Poul Kjærholm (1929-1980) var sveitastrákur frá smábæ á Jótlandi, Öster Vrå, skammt frá Hjörring.
Aðeins 15 ára fetaði hann inn á þann vettvang sem varð ævistarf hans. Hann lærði húsgagnasmíði og hóf nám í Listiðnaðarskólanum eins og Börge Mogensen og Skarphéðinn Jóhannsson og m. fl á þessum árum. Í framhaldinu hóf hann nám á Konunglegu Listaakademíunni og lærði hjá Hans J Wagner og professor Kåre Klint.
Hann vann einnig um tíma hjá Jörn Utzon og stúderaði alþjóðlega þekkta hönnuði á borð við Charles Eames, Mies van der Rohe, minimalistann Gerrit Rietveld o.fl.
Kjærholm var sérlega kröfuharður og agaður í öllum sínum störfum og gaf hvergi eftir. Hann sagðist einkum vinna með náttúruleg efni og það er rétt hjá honum. Hinsvegar er burstað stál áberandi í verkum hans. Hann var eitt sinn spurður út í það og svaraði því til að hann teldi stál náttúrulegt efni. Sennilega er það líka rétt hjá honum.
Kona hans, Hanne Kjærholm(1930-2009), var einnig ættuð frá Hjörringsvæðinu eins og Poul, sem var á bóndaárinu. Ekki veit ég hvort þau felldu hugi saman í sveitinni en þau gengu saman sínar professional breiðgötur og urðu bæði prófessorar við Konunglegu dönsku listaakademíuna fyrir hinar fögru listir í Kaupmannahöfn.
Hanne var kennari minn einn vetur á Akademíunni. Ég kynntist henni nokkuð og minnist þess að hún var skemmtileg og mikil kvennréttindakona. Hún varð fyrst kvenna professor í byggingalist á Akademíunni en Akademian var stofnuð 31. mars 1754 eða tæplega 240 árum áður en hún varð fyrsti kvenprofessorinn.
Hún teiknaði frægt hús þeirra hjóna í Rungsted árið 1962 o.m.fl.
Ég læt ekki margar ljósmyndir fylgja þessari færslu en visa á afar vandaðan bækling sem skoða má af þessari slóð: http://viewer.zmags.com/publication/0ee2abe9#/0ee2abe9/1
Hilmar Þór Björnsson arkitekt
Ég varð þeirrar ánægju aðnjótandi að vinna með Hanne að sérútgáfu nokkurra vel valinna húsgagna eftir Poul og það var ótrúlegt. Hún var ljónskörp og ótrúlega fær, orðin háöldruð og leið fyrir heilablóðfall svo hún átti erfitt með tal. Hún lést stuttu síðar og þar fór klár kona.
Ég stúderaði Poul spjaldanna á milli þegar ég vann að þessu verki og ég hvet alla leika og lærða að skoða verk þessa manns. Hann var ótrúlega nákvæmur og umhyggjusamur um verk sín og er hann í algjöru uppáhaldi hjá mér.
Ég bendi á bók sem heitir The furniture of Poul Kjærholm; Catalogue Raisonne eftir Michael Sheridan en hann lifir og starfar fyrir verk PK. Sú bók er jafn falleg sem hún er fróðleg og gefur frábæra mynd af meistaranum.
Það er næstum óbærilegur léttleiki yfir þessum húsgögnum. Maður trúir varla að þau geti borið meðal mann. En þau eru fullbær um það.
„Lifa og lofa manninn“ átti að standa.
KG
Frábær húsgagnahönnuður. Á sjalfur tvo PK 22 með fléttu sem eru orðnir 25 ára gamlir og eru fallegri nú en þegar þeir voru nýjir. Kjærholm var aðeins 51 árs þegar hann lést. Verkin lifa og loga manninn.
Reglulega skemmtileg yfirferð á framúrskarandi dönskum hönnuðum. Gaman væri að fjalla um íslenska hönnuði sem margir hafa sýnt fína spretti við þröngar aðstæður.(Gunnar Magnússon, Þórdís Zoega, Pétur lútersson o fl)
http://www.fhi.is/