Skrýtið – á fundi umhverfissamtaka í Norræna húsinu fyrir viku lagðist formaður Framsóknar, Sigurður Ingi Jóhannsson, gegn kolefnisgjaldi, eða að minnsta kosti breytingum á núverandi kolefnisgjaldi. Enda stóð Framsókn að verulegri lækkun kolefnisgjaldsins í samstjórn Bjarna og Sigmundar Davíðs. Sigurður Ingi taldi upp ýmsa vankanta, svo sem að á landsbyggðinni væru menn háðari bílunum (sem er rétt – en er það ekki dæmigert úrlausnarefni fyrir stjórnmálamenn með ívilnunum og sólarlagsákvæðum?).

Framsókn keyrir kosningabaráttuna á tveimur persónum, Sigurði Inga formanni og Lilju Alfreðsdóttur varaformanni – og maður býst þessvegna við að þau séu þokkalega samferða.

En það er ekki í kolefnisgjaldinu. Þvert á móti segir Lilja sem flutningsmaður (rapporteur) í nýlegri skýrslu um umhverfismál á alþjóðavettvangi (hjá Nató!) að kolefnisgjald sé sjálfsagt mál í loftslagsaðgerðum. Punktur 61 í skýrslunni hefst nokkurnveginn svona:

Það er … heilbrigð efnahagsleg ráðstöfun að skatta kolefni þannig að verðið sýni raunverulegan kostnað við notkun þessa eldsneytis. Sá kostnaður verður að koma fram í verðinu til þess að fyrirtæki og neytendur geti á skilvirkan hátt tekið ákvarðanir um orkunotkun.

Lilja segir sumsé annað í Brussel en Sigurður Ingi í Norræna húsinu. Kannski er það ekkert undarlegt að Framsókn sé næstum lægst á nýja loftslagsprófinu. Þar má þó að minsta kosti hugga sig við að vera hærri en gamli samstarfsflokkurinn — sem féll í loftslagsmálum.