Þótt ég hafi sagt mig úr Framsóknarflokknum á fullveldisdaginn 1. desember 2010 eftir rúmlega aldarfjóðrungs starf þá þykir mér vænt um gamla flokkinn minn. Þótt Framsókn hafi yfirgefið stefnu frjálslyndis, umburðarlyndis og uppbyggjandi umræðu sem ekki hvað síst einkenndi tímabil Eysteins Jónssonar og Steingríms Hermannssonar – þá er í flokknum fjöldi frábærs fólks sem ég starfaði með og tók með því þátt í lýðræðislegri umræðu þar sem borin var virðing fyrir misjöfnum áherslum og skoðunum.
Því miður hefur hluti núverandi forystu og lítill hópur nýliða í flokknum náð saman við harða hagsmunaðilja og tekið meðvitaða ákvörðun um að hverfa frá gamla umburðarlyndinu, keyrt á óbilgitni og það sem verra er farið að gæla við stæka þjóðernishyggju. Slíkt getur aldrei verið vænlegt til lengdar þótt þannig hegðun geti tímabundið aukið flokksfylgi.
Ég á mér þá von að almennir flokksmenn og sá hluti flokksforystunnar sem ekki er sáttur við hvert stefnir nái að taka í taumana og í það minnsta vindi ofan af þjóðernishyggjutöktunum. Ef svo verður þá get ég sagt með öllu hjarta að ég óski Framsóknarflokknum velfarnaðar.
Ég geri hins vegar ekki ráð fyrir að Framsóknarflokkurinn snúi aftur til frjálslyndrar stefnu og taki til dæmis þátt í samstarfi með ELDR – Samtökum frjálslyndra flokka í Evrópu – þótt forysta Framsóknarflokksins hafi á síðustu stundu í sumar ákveðið að láta ekki reka sig úr Liberal International – alþjóðlegum samtökum frjálslyndra flokka vegna skulda. En Steingrímur Hermannsson var meðal annars lengi varaformaður þeirra samtaka.
Ég er þess fullviss að það er pláss fyrir stjórnlyndan Framsóknarflokk í íslenskum stjórnmálum – þangað sem flokkurinn stefnir. Mér finnst það bara hið ágætasta mál – svo fremi sem flokkurinn missi sig ekki samtímis í stæka þjóðernishyggju.
En ég á ekki samleið með slíkum Framsóknarflokki. Þess vegna yfirgaf ég Framsókn 1.desember síðastliðinn.
Ég hafði ætlað að standa utan stjórnmálaflokka og láta stjórnmálaþátttöku mína einskorðast við pistlaskrif á Eyjunni þar sem ég héldi áfram að gera það sem ég gerði í Framsóknarflokknum í rúman áratug – segja það sem mér finnst hvort sem það kæmi mér vel eða ekki.
En ef það skapast grundvöllur fyrir nýtt frjálslynt, umburðarlynt, alþjóðasinnað stjórnmálaafl á miðju íslenskra stjórnmála – þá mun ég að líkindum taka þá í starfi þess.
Hallur Magnússon
Sæll Hallur ekki efa ég að það sé rétt sem þú skrifar að þér þyki vænt um Framsóknarflokkinn enda hafa leiðir ykkar lengi legið saman, þú unnið fyrir flokkinn og má ég ekki líka segja sem svo að flokkurinn hafi gert eitt og annað fyrir þig? Allt hið besta mál.
Ekki veit ég hvað varð þess valdandi að þú sagðir þig úr Framsóknarflokknum þ.e. hver var raunveruleg ástæða, af því fara ýmsar sögur og frjálslyndi kemur þar ekkert við sögu. Hitt er ljóst að sú ástæða sem þú og síðar meðreiðarsveinar þínir gefa upp sem réttlætingu fyrir úrsögn er bara rugl. Þið segið að flokkurinn sé ekki nógu frjálslyndur fyrir ykkur og að þið viljið fá Framsóknarflokk eins og hann var á tímum Eisteins Jónssonar og Steingríms Hermannssonar.
Hverskonar rugl er þetta Hallur? Á tímum Eisteins varst þú ekki fæddur eða hvaða frjálslyndi er fólgið í því hjá ykkur að vilja færa flokkinn ykkar 40 til 50 ár aftur í tímann ? Sér er nú hver víðsýnin. Í hverju fólst frjálslyndi þeirra Eisteins og Steingríms ? Báðir voru á móti inngöngu í EB og EES og báðir tóku fast, einkum þó Steingrímur á uppvöðslusemi manna í flokknum eins og Möðruvellinga. Þekkir þú ekki sögu þíns gamla flokks Hallur, veistu ekki söguna um hvernig Ólafur Ragnar notaði hóp manna til að hvetja til sundurlyndis í Framsóknarflokknum eða hvernig Steingrímur Hermannsson þá ritari flokksins tók á Ólafi og Möðruvellingum ? Eygló ritari flokksins er sem dýrlingur með geislabaug í samskiptum sínum við vandræðafólk í flokknum borið saman við festuna sem Steingrímur beitti í baráttunni við Ólaf Ragnar og co.
