Markmiðið með skattkerfinu okkar er að afla ríkissjóði tekna til að standa undir rekstri, greiða niður skuldir og fleira en einnig að stuðla að jöfnuði í samfélaginu. Þrepaskipt skattkerfi eins og við búum við og komið var á af ríkisstjórn Jóhönnu Sigurðardóttur er vel til þess fallið að ná þeim markmiðum. Það gerir einnig hækkun persónuafsláttar sem hækkai um 45% undir stjórn jafnaðarmanna auk þess sem persónuafláttinn er verðtryggður frá 1. janúar 2012. Þannig heldur hann gildi sínu gagnvart ört rýrnandi krónu og ver kjör þeirra sem lægstu launin hafa.
Með þessu er byrðunum dreift þannig að þeir greiða hlutfallslega meira í sameiginlega sjóði sem meira hafa úr að spila en þess gætt að þeir sem verr standa greiði hlutfallslega minna. Greiningar hafa sýnt að niðurstaðan er eins og að var stefnt: 60% heimila í landinu greiða sama hlutfall eða hlutfallslega lægri skatta nú en þeir gerðu fyrir skattkerfisbreytinguna en þau 40% sem betur standa greiða nú meira til samfélagsins. Við öflum þannig tekna fyrir ríkissjóð og aukum jöfnuð í samfélaginu um leið. Hið opinbera fær tekjur sem aflað er í þremur þrepum með hlutfallslega lægi sköttum fyrir þá tekju minni. Réttlætinu væri ekki fullnægt með flötum skatti. Réttlætið fæst ekki með einfaldleikanum, a.m.k. ekki í þessu tilfelli.
Eitt af fjölmörgum kosningaloforðum Sjálfstæðismanna var að lækka tekjuskatt einstaklinga og að hann verði jafnframt í einu þrepi. En hvað þýðir þetta fyrir heimillin í landinu? Sjálfstæðismaðurinn Guðlaugur Þór Þórðarson óskaði eftir skýrslu frá fjármálaráðherra á síðasta ári þar sem greina ætti áhrif þess ef tekjuskatthlutfall launa yrði í einu þrepi. Niðurstöður þeirrar skýrslu ættu sem flestir að kynna sér og hana er að finna á slóðinni http://www.althingi.is/dba-bin/Aferill.pl?ltg=140&mnr=254.
Það er skemmst frá því að segja að niðurstaða greiningarinnar er skýr og ótvíræð. Ef tekinn væri upp tekjuskattur einstaklinga með skatthlutfall í einu þrepi færist skattbyrðin óhjákvæmilega neðar í tekjudreifingunni þannig að þeir sem eru með lágar tekjur borga hærri skatta á meðan hinir sem eru tekjuhærri borga minna en áður. Skattur hinna tekjuhærri lækkar við einföldunina. Þetta er samt markmið Sjálfstæðismanna og kosningaloforð og stefna nýrrar ríkisstjórnar. Þar með er nokkuð ljóst í þágu hvaða heimila þeir flokkar stafa. Fyrir heimili þeirra efnameiri á kostnað þeirra efnaminni. Það er því miður undirtónn samstarfsyfirlýsingar ríkisstjórnar Framsóknar og Sjálfstæðismanna
Oddný G. Harðardóttir
Sæl Oddný
Þú talar um að persónuafslátturinn hafi hækkað um 45% undir stjórn jafnaðarmanna, ertu þá ekki aðallega að tala um stjórn Sjálfstæðisflokks og Samfylkingar? Persónuafslátturinn var 42.205 kr. árið 2009 (þegar norræna velferðarstjórnin tók við) og er í dag 48.485 kr. Það er allavegana ekki 45% hækkun.
Fyrsta verk ríkisstjórnar VG og Samfylkingar var að lækka persónuafsláttinn, það gerðuð þið með að afnema verðtryggingu persónuafsláttar, í einu mesta verðbólguskoti seinni ára.
Svo leyfiru þér að hreykja þér á því að þið hafið verðtryggt persónuafsláttinn árið 2012 án þess að minnast á að það voruð þið sem afnámuð hann á fyrsta ári stjórnar ykkar og VG. Sú aðgerð ykkar kostar í dag lágtekjupar yfir 120 þúsund á ári í auknar skattgreiðslur, jafnaðarstjórn að störfum þar.
Spurning er því, í þágu hverra voruð þið að flækja skattkerfið?
Kv
Ragnar
Hún er stjórnmálakona, við hverju býstu? Oddný seldi skrattanum og ömmu hans sál sína fyrir smá völd. Heldur þú virkilega að lygar, illska í garð öryrkja, sjúkra og aldraðra sé þessari konu framandi.
Nei, þvert á móti þá nærist hún og félagar hennar á eymd annarra. Verk hennar tala sínu máli.
Ég sé engan rökstuðning fyrir þessari fullyrðingu, Oddný:
„Réttlætinu væri ekki fullnægt með flötum skatti. Réttlætið fæst ekki með einfaldleikanum, a.m.k. ekki í þessu tilfelli.“
Ef við værum til dæmis með skattleysismörk í 200 þúsund krónum, og 45% skatt þar fyrir ofan, þá væri skatthlutfallið hratt hækkandi eftir þessi 200 þúsund. Er ekki hægt að búa til réttláta útgáfu af því kerfi í þínum huga? Af hverju?
Og, ég sé ekki betur en að þessi fullyrðing þín sé beinlínis röng, Oddný:
„Ef tekinn væri upp tekjuskattur einstaklinga með skatthlutfall í einu þrepi færist skattbyrðin óhjákvæmilega neðar í tekjudreifingunni þannig að þeir sem eru með lágar tekjur borga hærri skatta á meðan hinir sem eru tekjuhærri borga minna en áður.“
Nema maður gefi sér einhverjar tilteknar forsendur. Hvaða forsendur eru það?
Af því þú spyrð Oddný þá á að lækka skatta í þágu efnameiri heimila. Það á eftir að koma í ljós sennilega mjög fljótlega.