Þessi grein birtist á dögunum í Fréttablaðinu og á visir.is. Ég skrifaði hana vegna umræðu um félagslegt leiguhúsnæði í Reykjavík. Fyrr hafði ég skrifað grein hér á Eyjuna vegna ummæla borgarstjóra á facebook síðu sinni um að ég væri að bulla um félagslegt leiguhúsnæði. Svo bætti Magnús Már Guðmundsson borgarfulltrúi Samfylkingar um betur og sagði mig í ruglinu. Svo sagði hann mig vera stóryrtan. Gaman að því.

Aðeins til útskýringar á því að greinin hér að neðan endar á því að 425 íbúðir hljóti að hafa komið til á kjörtímabilinu 2006-2010. Skýringin á því er sú að Magnús Már tekur fyrir ákveðinn fjölda íbúða í grein sinni. Þar er hann að tala um félagslegar leiguíbúðir, íbúðir fyrir aldraða og fyrir fatlað fólk. Við að telja hvaða íbúðir hafa bæst við frá 2010 þegar Jón Gnarr og Dagur mynduðu meirihluta standa eftir 425 íbúðir sem hljóta þá að hafa bæst við á árunum 2006-2010.

Greinin mín sem birtist í Fréttablaðinu og á visir.is:

Í umræðu um félagslegt leiguhúsnæði í Reykjavík hafa fyrirsagnir á borð við rugl og bull verið notaðar. Í grein Magnúsar Más Guðmundssonar borgarfulltrúa Samfylkingarinnar sem birtist í Fréttablaðinu og á visir.is 9. nóvember sl. talar hann um að ég hafi verið gífuryrtur. Grein Magnúsar heitir: ,,Halldór í ruglinu.“ Grein mín á Eyjunni heitir: ,,Bull í boði borgarstjóra“ og fékk ég það orðalag að láni frá borgarstjóra. Þannig að gífuryrðin eiga í báðum tilfellum lögheimili hjá þessum tveimur.

Aðalmálið í þessu er að staðan varðandi félagslegt leiguhúsnæði í Reykjavíkurborg er alvarleg. Fulltrúar meirihlutans í Reykjavíkurborg fara yfirleitt að tala um sambærileg vandamál í öðrum sveitarfélögum þegar bent er á vandann í borginni. Það gerir ekkert fyrir þá 844 einstaklinga sem eru á biðlista eftir félagslegu leiguhúsnæði í borginni. Þeim einstaklingum fjölgaði um 15% á milli árann 2015 og 2016 og eiga lögheimili í Reykjavík. Það hjálpar þeim ekkert að borgarfulltrúar í meirihlutanum tali um að önnur sveitarfélög þurfi að gera betur.

Magnús Már Guðmundsson segir í grein sinni að 2.351 félagsleg íbúð sé í Reykjavík 2016 þar af 1.916 almennar félagslegar leiguíbúðir. Hann segir einnig að þeim hafi fjölgað um 612 á síðustu 10 árum og ekkert hafi fjölgað 2010. Þá segir hann í grein sinni að undirritaður hafi sagt að félagslegum leiguíbúðum hafi fækkað í Reykjavík. Skoðum þetta aðeins.

Formleg svör lögð fram í borgarráði segja okkur þetta:

• Fjölgað hefur um 72 félagslegar leiguíbúðir frá 2010, stefnan er 100 á ári sem augljóslega gengur ekki eftir.
• Fækkað hefur um 3 íbúðir fyrir aldraða á vegum Reykjavíkurborgar frá 2010.
• Þann 1. janúar 2011 færðust 114 íbúðir fyrir fatlaða frá ríki til Reykjavíkurborgar. Þeim hefur fjölgað um 4 síðan þá.
• Þær 425 íbúðir sem fjölgað hefur um á síðustu 10 árum sé miðað við grein Magnúsar Más eru þá fjölgun frá kjörtímabilinu 2006-2010 sem er eina kjörtímabilið síðustu 22 ár sem Sjálfstæðisflokkurinn hefur verið í meirihluta.