Eða þetta „þjóðernisraus“ í ykkur Hallur, og formaður flokksins gerir bara grín að þessu þjóðernisrausi í ykkur með því að tilkynna að hann sé farinn á íslenskan-megrunarkúr og vanstilltu vinir þínir eru algjörlega húmorslausir eins og Trausti reynisson á DV þeir umturnast telja grín formannsins vera vitni um aukna þjóðernishyggju sem þið ekki þolið, þið þessir miklu heimsmenn sem vitið hvernig á að skála í Brussel.
Hallur það er nokkuð sem þið vinirnir að Digranesvegi 14 ættuð að ræða saman um. Rifjið saman upp söguna af stjórnmálaferli Ólafs Ragnars og hvernig hann notaði bök samstarfsmanna sinna til að lyfta sjálfum sér einum manna. ÓRG fór með flokk manna úr Framsókn af því hann ætlaði eins og Móses forðum að leiða þá til fyrirheitna landsins þar sem hvorki væri að finna Steingrím Hermannsson eða Eystein Jónsson eða Ólaf Jóhannesson. Saman lagði hópurinn inn í eyðimörkina með viðkomu hjá Hannibal í Frjálslyndum og vinstrimönnum. ÓRG fékk ekki metnaði sínum svalað hjá Hannibal og stakk sér beint inn í kommúnistaflokkinn sem þá hét Alþýðubandalag. Einhverjar sálir af þeim sem yfirgáfu Framsókn með ÓRG fylgdu með en flestum bauð við þeirri hugsun að gerast kommúnistar, þeir hurfu úr félagsmálastörfum og hafa ekki komið að stjórnmálum síðan og voru þó upp til hópa hinir færustu menn. Sagan endurtekur sig Hallur, lukkuriddarar hvers tíma nota annað fólk til að lyfta sjálfum sér !
Eins mun þetta vera með leiðtoga ykkar Guðmund Steingrímsson, hann notar ykkur sem vogarstöng til að semja um betri stöðu við inngöngu í Samfylkinguna og tekur svo stökkið. Eftir stija góðir menn eins og þú og G Vald og einhverjir fleiri og hugsa sinn gang. Munið þið í ergelsi ykkar vilja gerast kratar og fara að dásama Árna Pál og Jóhönnu ? Nei við vitum það bæði Hallur þíð viljið ekki fylgja Guðmundi inn í Samfylkingu. Því mun ef þið varið ykkur ekki fara eins fyrir ykkur og stærstum hluta Möðruvellinga, þið einangrist, verðið utanveltu frá þátttöku í landsmálum um áratugi. Þú átt betra skilið en þetta Hallur enda góður strákur en passaðu þig á að fylgja ekki lukkuridda í blindni slíkir hugsa bara um sig sjálfa. Að lokum skaltu lesa þér til um störf Steingríms Hermannssonar og Eisteins og hætta svo að kalla eftir að fá stjórnmálaflokk eins og hann var fyrir 50 árum. Að lokum Hallur þú eins og ég ert búinn að upplifa það að það er alveg hudleiðinlegt að vera utan við þá aktion sem er í öllum stjórnmálaflokkum, komdu þér inn aftur í þinn gamla flokk þar áttu heima. Vertu nútímamaður Hallur, lifðu í núinu maður.
Sæll Hallur,
Framsóknarflokkurinn hefur undanfarin misseri verið í forystu gegn Icesave, gegn inngöngu í ESB og gegn skuldavanda heimilanna . Sigmundur Davíð hefur staðið sig geysivel í þessum málum og sýnt mikla leiðtogahæfileika. Ef það að styðja þau góðu mál er að vera þjóðernisflokkur og með „þjóernistakta“ er hugtakið þjóðernisflokkur bara jákvætt og vonandi byrjun á uppgangi flokksins á nýjan leik sem hefur ekki beðið þess bætur að fara í „frjálslynda“ gírinn eftir forystu Halldórs Ásgrímssonar.
Samkvæmt könnun Bylgjunnar í gær, þá bætti Framsóknarflokkurinn við sig atkvæðum frá þeirri næstu á undan. Vinstriflokkarnir Samfylkingin, VG og Hreyfingin tapaði því sem frabmoð Guðmundar fékk.
Sýnir væntalega að þegar þekktur flugumaður Samfylkingarinnar gekk úr flokknum ásamt einhverjum vinum, þá vilja mun fleiri kjósa hann. Formaður Framsóknarflokksins má vel við una þessi málalok.
