Það var Háskólanum til skammar, að rektor hans og Háskólaráð skyldu ekki fordæma það, þegar nokkrir kennarar og nemendur hans ruddust 6. ágúst inn á málstofu í Háskólanum um lífeyrismál og gervigreind. Gerði hópurinn hróp að fyrirlesaranum, prófessor Gil Epstein, og fundarstjóranum, prófessor Gylfa Zoëga, svo að ekki heyrðist mannsins mál. Eftir að á þessu hafði gengið í tuttugu mínútur, var þess ekki annar kostur en slíta fundinum. Einn óspektarmanna, Ingólfur Gíslason aðjúnkt, skrifaði færslu á Facebook sama dag: „Fyrirlestur fulltrúa þjóðamorðræðisins [svo] í Ísrael var blásinn af eftir um 20 mínútur. Þá hafði því verið komið því [svo] skýrt á framfæri að fyrirlestri prófessorsins væri hafnað.“
Þetta var árás á akademískt frelsi, en líka skýlaust lögbrot, því að í 122. gr. hegningarlaga segir: „Hver, sem hindrar það, að löglegur mannfundur sé haldinn, skal sæta sektum eða fangelsi allt að 1 ári, eða fangelsi allt að 2 árum, ef miklar sakir eru, einkum ef ofríki eða ógnun í framferði hefur verið viðhaft.“ Haskólaráð samþykkti aðeins ályktun almenns eðlis til stuðnings rétti til að mótmæla og rétti til að halda fundi óáreittur, en sagði ekkert um framferði árásarmanna. Kvað Háskólaráð þeim, sem teldu lög brotin, bera að benda lögreglunni í Reykjavík á það. Strax eftir að samþykkt þess hafði verið birt, gerði ég það bréflega til lögreglustjóra.
Setjum svo, að Noam Chomsky hefði átt að halda fyrirlestur í Háskóla Íslands, en hópur kennara og nemenda ruðst inn á fundinn og komið í veg fyrir, að Chomsky talaði. Þá hefði áreiðanlega ekki staðið á viðbrögðum Háskólans. Ég get ekki dregið aðra ályktun en þá, að máli hafi skipt, að Gil Epstein var gyðingur frá Ísrael, enda skrifaði forsprakki árásarinnar, Ingólfur Gíslason, aðra færslu sama dag: „Ísrael fari til helvítis!“

(Fróðleiksmoli í Morgunblaðinu 22. nóvember 2025.)