Halldór Halldórsson
oddviti Sjálfstæðisflokksins í borgarstjórn

Í hádegisfréttum Ríkisútvarpsins 6. nóvember sl. var viðtal við Dag B. Eggertsson borgarstjóra um húsnæðisvandann í Reykjavík. Fréttin tengdist skýrslu Rauða krossins, ,,Fólkið í skugganum“ sem fjallar um alvarlegt ástand ákveðinna hópa í Reykjavík þar sem húsnæðisvandinn er stærsti einstaki vandinn.
Í fréttinni segir borgarstjóri að það sé forgangsverkefni að fjölga húsnæðiskostum og að fjölgun félagslegra leiguíbúða verði hraðari en áður.
Í tilefni af þessu var undirritaður sem oddviti Sjálfstæðismanna í borgarstjórn í kvöldfréttum sama dag. Þar rifjaði ég upp að ekkert hefði gerst í fjölgun félagslegra íbúða síðan 2010 en þann tíma hefur Dagur B. Eggertsson verið í meirihluta. Fyrst með Besta flokknum og svo frá 2014 með Pírötum, Bjartri framtíð og Vinstri grænum.

Árið 2010 voru 1.844 félagslegar leiguíbúðir.
Árið 2014 voru 1.817 félagslegar leiguíbúðir – fækkun um 27 íbúðir.
Árið 2015 voru 1.901 félagslegar leiguíbúðir – fjölgun um 84 íbúðir
Árið 2016 voru 1.916 félagslegar leiguíbúðir þann 3. nóvember skv. svari í borgarráði eða fjölgun um 15 íbúðir.
Þetta þýðir að frá 2010 hefur aðeins fjölgað um 72 félagslegar leiguíbúðir eða um 10 á ári á síðustu 7 árum. Stefnan var að fjölga um 100 á ári. Hefði það verið gert væru 2.544 félagslegar leiguíbúðir núna en ekki 1.916.

Á milli áranna 2015 og 2016 hefur þeim fjölgað um 15% sem eru á biðlista eftir félagslegri leiguíbúð. Í dag eru 844 einstaklingar á þeim lista. Það er væntanlega ekki erfitt að standa við þau orð sem borgarstjóri lét falla í viðtalinu að fjölgun félagslegra leiguíbúða verði hraðari en áður. En frá 2010 hefur ekki verið staðið við neitt í þessum málum.

Svo segir borgarstjóri mig bulla. Bullið er alfarið í boði borgarstjóra í þessum húsnæðismálum.

Við afgreiðslu hálfs árs uppgjörs 2016 lögðum við borgarráðsfulltrúar Sjálfstæðisflokksins eftirfarandi bókun fram:

,,Borgarfulltrúar Sjálfstæðisflokksins telja að ákveðinn viðsnúningur komi fram í 6 mánaða uppgjöri Reykjavíkurborgar. Löngu er kominn tími til að löngu tímabili taprekstrar ljúki. Hafa ber í huga að ástæða viðsnúnings er vegna þess að skatttekjur eru 575 milljónir kr. yfir áætlun og að tekjum er flýtt vegna eftirálagðs útsvars um 1,5 milljarða kr. Þá ber að hafa í huga að tekjufærsla á samstæðu er 5,6 milljarðar kr. vegna hækkunar á eignum Félagsbústaða sem er einungis reiknuð stærð og hefur engin áhrif á rekstur eða efnahag Reykjavíkurborgar nema þessar eignir verði seldar sem varla gerist enda langir biðlistar eftir félagslegu húsnæði. Álagning útsvars á Reykvíkinga er í hæstu leyfilegu hæðum. Lög heimila borginni ekki að hækka útsvarið enn frekar. Borgarfulltrúar Sjálfstæðisflokksins telja að um leið og svigrúm skapast hjá borginni til að bæta þá grunnþjónustu sem enn er ekki nógu góð eigi að hefja lækkun útsvars.“

Í þessari bókun tölum við um að bæta þurfi grunnþjónustuna. Það virðist snúið hjá meirihluta Pírata, Samfylkingar, Vinstri grænna og Bjartrar framtíðar að hafa hana í lagi. Nágrannasveitarfélög okkar virðast þó ráða ágætlega við það. Líklega er minna um gæluverkefni, á borð við óþarfa þrengingu gatna og annað sem tekur til sín mikið fjármagn en getur engan veginn talist grunnþjónusta hjá þeim sveitarfélögum, en hjá meirihlutanum í Reykjavíkurborg.  

