Af hverju í ósköpunum spyrja blaðamenn ekki lengur af hverju? Daglega les ég „fréttir“ þar sem blasir við að blaðamenn eru ekki að grafast fyrir um ástæður hlutanna heldur skauta rétt yfir yfirborðið – og missa þar af leiðandi af alvöru fréttum. Láta oft og tíðum viðmælendur sína mata sig gagnrýnilaust. Nema blaðamenn vilji ekki „eyðileggja“ þá hlið málsins sem þeim líkar – með því að grafa dýpra.
Gott dæmi um þetta er umfjöllun fjölmiðla um Íbúðalánasjóð. Tek það dæmi þar sem ég fylgist af gömlum vana með fréttum af sjóðnum og hef nokkra þekkingu á málefnum og umhverfi sjóðsins.
Það er með ólíkindum að ENGINN blaðamaður hefur spurt stjórnvöld um það AFHVERJU þau hafa ákveðið að setja 33 milljarða í sjóðinn til viðbótar þeim 8,7 milljörðum sem fyrir voru sem eigið fé. Það var nánast tilviljun að fram kom á Alþingi að 18 milljarðar eru vegna áætlaðs kostnaðar við niðurfærslu lána Íbúðalánasjóðs í 110%.
Ekki hafa fengist haldbær svör við því af hverju viðbótar 15 milljarðarnir eru settir inn – þar sem ljóst er að eiginfjárhlutfall Íbúðalánasjóðs þarf ekki að vera 5 í CAD frekar en stjórnvöld kjósa – enda ekki verið eftir þeim svörum leitað af blaðamönnum.
Á forsíðu Fréttablaðsins í dag er haft eftir Sigurði Snævarr efnahagsráðgjafa ríkisstjórnarinnar að það þurfi að leggja Íbúðalánasjóði til enn aukið fé – til viðbótar þeim 33 milljörðum sem ekki hefur fengist full skýring á af hverju þurfti.
Er það vegna þess að niðurfærsla í 110% lán kostar meira en þeir 33 milljarðar sem ríkisstjórnin hefur samþykkt að leggja sjóðnum til?
Er það vegna þess að ríkisstjórnin ætlar að koma eigin fé Íbúðalánasjóðs í 8 í CAD?
Það er forsenda þess að ríkisábyrgð af lánum sjóðsins verði afnumin – enda mun ríkisstuðningurinn þá brjóta í bága við ríkisstyrktarreglur samningsins um Evrópska efnahagssvæðið
Ekki veit ég það – því blaðamenn hafa ekki rænu á að spyrja.
Hallur Magnússon
Fyrsta skipti sem ég er sammála þér, legg til að þú hættir í Framsóknarflokknum og gerist blaðamaður.
Hárrétt hjá þér, Hallur.
Blaðamenn hér á landi standa ekki undir nafni og eru ekki starfi sínu vaxnir.
Þeir ættu heldur að kallast „blaðurmenn“.
Hér á landi er nefnilega ekki stunduð gagnrýnin blaðamennska, heldur það sem kallast „kranablaðamennska“.
Kranablaðamennska gengur út á það að blaðamaðurinn svokallði leyfir viðmælenda sínum að tjá sig og segja sína meiningu á hlutnum, án þess að viðmælandinn sé krafður skýringa á fullyrðingum sínum, eða sé spurður gagrýninna spurninga.
Heiður.
Ég hætti í Framsóknarflokknum 1. desember 2010.
Ó, sorrý vissi það ekki, til hamingju með það 😉
Blaðamenn, hversskonar grautardrullustétt er það. Engrar kunnáttu krafist, bara eitthversskonar menntun sem kemur málinu ekkert við.
Einhverstaðar las ég að til stæði að gera sömu kröfur til Íbúðalánasjóðs og annara fjármálastofnanna, þ.e., hvað varðar eigið fé. Þetta er vegna þess að stjórnvöld ætla sér að einkavæða sjóðinn. ESB fer fram á það.
Sæll Hallur,
mjög góð færsla hjá þér. Það sem virðist einkennandi að gera ekkert sem gæti hugsanlega ef til vill komið valdhöfum illa.
Gunnar Skúli.
Í langri stjórnarsetu ríkisstjórna Sjálfstæðisflokks og Framsóknar gerðu fjölmargir blaðamenn skyldu sína með gagnrýninni fréttamennsku á stjórnvöld. Blaðamennirnir voru – eins og þjóðin – orðin þreytt á því stjórnarmynstri. Eðlilega.
Hins vegar gleymdi stór hluti blaðamannastéttarinnar að skipta um gír þegar nýtt stjórnarmynstur tók við. Í stað þess að hadla áfram að vinna á gagnrýninni fréttamennsku gagnvart ríkisstjórn og ríkisstjórnarflokkum – þá héldu þeir áfram að vinna í gagnrýniförunum gagnvart gömlu ríkisstjórnarflokkunum – og fóru í raun að verja gömlu stjórnarandstöðuflokkana.
Vona að það þurfi ekki jafn langan stjórnartíma þessara flokka og stjórnartíma xD og xB – til þess að blaðamenn fari að vinna vinnuna sína og veita stjórnvöldum það heiðarlega og vandaða aðhald sem blaðamönnum bera að gera.