Þetta er atburðarrás hönnuð af Samfylkingunni og meir að segja álitsgjafi ríkisins sjálfur Egill Helga sér loksins það augljósa og bendir á.
En er ekki ástæða til að staldra aðeins við og skoða hvað þessi mikli stjórnmálagarpur Guðmundur Steingrímsson hefur afrekað á þingi, sem er það sem hann væntalega flaggar fyrir framan kjósendur til að fá þá til að ganga til liðs við sig, eftir að hann gaf slaginn við Ásmund Einar Daðason án þess að þora í hann.
Það er einmitt það sem Óli Björn Kárason, varaþingmaður, og útgefandi vefsíðunnar T24, hefur gert. Hann segir á vefsíðu sinni:
„Eftir að Guðmundur var kjörinn þingmaður fyrir Framsóknarflokkinn hefur hann lagt fram átta fyrirspurnir og tvær þingsályktunartillögur. Hann hefur auk þess verið meðflutningsmaður á nokkrum málum. Hvorki fyrirspurnirnar eða þingsályktunartillögurnar tvær benda til þess að Guðmundur Steingrímsson fylgi djúpri pólitískri sannfæringu. Fyrri tillagan til þingsályktunar var um notendastýrða persónulega aðstoð við fólk með fötlun. Sú tillaga var samþykkt með öllum greiddum atkvæðum. Þingmenn allra flokka stóðu með tillögunni enda ekki um pólitískt mál að ræða. Síðari tillagan til þingsályktunar var um að seinka klukkunni um eina klukkustund. Sú tillaga fékk ekki afgreiðslu.
Átta fyrirspurnir Guðmundar eru af ýmsum toga allt frá póstsamgöngum til rafmagnsöryggis og markaðsmála.
Þingmál Guðmundar Steingrímssonar:
Fyrirspurnir:
Niðurstaða nefndar um stöðu barna í mismunandi fjölskyldugerðum til dómsmrh.
Raforkuöryggi á Vestfjörðum til iðnrh.
Aðgerðaáætlun til að styrkja stöðu barna og ungmenna til féltrmrh.
Staða atvinnulausra sem ekki eiga rétt á bótum til velfrh.
Biðlisti eftir þjónustu barna- og unglingageðdeildar til velfrh.
Póstsamgöngur við afskekktar byggðir til samgrh.
Tækni- og raungreinamenntun til menntmrh.
Markaðsátakið ,,Inspired by Iceland“ til iðnrh.
…..
Þingsályktunartillögur:
Notendastýrð persónuleg aðstoð við fólk með fötlun Þál. 16/138
Seinkun klukkunnar og bjartari morgnar
Með öðrum orðum: Ekki er með nokkru móti hægt að draga nokkra ályktun um pólitíska hugmyndafræði Guðmundar, ef litið er til þeirra mála sem hann hefur haft forystu um eftir að hann settist á þing 2009. Í þeim efnum er hann óskrifað blað.
Nú þá veit ég það. Alþingismaður hefur yfirgefið flokk sinn og stefnir á að stofna nýjan. Ekki fæ ég skilið út á hvað ágreiningurinn við gamla flokkinn er né heldur hvað maðurinn ætlar sér að stefna í stjórnmálum. Hitt er ljóst hvað hann hefur gert. Það eflir eflaust von og trú í hjörtum þeirra sem samfagna.“
http://t24.is/?gluggi=grein&tegund=pistill&id=5222
Ætli málið snúsit ekki um að halda sem lengst í vel borgaða og þægilega innivinnu. Hann einn getur bjargað sér sem lengst með þingmannsstarfið, með að verða hækja núverandi stjórnvalda og verja hana falli, þegar sú eldri Þráinn Bertelsson er farinn að hóta því að brotna.
Góður málflutningur og hófsamur – en af hverju vill enginn af flóttamönnunum úr Framsókn skýra ástæður flóttans betur.
Hvað áttu við með: „…hefur hluti núverandi forystu og lítill hópur nýliða í flokknum náð saman við harða hagsmunaðilja…“?
Það er þetta með hagsmunaaðilana sem vekur athygli. Reynir einhver að fjarstýra flokknum og forystu hans?
Grunar að flóttinn sé ekki vegna Sigmundar heldur vegna þess eða þeirra sem eru í aftursætinu.
framsóknarmenn tóka vel á móti Guðmundi hann var orðin þingmaður eftir 100 daga í flokknum, en hann valdi sér vini eins og Einar Skúla og Róbert Marshall sem segja mér allt um hvar GS er staddur. Einar Skúla er partur af eignasafni Pálma í Fons hafður á 365 til að passa uppá Express.