Við borgarfulltrúar Sjálfstæðisflokksins höfum oft rætt um skort á skilningi á þörfum atvinnulífsins.  Þétting byggðar er oft eðlileg borgarþróun en um leið er þrengt að atvinnustarfsemi í borginni. Nýverið bókuðum við um þetta í umhverfis- og skipulagsráði og á dögunum barst bréf til borgarstjóra frá Félagi atvinnurekenda þar sem lýst er áhyggjum vegna þess að fyrirtæki sem þurfa að víkja úr grónum atvinnuhverfum (eins og í Vogahverfinu) fái engin svör varðandi nýja aðstöðu.

Vegna þessa lögðum við borgarráðsfulltrúar Sjálfstæðisflokksins fyrirspurn/bókun í borgarráði 12. maí. Fyrirspurnin endar á beiðni um yfirlit yfir fáanlegar atvinnulóðir í borginni:

,,Lögð fram svohljóðandi fyrirspurn borgarráðsfulltrúa Sjálfstæðisflokksins:
Borgarráðsfulltrúar Sjálfstæðisflokksins minna á bókun fulltrúa Sjálfstæðisflokksins í umhverfis- og skipulagsráði 20. apríl sl. um að borgaryfirvöld hafi sýnt framtíðaratvinnusvæðum borgarinnar skeytingarleysi.

Félag atvinnurekenda hefur nýverið sent bréf til borgarstjóra þar sem lýst er áhyggjum yfir því að fyrirtæki sem þurfa að víkja úr grónum atvinnuhverfum fá engin svör varðandi nýja aðstöðu. Þau fáu svæði sem nefnd eru sem valmöguleikar fyrir plássfreka starfsemi fyrirtækja eru fá, lítil og úti í jöðrum borgarinnar. Stefnan um þéttingu byggðar er skynsamleg en hefur af hálfu borgaryfirvalda fyrst og fremst verið sett fram á forsendum þarfarinnar fyrir þróun íbúðabyggðar. Þarfir og hagsmunir atvinnulífsins hafa ekki verið í forgrunni, þótt það ætti að vera augljóst að borg þrífst ekki án öflugs atvinnulífs. Gera verður ráð fyrir þörfum þess í borgarskipulaginu ekki síður en þörfum borgarbúa fyrir íbúðarhúsnæði og gera verður ráð fyrir því, meðal annars vegna hagkvæmra samgangna, að atvinnustarfsemi sé ekki bara ýtt út á jaðra borgarinnar.

Áformuð er mikil uppbygging íbúðarhúsnæðis í mörgum hverfum sem hafa hingað til hýst ýmsa atvinnustarfsemi. Reykjavíkurborg hefur ekki boðið upp á neina heildstæða kynningu gagnvart þeim sem verður bolað burt af svæðum sínum í nánustu framtíð. Það veldur óöryggi á meðal þeirra sem halda úti þeirri atvinnustarfsemi sem borgin ætti alla jafna að passa upp á að verði áfram í borginni.

Fyrirspurnum fyrirtækja um möguleika á öðrum lóðum hefur verið svarað illa eða ekki af hálfu borgarinnar sem verður að teljast ótæk vinnubrögð sem gætu haft ófyrirsjáanlegar afleiðingar í för með sér, með því að fyrirtækin í borginni hrekist í önnur sveitarfélög.

Óskað er eftir yfirliti yfir atvinnulóðir í borginni.“

Þetta er það helsta úr ræðu minni við síðari umræðu ársreiknings. Jú vissulega er þetta einhver lesning en þarna fer ég yfir mikilvæg atriði úr rekstrinum.

Stuttur útdráttur: ,,Þetta, ágætu borgarfulltrúar þýðir einfaldlega að áætlanir samþykktar af meirihluta Pírata, Samfylkingar, Bjartrar framtíðar og Vinstri grænna gera ráð fyrir lögbroti. Reykjavíkurborg er með það innbyggt í sínar áætlanir að reka sveitarfélagið með tapi í fimm ár samfleytt A og B hluta saman án OR. Þetta er brot á sveitarstjórnarlögum sem eru vitanlega meginlöggjöfin um sveitarfélögin í landinu.“

Ársreikningur Reykjavíkurborgar 2015
síðari umræða
Halldór Halldórsson oddviti Sjálfstæðisflokksins í Reykjavík
Forseti, ágæta borgarstjórn.

