nýtt málefni til að berjast fyrir því þeir höfðu ekkert að viti til málanna að leggja. Var þá ákveðið að sameina krata og kommúnista í Samfylkingunni til að búa til breiðfylkingu. Þessi ,,breið“-fylking er reyndar nú með um eða rétt yfir 7% í fylgi skv. skoðanakönnunum. Fyrrverandi fjármálaráðherra og formaður VG klauf sig út í e.k. smáflokk á þessum tíma en nú með um 12% fylgi, mun meira fylgi en ,,breið“-fylkingin.

Kratar höfðu áður samið um, ásamt Sjálfstæðisflokknum, að ganga að EES samningunum og fjórfrelsinu en Samfylkingin vildi inn í Evrópusambandið og þá alla leið. Fulltrúar VG á þingi brutu kosningaloforð sín eins og kommum er tamt og stukku á vagn sósíaldemókrata í síðustu vinstri stjórn Íslands.

Hnýsnisárátta og öfundsýki

Svo má ekki gleyma því hvað þessir hópar hafa unun af því að hnýsast í annarra manna mál og ala svo á öfundsýkinni út í samfélaginu. Þeir lifa á þessu.

Þessu ríða vinstri menn margir hverjir (ekki allir enda til vandaðir vinstri menn en þeir eru ekki margir) oft inn á Alþingi. Það er hreint með ólíkindum hve langt þér ná með málflutningi sem snýr að því að hækka skatta og koma þeim í þeirra eigin hendur þegar þeir stjórna landinu þar sem því er yfirleitt sólundað. Sporin hræða.

Vitað er og vel þekkt að illa er með fé farið þegar vinstri menn eru við stjórn, a.m.k. í allra flestum tilvikum. Hægt er að skilja þetta efni varðandi menntun og heilsuvernd hvers konar en svo er flest sem hreinlega má laga, spara og þróa til betri vegar. Þeir eiga ómögulegt með að skilja sparnað.

Fjármálarasisminn hin nýja stefna vinstri manna

En nú hefur nýtt bæst við. Það má kalla fjármálarasisma. Sósíaldemókratar, sem og kommúnistar, hafa tekið upp nýja stefnu til að egna fólki saman á Íslandi hinu góða. Þessi stefna fjármálarasismans gengur út á að fjármagn, þrátt fyrir ákvæði EES og ESB tilskipanna um frjálst flæði fjármagns og fólks, sem þeir hafa haft í hámæli sjálfir um árabil, má ekki vera frjálst eins og fólk. Skiptir engu þó fjármagn þetta sé gefið upp til skatts í heimalandinu, af því borgaðir skattar þar og að allt sé í samræmi við lög og reglur þar um.

Ekki veit ég hvort það muni koma mér illa síðar að hafa heimsótt Angóla en hugsanlega er það í lagi því þar er ríkandi kommúnistastjórn. Kem því samt hér á framfæri. Svo hef ég setið kvöldverð með Robert Mugabe en rétt að geta þess hér að auki. Svo á ég íslenska vinkonu frá æsku sem fór nýlega til Kúbu að dansa salsa.

Nýr rasismi verður til

Ný tegund rasisma er orðinn til. Þessi ismi gengur út á að berja á þeim sem hafa fengið ráðgjöf hjá ríkisbönkum. Þar má nefna banka sem m.a. formaður Samfylkingarinnar sat í stjórn hjá á sínum tíma og sá um að útibú bankans í Lúxemburg stofnaði félög á aflandseyjum fyrir blásaklausa bændur og búalið þeirra frá Íslandi. Isminn þessi segir í raun til um að það megi alls ekki eiga félag í landi þar sem t.d. viðskipti eru greiðari og flækjustig minna en í skattaparadísum sósíal demókrata.

Því taka Danir fjármuni frá bláfátæku flóttafólki þegar það kemur inn í ESB ríki. Þarna blandast líka inn í e.k. þjóðerniskommúnismi en það verður að tryggja jöfnuð !

RÚV hefur ekkert við þetta að athuga.

Framhaldið

Það er verðugt að taka þessa umræðu lengra og gera fólki grein fyrir því að fjármagn á og verður að geta flogið eins langt og maður sjálfur sé því ætlað að verða að gagni í viðskiptum. Sé það gefið upp til skatts til að koma að samneyslunni er það ekki ólögmætt. Því og þess vegna verðum við að ganga hratt í afléttingu gjaldeyrishafta.

Það er sumum erfitt að skilja það sem ekki á eða hefur átt búfé að þó féð komi ofan af Arnavatnsheiði inn í Biskupstungurnar er það fé ekkert verra fyrir vikið. Það er jafnvel sterkara og víðsýnna fyrir vikið. Vitur er sá er víða ratar segir í Hávamálum og það á ekkert síður við sauðkindina en fjölmarga vinstri menn.

Þetta þekkja fjallmenn Húnvetninga vel sem og bændur ofan úr Biskupstungum sem saman skáluðu oft uppi á Arnavatnsheiði og glöddust yfir velgengni hvors annars, ávöxtun fjárs og skipti litlu hvaðan það kom og af hvaða kyni það var. Þá var kátt á hjalla.

Til hamingju með nýja ríkisstjórn kæru Íslendingar. Nú eru það Sunnlendingar sem hafa eignast sinn forsætisráðherra. Lifi hann vel og lengi !