Fimmtudagur 13.02.2014 - 08:09 - 2 ummæli

Karlar geta allt!

Hefur ljósfaðir tekið á móti barninu þínu? Hversu líklegt er að karl taki á móti barninu þínu í leikskólanum? Eða í grunnskólanum?

Ekki sérlega líklegt, segja tölurnar okkur. Íslenskur vinnumarkaður er mjög kynskiptur og endurspegla tölur frá menntastofnunum á framhalds- og háskólastigi kynbundið námsval ungmenna. Enginn karl hefur útskrifast með menntun ljósmóður á Íslandi. Aðeins 2% félagsmanna í Félagi íslenskra hjúkrunarfræðinga eru karlar, 12% starfandi félagsráðgjafa og hlutfall karla af heildarfjölda nemenda í kennaradeild menntavísindasviðs HÍ er innan við 20%.

Í störfum kennara, félagsráðgjafa og hjúkrunarfræðinga er þjónusta við almenning ríkur þáttur starfsins og snertir því stráka og stelpur, karla og konur. Því er mikilvægt að þjónustan taki mið af báðum kynjum og starfsumhverfið sé aðlaðandi vettvangur fyrir einstaklinga óháð kyni. Ástæður fyrir námsvali ungmenna eru vísast jafn ólíkar og þær eru margar. Staðalmyndir um það hvað sé æskilegt starfsval fyrir konur og karla virðast hins vegar enn vera ráðandi og sýna tölurnar að karlar eiga enn langt í land hvað varðar jafna þátttöku á við konur í umönnunar- og kennslustörfum.

Rannsóknir sýna að þegar annað kynið er í miklum meirihluta í ákveðinni stétt er eins og varnargarðar hafi verið reistir utan um viðkomandi stétt sem virkar hamlandi á hitt kynið. Þannig verður það nær óyfirstíganlegt fyrir einstakling af hinu kyninu að velja sér það nám og starf sem hugur þeirra og hæfileikar standa til. Einstaklingarnir fá ekki að njóta sín og samfélagið líður fyrir.

Eitt verkefna aðgerðahóps stjórnvalda og aðila vinnumarkaðarins um launajafnrétti er að stuðla að aðgerðum sem draga úr kynjaskiptingu starfa. Engin ein aðgerð er talin líklegri til að minnka launamun karla og kvenna en uppbrot hins kynskipta vinnumarkaðar. Það staðfesta bæði innlendar og erlendar rannsóknir. Aðgerðahópurinn efnir því til opins umræðufundar þar sem rætt verður um mögulegar leiðir til að fjölga körlum í umönnunar- og kennslustörfum á Grand Hóteli Reykjavík, 13. febrúar.

Brjótum upp hinn kynbundna vinnumarkað og sýnum að karlar geta allt!

(Birtist fyrst í Fréttablaðinu 13. feb. 2014)

Flokkar: Óflokkað

«
»

Ummæli (2)

  • Eiríkur Stefánsson

    Þetta útskýrist mjög mjög mikið til af mismunandi áhuga fyrst og fremst, þar næst af launum, einhverjir auðvitað finnst þeim ægilega hamlað vegna skorts á fyrirmyndum en kynbundin áhugamunur er stærsti þátturinn. Hefðbundin karl með hefðbundna hormónastarfsemi hefur oftast ekki mikin áhuga á umönnunarstarfi eða umbera einelti ofdekraðra barna á skólaaldri fyrir lítil laun. Hann fer síður í kostnaðarsamt og langt nám svo aðeins til að fata alveg óvart að námi loknu að stéttinni fylgja slæm laun.

    Kynjaþversögnin –
    http://www.youtube.com/playlist?list=PLF1E5B4F42C775054

    Það hlýtur að vera mikilvægari mál á dagskrá en að eltast við félagslega samsetningu ljósmæðra t.d., aðengi er öllum alls staðar opið og flest fólk er full fært að velja sér starfsvettvang sjálft.

    Eiki

  • Konur geta allt líka. En samt sjást fáar konur í byggingariðnaði eða t.d. í vinnuvélum. Af hverju? Langur vinnutími, líkamlegt erfiði og óhreinindi? Vilja konur velja sér ákveðin störf og láta karlana um hitt?

Rita ummæli

Kæfuvörn:   Hver er summan af fjórum og fjórum? Svar:

Höfundur

Eygló Harðardóttir
og lífið eftir pólitík.
RSS straumur: RSS straumur