Við fyrri umræðu fór ég fyrst og fremst yfir heildarútkomuna með samanburði við fyrri ár.
Núna við síðari umræðu skoða ég einstaka rekstrarliði á borð við þróun stöðugilda sem mikil áhrif hafa á rekstrarkostnaðinn og segja ákveðna sögu um hvort kerfið er að bólgna út eða ekki. Ég ætla líka að tala um rekstrarjöfnuð á þriggja ára tímabili sem fjallað er um í skýrslu endurskoðenda borgarinnar KPMG, þar er mjög alvarlegt mál á ferðinni sem við getum ekki leyft okkur að líta framhjá. Borgin eða öllu heldur meirihluti Pírata, Samfylkingar, Vinstri grænna og Bjartrar framtíðar hefur tekið ákvörðun um að brjóta sveitarstjórnarlög, meginlöggjöfina um rekstur sveitarfélaganna í landinu.

Rekstrarniðurstaða A-hluta, borgarsjóðs, var neikvæð um 13,6 makr. Áætlun gerði ráð fyrir neikvæðri niðurstöðu um 0,6 makr. Skatttekjur A-hluta voru 69,3 makr eða 0,6 makr yfir áætlun. Aðrar tekjur voru 15,6 makr eða 0,7 makr yfir áætlun. Launakostnaður var 49,2 makr og 1,1 makr yfir áætlun eða sama tala og tekjur hækka um. Við heyrum nefnilega að tekjur hafi ekki fylgt útgjöldum vegna hárra kjarasamninga. Hér fylgist þetta að á árinu 2015 og það verður að segjast að margt bendir til þess að tekjur muni hækka verulega á árinu 2016, ég gerði það að umtalsefni við fyrri umræðu að það ætti ekki að vera hægt að reka borgina með tapi með svona mikla tekjuaukningu. Þá gleymdi ég því að það er ætlun meirihlutans að reka borgina með tapi skv. áætlunum út árið 2017.

Mikil hækkun lífeyrisskuldbindingar skapar þetta mikla tap. En ef við skoðum reksturinn með því sem kallast gæti meðalgjaldfærsla lífeyrisskuldbindinga, tökum frá þessa miklu sveiflu sem kemur árið 2015 vegna kjarasamninga og hækkunar lífaldurs þá er tapið engu að síður 1,3 makr. Þannig að A-hlutinn, allur reglulegur rekstur borgarinnar fjármagnaður með skatttekjum og þjónustugjöldum upp að vissu marki er ekki að standast áætlun og sýnir mun verri niðurstöðu en áætlanir gerðu ráð fyrir og mun verri niðurstöðu en hægt er að sætta sig við.

Veltufé frá rekstri A-hluta var 5,2 makr eða 5,7% af tekjum A-hluta á árinu 2015 sem var betri niðurstaða en gert var ráð fyrir í útkomuspá ársins. Þetta var um veltufé frá rekstri. Þetta segir okkur að allar afsakanir vegna reiknaðra stærða fram og til baka hafa ekki svo mikið gildi. Það er ljóst að veltuféð þarf að vera a.m.k. 9% af tekjum en er bara 5,7%. Það þýðir að reksturinn skilar ekki nægum fjármunum til þess að greiða af lánum og borga fjárfestingar. Það þýðir skuldahækkun ár frá ári.

Skuldir A-hlutans aukast vitanlega ár frá ári þegar hallarekstur er viðvarandi. Frá 2013 til 2014 hækka skuldirnar í A-hlutanum úr 62 milljörðum kr. í 64,5 milljarða kr. eða um 2,5 milljarða og svo frá 2014 til 2015 hækka skuldir A-hlutans úr 64,5 milljörðum í 80,7 milljarða kr eða um 16,2 milljarðar kr. á einu ár.

Fjölgun stöðugilda heldur áfram eins og sjá á á þessari yfirlitsmynd. Þetta eru 212 stöðugildi frá 2010 þar af 34 milli áranna 2014 og 2015. Það er kostnaður upp á 1,5 milljarð kr. á ársgrundvelli.

Rekstrarjöfnuður á þriggja ára tímabili er skilgreindur í 64. grein sveitarstjórnarlaga nr. 138/2011. Þar segir að samanlögð heildarútgjöld til rekstrar vegna bæði A og B hluta megi ekki vera á þriggja ára tímabili hærri en nemur samanlögðum reglulegum tekjum. Það má ekki reka með tapi í þrjú ár eða lengur.
Í skýrslu KPMG endurskoðenda Reykjavíkurborgar segir þetta: ,,Viðmið um jafnvægi í rekstri eru skilgreind nánar í reglugerð um fjárhagsleg viðmið og eftirlit með fjármálum sveitarfélaga nr. 502/2012. Reikningsskil Orkuveitu Reykjavíkur eru undanskilin við útreikning á rekstrarjöfnuði í samræmi við ákvæði reglugerðarinnar. Rekstrarjöfnuður Reykjavíkurborgar 2013-2015 var neikvæður um 824 m.kr. Gangi fyrirliggjandi áætlanir eftir verður rekstrarjöfnuður A og B hluta sveitarfélagsins neikvæður næstu tvö árin og síðan jákvæður árin þar á eftir.“

