Erum við að horfa upp á „raðmorðatilraun“ á landsbyggðinni í boði stjórnvalda? Það mætti halda það. Ég játa að ég er að ganga yfir strikið til að beina athygli að grafalvarlegu máli – en tilgangurinn helgar meðalið. Því það er verið að hætta mannslífum á landsbyggðinni!
Það mætti ætla að ríkisstjórn Íslands telji að mannslífin á landsbyggðinni séu minna virði en mannslífin á höfuðborgarsvæðinu. Það sama var uppi á teningnum hjá síðustu ríkisstjórn – og reyndar hjá þeirri þarsíðustu líka undir það síðasta.
Ég veit þetta eru alvarlegar ásakanir. En því miður réttar.
Heilbrigðisþjónusta á landsbyggðinni hefur verið skorin niður ár eftir ár eftir ár. Í nafni „hagræðingar“. Ok. Látum það vera.
Það er sagt „ódýrara“ að sinna sjúku og slösuðu landsbyggðarfólki í Reykjavík en úti á landi. Ok. Látum það vera.
En – ef það á að loka allri bráðaheilbrigðisþjónustu á landsbyggðinni – í nafni „sparnaðar“ og „hagkvæmni“ – þá verða sjúklingar og illa slasað fólk utan af landi að komast í hagkvæmnina í Reykjavík. Annars mun fólk deyja að óþörfu.
Er núverandi ríkisstjórn að tryggja það að sjúklingar og illa slasað fólk komist í „hagkvæmnina“ í Reykjavík?
Nei. Þvert á móti þá virðist hún vinna gegn því!
Eins og síðasta ríkisstjórn.
Og þarsíðasta!
Á sama tíma og heilbrigðisþjónusta – að ég tali ekki um bráðaþjónusta – út á landi er að deyja út – þá er verið að draga úr fjárframlögum til sjúkraflutninga bæði í lofti og á landi. Það má líkja því við „morðtilraun“ á landsbyggðinni – því það að bjarga ekki mannslífi sem unnt er að bjarga jaðrar við morð
En björgunarþyrluflotinn er lamaður aftur og aftur. Vegna niðurskurðar.
Ríkisstjórnin getur ekki bæði skorið niður heilbrigðisþjónustuna á landsbyggðinni og skorið niður björgunarþyrluflotan. Því eins ljótt og það hljómar – þá er nánast unnt að halda því fram að slíkt sé „raðmorðatilraun á landsbyggðinni“.
Ég veit þetta er gróf aðferð til að draga fram ástand sem hefur skapast og líkur eru á að versni – ef menn hugsa málið ekki alla leið!
Alþingi og ríkisstjórn VERÐA að skoða niðurskurð heilbrigðisþjónustu og niðurskurð til þyrlusveita Landhelgisgæslunnar í samhengi. Það er EKKI unnt að skera niður á báðum stöðum.
Þessi pistlill minn er EKKI ætlaður til þess að skaða núverandi ríkisstjórn – og ég er ekki að saka hana sérstakelga um „raðmorðatilraun á landsbyggðinni“ – enda hefur þetta verið þróun sem hófst í ríkisstjórn sem hvorugur núverandi ríkisstjórnarflokka átti þátt í.
Þessi pistill minn – eins nöturlegur og hann er – er ætlaður til þess að koma í veg fyrir að óheillaþróun undanfarinna ára og ríkisstjórna haldi áfram.
Því enginn Íslendingur vill „raðmorðatilraun á landsbyggðinni“.
Hallur Magnússon
Mikið rosalega er þetta vondur pistill, á alla mælikvarða.
@Vilhjálmur.
Þú mátt hafa þá skoðun – en vildir þú vera svo vænn að benda mér á eitthvað sem ekki er rétt?
Fullkomlega óviðeigandi nálgun á málefninu. þú hugsar augljóslega ekki lengra en nef þitt nær, en hvað heldurðu t.d. Að norðmenn myndu halda læsu þeir þetta frá þér? Skora á þig einfaldlega að fjarlægja þetta.
@Hermann.
Gætir þú bent mér á 1 atriði sem ekki er rétt í pistlinum?
Ekki gleyma svo að flugvöllurinn í RVK á að vera kjurr! 🙂
… einu gildu rökin fyrir staðsetningu hans 🙂
Hallur,
Hefurðu kynnt þér starfsemi sjúkraflugsins sem rekið er, án hávaða, frá Akureyri?
Það virkar jafnt fyrir Jón Jónsson, reykvíking, sem velti bílnum, á ferðalagi með fjölskylduna við Borgarfjörð eystra, og hana Beggu gömlu á Sauðárkróki. Þau þurftu bæði að komast sem fyrst undir læknishendi á Lansanum, þar sem mínútur skiftu máli.
Þarna er búið að byggja upp innviði sem sinna þessum þörfum, svínvirka, og hafa bjargað fjölda mannslífa.
.
Þessi starfsemi er ein af mörgum, sem gera Ísland að góðu landi til að búa á.
Hvernig dettur þér að tala um morðtilraun eða raðmorðatilraun á landsbyggðinni? Bentu fyrst á eitt dæmi þar sem landsbyggðarmanneskja var eða er í hættu vegna skorts á sjúkraflutningum. Án raka er þetta bara upphrópanir og þvæla.
Anna. Ég ætla ekki að rifja hér upp dauðsföll sem þegar hafa orðið vegna þessa. En þau hafa orðið.