Það á að gera 17. júní að alþjóðlegum frídegi!  Öðruvísi get ég ekki skilið fyrrum formann Framsóknarflokksins Guðna Ágústsson sem skrifar grein í Morgunblaðið undir fyrirsögninni „Hvers vegna niðurlægir ríkisstjórnin 17. júní?“.  Tilefnið er sú tilviljun að árlega ríkjaráðstefna Evrópusambandsins að vori lendir á 17. júní.

Á ríkjaráðstefnunni mun Evrópusambandið meðal annars væntanlega samþykkja að hefja formlegar aðildarviðræður við Ísland um mögulega aðild Íslands að Evrópusambandinu. Sú ákvörðun verður tekin á venjulegum vinnudegi í Evrópusambandinu – vinnudegi sem er eðlilega frídagur á Íslandi – enda þjóðhátíðardagur Íslendinga.

Næsta ríkjaráðstefna Evrópusambandsríkjanna verður í í október. Átti Evrópusambandið að fresta formlegri ákvörðun um að hefja aðildarviðræður við Ísland fram í október vegna þess að reglubundin ríkjaráðstefna lenti á vinnudeginum 17. júní þetta árið?

Málflutningur Guðna er náttúrlega barnalegur. Ég verð að minna Guðna á að allt frá árinum 1944 hafa íslenskri embættismenn erlendis tekið þátt í alþjóðastarfi á 17. júní á sama hátt og alla aðra daga.´Það hefur hingað til ekki verið talin niðurlæging við 17. júní.  Það hefur heldur ekki þýtt að Íslendingar sem eru í vinnunni 17. júní beri ekki virðingu fyrir þjóðhátíðardegi Íslendinga.

Á sama hátt er alveg ljóst að ríkisstjórn Íslands ber mikla virðingu fyrir þjóðhátíðardegi Íslendinga enda mun hún væntanlega taka virkan þátt í hátíðarhöldum Íslendinga á þjóðhátíðardaginn þótt fulltrúar Evrópuþjóða séu í vinnunni sinni á ríkjaráðstefnu Evrópusambandsins á virkum vinnudegi í Evrópu þann 17. júní.

Það að Guðni Ágústsson sem tók við formannsembættinu í Framsóknarflokknum af Halldóri Ásgrímssyni sem varaformaður og gegndi því þar til hann sagði af sér vegna andstreymis á miðstjórnarfundi skuli saka ríkisstjórn Íslands um að niðurlægja þjóðhátíðardag Íslands er ekki  Guðna sæmandi. Hvorki sem farsæls stjórnmálamanns um langa hríð, ekki sem persónu og alls ekki sem fyrrum formanns Framsóknarflokksins.