Þetta, ágætu borgarfulltrúar þýðir einfaldlega að áætlanir samþykktar af meirihluta Pírata, Samfylkingar, Bjartrar framtíðar og Vinstri grænna gera ráð fyrir lögbroti. Reykjavíkurborg er með það innbyggt í sínar áætlanir að reka sveitarfélagið með tapi í fimm ár samfleytt A og B hluta saman án OR. Þetta er brot á sveitarstjórnarlögum sem eru vitanlega meginlöggjöfin um sveitarfélögin í landinu. Höfuðborgin sem ætti að vera fyrirmyndarsveitarfélagið í öllu er með allt niður um sig í rekstrinum og mun miðað við áætlanir meirihlutans í borginni brjóta sveitarstjórnarlög. Með þeim viðbrögðum að líkindum að eftirlitsnefnd með fjármálum sveitarfélaga fer af stað og mun krefja borgina skýringa á því hvað hér sé eiginlega um að vera.

Þetta er háalvarlegt mál kæru borgarfulltrúar, mál sem við getum ekki tekið af neinni léttúð eða gamansemi eða leyft okkur í ræðum hér á eftir að snúa út úr. Þetta er vandræðalegt fyrir meirihluta þeirra fjögurra flokka sem hér ætla að gera allt fyrir alla en gera fátt. Og vandræðagangur þeirra færist yfir á okkur í minnihlutanum því vitanlega talar fólk um borgarstjórn í heild sinni. En það sem verst er er það að þetta bitnar fyrst og síðast á borgarbúum sem munu sjá á eftir sífellt meiri fjármunum af sínum launatekjum til að redda fjárhag borgarinnar sem eykur skuldir sínar ár frá ári eins og við höfum séð með svo myndrænum hætti hér.

Mig langar að ítreka það sem ég nefndi við fyrri umræðu að starfsfólk okkar vinnur góð störf út um alla borg. Það er svo sannarlega ástæða til að þakka okkar góða starfsfólki sem heldur borgarrekstrinum gangandi. Það er á ábyrgð okkar kjörinna fulltrúa og þá fyrst og fremst þeirra sem ákváðu að mynda meirihluta að sjá til þess að reksturinn sé innan eðlilegra marka. Það er hann ekki.

Svona er þetta ágæta borgarstjórn. Ólíkt hafast stjórnendur að hjá Reykjavíkurborg og ríki. Borgin í taprekstri meðan tekjur hækka en ríkið í niðurgreiðslu skulda og að lækka skatta. Það er t.d. að koma lækkun á tryggingagjaldi sem mun lækka útgjöld sveitarfélag um 800 m.kr. á ársgrundvelli. Borgin er um 40% af því. Það munar um slíkt og undirstrikar að skattalækkanir eru mikilvægar.
Það eru tvö ár til kosninga þannig að líklegt er að borgarbúar þurfi að herða sultarólina áfram og þrauka fram á vorið 2018 og kjósa þá sem geta tekið á þessum rekstrarmálum Reykjavíkurborgar, þjónustu og öðrum þáttum sem hafa hreinlega drabbast niður í tíð þessa fjögurra flokka meirihluta.

Í fréttum Stöðvar 2 í kvöld (4. mars) var talað við Þórarinn Guðnason lyflækni og sérfræðingur í hjartasjúkdómum. Hann sagði í viðtalinu að lykilatriðið í þessari umræðu sé að skaðleysi dekkjakurlsins hafi ekki verið sannað. Iðkendur verði að njóta vafans.

Í viðtalinu sagði hann m.a. þetta: ,,Ég hvet Reykjavíkurborg að taka strax á þessum málum og reyna að fá fjármagn í þetta. Það er engin ástæða til þess að halda áfram að gera þessa tilraun á börnunum okkar.“

Við borgarfulltrúar Sjálfstæðisflokksins lögðum eftirfarandi tillögu fram í borgarstjórn 1. desember 2015:  ,,Borgarstjórn samþykkir sérstaka fjárveitingu til endurbóta á gervigrasvöllum í borginni að upphæð 151 milljón króna. Fjárveitinguna skal nota til að endurnýja velli, sem eru nú með kurl úr úrgangsdekkjum sem yfirborðs-fylliefni, en setja þess í stað viðurkennt gæðagras og efni, sem stenst ýtrustu umhverfis- og heilbrigðiskröfur. Ýmsir aðilar, t.d. Læknafélag Íslands, hafa ítrekað varað við notkun úrgangsdekkjakurls sem fylliefni á umrædda velli og bent á að í því séu efni sem geti verið skaðleg heilsu manna, ekki síst barna og ungmenna.“

Tillagan var felld af Pírötum, Vinstri grænum, Samfylkingu og Bjartri framtíð.

Samt lögðum við fram tillögur samhliða þessari um að fresta eða fella niður framkvæmdir þannig að sparnaður fyrir borgina skv. okkar tillögum hefði orðið 261 milljón króna. Þær tillögur voru líka felldar af þessum fjórum flokkum.

Það er enginn áhugi hjá meirihluta þessara fjögurra flokka í borgarstjórn á að láta börnin njóta vafans varðandi heilsuspillandi áhrif af dekkjakurlinu.

Í borgarráði í morgun var gerð samþykkt sem kemur til móts við stefnu okkar Sjálfstæðismanna í borgarstjórn.

Samþykktin er þessi: ,,Borgarráð samþykkir að deiliskipulag Úlfarsárdals verði endurskoðað í samræmi við forsendur Aðalskipulags Reykjavíkur 2010-2030 um fjölgun íbúða og uppbyggingu og stækkun Úlfarsárdalshverfis og í samræmi við skipulagslýsingu fyrir breytingu á deiliskipulagi svæðisins.“

Þó sú viðbót við byggðina sem boðuð er samkvæmt þessu sé langt frá upphaflegum hugmyndum um allt að 28.000 íbúa byggð í Grafarholti og Úlfarsárdal þá er þetta skref í rétta átt og styrkir hverfið að mati okkar borgarráðsfulltrúa Sjálfstæðisflokksins.

Af þessu tilefni lögðum við borgarráðsfulltrúar Sjálfstæðisflokksins fram þessa bókun:

,,Borgarráðsfulltrúar Sjálfstæðisflokksins styðja endurskoðun á stærð hverfisins í Úlfarsárdal. Sú stækkun er í samræmi við stefnu Sjálfstæðisflokksins í borgarstjórn sem ítrekað hefur bent á þörfina fyrir stærra Úlfarsárdalshverfi. Núverandi íbúar hverfisins gerðu ráð fyrir stærra hverfi þegar þeir fjárfestu í húsnæði. Stærra hverfi styður við öflugra íþróttafélag, meiri möguleika á allri þjónustu og það kemur til móts við mikla þörf fyrir ódýrara íbúðarhúsnæði í borginni. Stækkun hverfisins er því mikilvægur þáttur í því að gera ungu fólki auðveldara fyrir að koma sér þaki yfir höfuðið.“

Nú er ljóst að beiðni mín fyrir hönd borgarfulltrúa Sjálfstæðisflokksins og Framsóknar og flugvallarvina um aukafund í borgarstjórn hefur verið afgreidd. Aukafundurinn verður þriðjudaginn 22. september kl. 17:00.

Tillaga okkar sem við sendum kl. 13:00 í gær, laugardaginn 20. september er svona:
,,Borgarstjórn samþykkir að draga til baka samþykkt borgarstjórnar frá 15. september 2015 um undirbúning og útfærslu á sniðgöngu Reykjavíkurborgar á ísraelskum vörum.“

Tillaga meirihlutans, þ.e. Samfylkingar, Bjartrar framtíðar, Vinstri grænna og Píraeta er svona:
,,Borgarstjórn samþykkir að draga tilbaka samþykkt borgarstjórnar frá 15. september 2015 um undirbúning og útfærslu á sniðgöngu á ísraelskum vörum.“

Tillaga þeirra er sem sagt tillagan okkar sem við sendum í gær óbreytt. Það er auðvitað gott því þá hlýtur tillaga okkar að verða samþykkt. En tilraunir meirihlutans til að slá ryki í augu fólks með þessum æfingum er auðvitað bæði vandræðalegt og skrýtið.

Þau þurfa að hugsa sinn gang í þessum fjögurra flokka meirihluta því þetta er bara eitt dæmið af mörgum um að þau ráða ekki við stjórn borgarinnar.

Undirritaður fyrir hönd Sjálfstæðisflokks og Framsóknar og flugvallarvina hefur óskað eftir aukafundi í borgarstjórn Reykjavíkur í síðasta lagi þriðjudaginn 22. september.

Hér að neðan má lesa beiðnina, tillöguna og greinargerð.

Beiðni um aukafund:

Með tilvísan til 8. gr. samþykktar um stjórn Reykjavíkurborgar og fundarsköp borgarstjórnar óska borgarfulltrúar Sjálfstæðisflokksins og Framsóknar og flugvallarvina eftir aukafundi í borgarstjórn sem allra fyrst og eigi síðar en þriðjudaginn 22.9. Beiðni þessi er lögð fram í þeim tilgangi að draga úr þeim skaða sem samþykkt borgarstjórnar hefur í för með sér fyrir viðskipti Íslands við önnur lönd.

Á aukafundinum verði eftirfarandi tillaga tekin til afgreiðslu:

Borgarstjórn samþykkir að draga til baka samþykkt borgarstjórnar frá 15. september 2015 um undirbúning og útfærslu á sniðgöngu Reykjavíkurborgar á ísraelskum vörum.

Greinargerð:

Tillaga þessi er lögð fram til að lágmarka þann skaða sem samþykkt meirihluta borgarstjórnar hefur haft í för með sér fyrir orðspor og viðskipti Íslands við önnur lönd. Þann 15. september 2015 ákvað meirihluti borgarstjórnar Reykjavíkur að fela skrifstofu borgarstjóra í samvinnu við innkaupadeild Reykjavíkurborgar að undirbúa og útfæra sniðgöngu Reykjavíkurborgar á ísraelskum vörum meðan hernám Ísraelsríkis á landsvæði Palestínumanna varir, eins og það er orðað í samþykkt borgarstjórnar.

Utanríkisráðuneytinu, sendiskrifstofum Íslands erlendis og Íslandsstofu hefur af þessu tilefni borist verulegur fjöldi fyrirspurna um afstöðu stjórnvalda til samþykktar borgarstjórnar. Þá hafa ferðaþjónustuaðilar lýst yfir áhyggjum sínum vegna málsins og þegar hefur orðið vart við afpantanir ferða.

Sveitarstjórnir eru eins og önnur stjórnvöld bundin af lögum. Í því felst að Reykjavíkurborg verður að haga stjórnsýslu sinni í samræmi lög og að ákvarðanir hennar mega ekki fara í bága við þau, þ. á m. lög um opinber innkaup, þar sem óheimilt er að mismuna fyrirtækjum á grundvelli þjóðernis eða af öðrum sambærilegum ástæðum.

Samþykki Reykjavíkurborg að breyta innkaupastefnu sinni með bindandi hætti þannig að ísraelskir birgjar skuli sniðgengnir, samræmist það hvorki íslenskum lögum né ákvæðum í alþjóðlegum skuldbindingum alþjóðaviðskiptastofnunarinnar (WTO) um opinber innkaup, sem Ísland er aðili að og Reykjavíkurborg og önnur sveitafélög eru bundin af.

Utanríkisráðuneytið áréttar að ákvörðun borgarstjórnar Reykjavíkur er ekki í samræmi við utanríkisstefnu Íslands og er heldur ekki til marks um tengsl Íslands og Ísraels.

Samþykkt meirihluta borgarstjórnar var því vanhugsuð og hefur þegar haft í för með sér afleiðingar til skaða fyrir íslenska þjóð.

Halldór Halldórsson
oddviti Sjálfstæðisflokksins

Á borgarstjórnarfundi í dag (1. september) var að beiðni Sjálfstæðisflokksins umræða um hálfsársuppgjör Reykjavíkurborgar.

Það fór ég yfir rekstrarvandann en frá janúar til júní er borgin (A-hluti) rekin með 3ja milljarða kr. tapi. Fjárhagsáætlun gerði ráð fyrir 1,8 milljarða kr. tapi. Veltufé frá rekstri er 1,4% sem er rosalega lágt og veldur því að skuldir borgarinnar aukast verulega ár frá ári.

Myndirnar hér að neðan segja meira en mörg orð. Smellið á myndirnar til að sjá þær í stærri upplausn.